Aisea Nai Vakamacala Taumada - Ai Vola Tabu (Vakadewa Makawa Vakavoutaki 2021)（FRV21）

Nai Vakamacala Taumada Nai Vola i Aisea e vakatokayacataki vua na parofita rogo levu ka bula mai Jerusalemi ena i karua ni veimama ni kawalu ni yabaki drau (senitiuri) ni bera ni sucu na Karisito. Nai vola oqo e rawa ni wasei vakatolu.(1) Na Wase 1-39 e volai koto kina nai tukutuku ni dua na gauna dredre ka sota kaya na matanitu mai na ceva, ko Juta, ni sa voleka ni valuti koya na matanitu kaukauwa ko Asiria, ka toka tikivi koya. E raica ko Aisea ni sega wale ga ni vu ni leqa na kaukauwa i Asiria, ia e vuni leqa talega na nodra i valavala ca na Juta; o ya na nodra talaidredre vua na Kalou kei na nodra sega ni vakabauti koya. Sa veivakaroti ka kacivi ira kina na tamata kei ira era veiliutaki ko Aisea me ra matanataka na bula e savasava ka dodonu ena vosa kei nai vakarau. E a vakasalataka talega ni ra na cudruvi ka vakarusai kevaka era sega ni vakarorogo vua na Kalou. Sa yalataka rawa talega ko Aisea ni na yaco mai e dua na gauna ni veisaututaki e vuravura taucoko kei na nona vakarau lako mai e dua mai na kawa i Tevita me na yaco me tui.(2) Na Wase 40-55 e tukuna na gauna ni nodra a tu vakabobula kina mai Papiloni e vuqa na Juta, ka sa kavoro tu na bula ka sega nai nuinui. E tukuna kina na parofita ni na sereki ira na nona tamata na Kalou ka vakalesui ira ki Jerusalemi, me ra tekivutaka vou tale kina na nodra bula. E dua na vakasama levu e vulici ena i wasewase oqo e vaka koto oqo: ni sai koya ga na Kalou sa Turaga ni veitabagauna makawa, ka sa nona i naki vei ira na nona tamata e okati vata kina na nodra i tavi me ra i dewadewa ni lomana ki na veimatanitu tale eso, me ra na vakalougatataki mai vei Isireli. Na veitikina eso me baleti koya na “Dauveiqaravi ni Turaga” sa kilai levu talega ena Veiyalayalati Makawa.(3) Na Wase 55-66, e vuqa na tikina e dusia tiko na gauna ka ra sa tiko tale kina na tamata mai Jerusalemi, ka ra gadreva tu na veivakadeitaki ni na vakayacora na Kalou na nona yalayala ki na nodra vanua. Sa vakabibitaki kina me ra yalododonu ka cakacaka vakasavasava; e vakakina na kena rokovi na Siga ni Vakacecegu, na cakacaka ni vakacaboi soro, kei na masumasu. E dua na tikina koula ko ya na 61.1-2, na mala ni vosa oqo ka a cavuta ko Jisu ena i tekitekivu ni nona veiqaravi me vakamacalataka kina na nona i lesilesi.Na Lewe ni VolaAi vakasala kei na yalayala 1.1—12.6

Sa cudruvi na veivanua 13.1—23.18

Tau na lewa ni Kalou me baleti vuravura 24.1—27.13

Ai kuri ni vakasala kei na yalayala 28.1—35.10

Na tui Juta ko Esekaia kei ira na kai Asiria 36.1—39.8

Na veivosa ni yalayala kei nai nuinui 40.1—55.13

Na veivakasalataki kei na yalayala 56.1—66.24