1Sa ruasagavulu ka lima na yabaki i Jocame ni sa buli me tui, ka sa lewa mai Jerusalemi ka yabaki tinikaono. Na yaca i tinana talega ko Jirusa, na luve i Setoki.
2A sa caka dodonu ko koya e na mata i Jiova, me vaka na ka kecega ka kitaka na tamana ko Usaia, ia sa sega ga ni curu ki vale i Jiova. Ia era sa muria tikoga na veika ca ko ira na tamata.
3A sa tara ko koya na matamata-ni-koro e cake ni vale i Jiova, ka sa ogaoga vakalevu e na caka ni dela ni bai mai Ofeli.
4Sa tara talega na veikoro e na vanua veiulunivanua e Juta, ka sa tara e na veikau na veivale kaukauwa kei na veivale ni valu cecere.
5Sa vala talega kei koya na nodra tui na Amoni, ka sa gumatua vei ira. A sa solia vei koya ko ira na Amoni e na yabaki ko ya e dua na drau na taledi siliva, ka tini na udolu nai vakarau witi, ka tini na udolu na barile. Oqo na kena levu ni ka era a solia vua ko ira na Amoni, e na kenai karua ni yabaki, kei na kenai katolu.
6A sa tubu me kaukauwa ko Jocame, ni sa vakarautaka na nona i valavala e na mata i Jiova na nona Kalou.
7Ia na kena vo ni cakacaka i Jocame, kei na nona mataivalu kecega, kei na nona i valavala, raica, sa volai oti e na kedrai vola na tui Isireli kei Juta.
8Sa ruasagavulu ka lima na nona yabaki ni sa buli me tui, ka sa lewa tiko mai Jerusalemi ka yabaki tinikaono.
9A sa moce vata kei ira na nona qase ko Jocame, ka sa bulu e na koro i Tevita, ka sa lewa ko Easi na luvena, me kenai sosomi.
Who We AreWhat We EelieveWhat We Do
2025 by iamachristian.org,Inc All rights reserved.
