Maika 3 - Ai Vola Tabu (Vakadewa Makawa Vakavoutaki 2021)（FRV21）

Ko Ira na Turaga Veiliutaki Ca kei na Parofita Ca

1Ia ka'u a kaya,

Dou vakarorogo mada, koi kemudou na turaga i Jekope,

kei kemudou na mataveilewai ni vale i Isireli!

Sa sega beka ni kilikili kei kemudou mo dou kila na lewa dodonu?—

2oi kemudou sa cata na ka vinaka ka vinakata na ka ca,

ka vocia tani vei ira na kulidra,

kei na lewedra mai na suidra;

3ka dou sa kania na lewedra na noqu tamata,

ka vocia tani vei ira na kulidra;

kei na suidra era sa vorolaka,

ka tatalaka me vaka na lewe ni kuro,

me vaka na lewe ni manumanu e na loma ni kuro levu.

4Era na qai tagi vei Jiova,

ia ena sega ni rogoci ira ko koya;

io, ena tabonaka na matana mai vei ira e na gauna ko ya,

ni sa ca na nodra i valavala.

5Sa kaya vakaoqo ko Jiova e na vukudra na parofita

era vakacalai ira na noqu tamata,

ka ra katia e na batidra, ka kacivaka, Na vakacegu;

ia ko koya sa sega ni solia na kakana ki na gusudra,

era sa vakarau me ra vala kaya.

6O koya oqo ena yacovi kemudou kina na bogi, ka na sega na raivotu,

ia ena butobuto vei kemudou, ka na sega ni ia na dauraica na ka;

io, ena dromu na mata-ni-siga vei ira na parofita,

ena siga butobuto ga vei ira.

7Era na qai madua na daurai,

ka taqaya na daucaka-mana vakailasu;

io, era na tabonaka na tebenigusudra kecega,

ni sa sega na ka e tukuna mai ko koya na Kalou.

8Ia e dina ni'u sa sinai e na kaukauwa

mai vei koya na Yalo i Jiova,

e na lewa dodonu talega, kei na yalodei,

me'u tukuna rawa vei ira na Jekope na nodra talaidredre,

vei ira talega na Isireli na nodra i valavala ca.

9Dou rogoca mada na ka oqo, oi kemudou na turaga ni vale i Jekope,

kei kemudou na mataveilewai ni vale i Isireli,

koi kemudou sa cata na lewa dodonu,

ka kauta vakatani na ka dodonu kecega,

10era sa tarai Saioni e na dra,

kei Jerusalemi e na caka cala!

11O ira na nodra turaga era sa ia na veilewai e na vuku ni solisoli ni veivaqumi,

kei ira na nodra bete era sa ia nai vakavuvuli me ra saumi kina,

kei ira na nodra parofita era sa ia na caka mana vakailasu me ra vakailavo kina;

ia, era na vakararavi ga vei Jiova, ka kaya,

Sa sega li ni tiko vata kei keda ko Jiova?

Ena sega ni yacovi keda e dua na ca.

12 Jere 26.18 O koya oqo ena cukiti kina ko Saioni

me vaka na were e na vukumudou,

ia ko Jerusalemi ena yaco me koro rusa,

kei na ulunivanua ni vale tabu ena vaka na veitikina cecere ni veikau.