Vakarua 23 - Ai Vola Tabu (Vakadewa Makawa Vakavoutaki 2021)（FRV21）

Ko Ira era Vakatabui mai nai Soqosoqo i Jiova

1O koya sa mavoa na sore ni nona, se koya sa mudu na nona ka vakatagane, me kakua ni curu ki nai soqosoqo i Jiova.

2A luve ni butako e tabu ni curu ki nai soqosoqo i Jiova; ia ka yacova nai katini ni nona i tabatamata, e tabu me ra curu ki nai soqosoqo i Jiova.

3Nie 13.1,2Na kawa i Amoni se na kawa i Moapi era na sega ni curu ki nai soqosoqo i Jiova; ia me yacova nai katini ni nodra i tabatamata, ena tabu ni ra curu ki nai soqosoqo i Jiova ka tawa mudu,

4Tiko 22.1-6ni ra sega ni kauta na madrai kei na wai, ka la'ki tavaki kemuni e na sala, ni ko ni a lako tani mai Ijipita; ka ni ra voli Pelami na luve i Piori na kai Picori mai Mesopotemia, me vatonaki kemuni.

5Tiko 23.7—24.9Ia sa bese ga ni vakarorogo vei Pelami ko Jiova na nomuni Kalou; a sa vukica na vatovato ni ca ko Jiova na nomuni Kalou me vosa ko ni sa kalougata kina, ka ni sa lomani kemuni ko Jiova na nomuni Kalou.

6Mo ni kakua ni qara na ka me ra sautu kina se na ka me ra vinaka kina, e na nomuni veisiga kecega, ka sega ni mudu.

7Mo ni kakua ni cata na kai Itomi, ni sa wekamuni ko koya. Mo ni kakua ni cata na kai Ijipita, ni ko ni a tiko vulagi e na nona vanua.

8A luvedra sa sucu vei ira, era na curuma nai soqosoqo i Jiova e nai katolu ni nodra i tabatamata.

Na Maroroi ni Savasava ni Tikotiko

9Ni sa lako yani na nomuni mataivalu me veivala kei ira na nomuni meca, mo ni qarauni kemuni mai na ka ca kecega.

10Kevaka sa dua na tamata vei kemuni sa sega ni savasava e na vuku ni dua na ka sa yaco loa vua e na bogi, me qai lako tani ko koya ki nai bili ni tikotiko; me kakua ni lako mai ki loma ni tikotiko.

11Ia ni sa toro mai na yakavi, ena sili ko koya e na wai, ia ni sa dromu na mata-ni-siga, me qai curu mai ki nai tikotiko ko koya.

12Ia me dua na nomuni tikina mai nai bili ni tikotiko, ko na lako yani kina.

13Ka me dua na mata-ni-sau e na nomuni yaragi ni valu, ia ena yaco ni ko ni sa la'ki vakara, mo ni qai kelia na qele ka buluta na ka e lako mai vei kemuni.

14Ni sa lako voli e na nomuni tikotiko ko Jiova na nomuni Kalou, me vakabulai kemuni ka me soli ira na nomuni meca vei kemuni, o koya me savasava kina na nomuni tikotiko, me kakua kina ni raica ko koya na ka ca vei kemuni ka gole tani mai vei kemuni.

Na Veilawa Tale Eso

15Mo ni kakua ni solia tale vua na turaga na tamata sa dro kivei kemuni mai vua na nona turaga.

16Ena tiko ga kei kemuni ko koya, io e na kemuni maliwa, e na yasana sa digitaka ko koya e na dua na nomuni koro, sa vinakata ko koya. Mo ni kakua ni vakasaurarataki koya.

17 Vsoro 19.29 Me kakua e dua na yalewa ni Isireli me dautagane, se dua vei ira na tagane ni Isireli me veivakasisilataki.

18Mo ni kakua ni kauta nai voli ni yalewa dautagane, se nai voli ni koli sa veivakasisilataki, ki na vale i Jiova na nomuni Kalou, e na vuku ni dua na bubului, ni sa ka vakasisila koi rau ruarua oqo vei Jiova na nomuni Kalou.

19 Lako 22.25; Vsoro 25.36,37; Vrua 15.7-11 Mo ni kakua ni solia e dua na ka vua na wekamuni mo ni taura tale kei na kenai kere, se i lavo, se kakana, se dua na ka sa dautauri tale kei na kenai kere.

20E tara mo ni solia na ka vua na kai tani mo ni taura tale kei na kenai kere; ia sa tabu ga mo ni soli-ka ki na wekamuni mo ni taura tale kei na kenai kere, me vakalougatataki kemuni kina ko Jiova na nomuni Kalou e na ka kecega sa cakava na ligamuni, e na vanua ko ni sa lako yani kina mo ni taukena.

21 Tiko 30.1-16; Maciu 5.33 Ni ko ni sa bubului vei Jiova na nomuni Kalou, mo ni kakua ni berabera ni vakayacora; ni na taroga dina vei kemuni ko Jiova na nomuni Kalou, o ni na qai cala kina.

22Ia kevaka ko sa kua ni bubului, ena qai sega ni ca vei kemuni.

23A vosa sa lako mai na gusumuni mo ni vakabauta ka vakayacora; io nai soro sa lomamuni ga mo ni vakacabora, me vaka ko ni sa bubului vei Jiova na nomuni Kalou, na ka sa yalataka na gusumuni.

24Ni ko ni sa curu ki na nona veivaini na kai nomuni, e tara mo ni kania loa na vua-ni-vaini mo ni mamau kina; ia e tabu mo ni tugana ki na nomuni kato.

25Ni kemuni sa lako ki loma ni were ni sila ni kai nomuni, e tara mo vetia na kena sola e na ligamuni; ia sa tabu mo ni vakacuruma nai sele ni sila ki na sila ni kai nomuni sa tu ga.