Aisea 61 - Ai Vola Tabu (Vakadewa Makawa Vakavoutaki 2021)（FRV21）

Nai Tukutuku Vinaka ni Veisereki

1 Maciu 11.5; Luke 7.22 Luke 4.18,19 Sa tu vei au na Yalo ni Turaga ko Jiova,

ni sa lumuti au ko Jiova,

me'u vunautaka nai tukutuku vinaka vei ira na dravudravua;

sa talai au mai me'u vakabulai ira sa kavoro na utodra;

me'u vunautaka na veisereki vei ira na bobula,

kei na galala vei ira era tiko e na vale ni veivesu;

2 Maciu 5.4 me'u vunautaka na yabaki vinaka i Jiova;

kei na siga sa ia kina na veisausaumi na noda Kalou;

me vakacegui ira kecega era sa tagi;

3me vakarautaki vei ira era sa tagi e Saioni—

me soli vei ira nai sala vakaiukuuku mei sosomi ni dravusa,

na waiwai ni reki mei sosomi ni tagi,

nai sulu ni vakavinavinaka mei sosomi ni lomabibi;

era na vakatokai na kau sa dauvuataka nai valavala dodonu,

nai teitei i Jiova, ka me vakacaucautaki kina ko koya.

4Era na tara tale na veikoro sa rusa makawa;

ka ra na vakaduria tale na ka sa vakacacani eliu;

ka vakavouya na veikoro sa lala tu,

na veiyasana ka ca e nai tabatamata e vuqa.

5Era na mai tiko na kai tani me ra vakania na nomudou qele ni sipi;

ia na luvedra na vulagi era na cakava na nomudou were,

ka samaka na nomudou veivaini;

6ia koi kemudou, dou na vakatokai na bete i Jiova,

dou na vakayacani nai talatala ni noda Kalou;

dou na kania na nodra i yau na veimatanitu,

ia dou na taukena talega na nodra lagilagi.

7Ena rua na nomudou i votavota, me kenai sosomi ni nomudou madua,

ka ra na marautaka na nodra i votavota me kenai sosomi ni taqaya;

ia e na nodra vanua dina era na taukena e rua nai votavota,

ka na nodra kina na marau e sega ni mudu.

8Ni sai au ko Jiova ka'u sa vinakata na lewa dodonu;

ka'u sa cata na ka sa kau tani vakatawadodonu;

ka'u na solia dina na kedra i sau,

ia ka'u na cakava vata kei ira na veiyalayalati e sega ni mudu.

9Ena qai kilai e na veimatanitu tani na nodra kawa,

kei na luvedra e na kedra maliwa na veimataqali.

Ko ira kece era raici ira era na kilai ira,

ni sai ira na kawa sa vakalougatataka ko Jiova.

10 Vtaki 21.2 Au na rekitaki Jiova vakaidina;

na yaloqu ena rekitaki koya na noqu Kalou;

ni sa vakasulumi au e nai sulu ni bula,

ka vakaitutuvitaki au e nai tutuvi ni yalododonu,

me vaka na tagane sa qai vakawati sa vakaisalataki koya e nai sala vakabete,

ka vaka na yalewa sa qai vakawati sa vakaiukuukutaki koya e na nona ka talei.

11Me vaka na qele sa tubura na kena buroro,

ka vaka na were sa tubura na ka e tei kina;

ena vakatubura vakakina ko koya na Turaga ko Jiova,

nai valavala dodonu kei na vakavinavinaka, e na matadra na veimatanitu kecega.