Aisea 5 - Ai Vola Tabu (Vakadewa Makawa Vakavoutaki 2021)（FRV21）

Na Sere ni Loganivaini Sega ni Vuavuai Vinaka

1 Maciu 21.33; Mari 12.1; Luke 20.9 Au na seretaka mada vua ka'u sa dau lomana

na sere ka baleta na loga-ni-vaini nei koya ka'u sa lomana.

E dua na loga-ni-vaini nei koya ka'u sa dau lomana,

ka no mai na dua na ulunivanua qele bulabula.

2A sa viribaita, ka biuta tani na kena veivatu,

ka tea kina na vaini vinaka sara;

ka sa tara e dua na vale-cecere e loma,

a sa kelia kina nai keli-waini;

ka sa qai nuitaka me vuataka na vuana,

ia sa vuataka na vua ca.

3Ia koi kemudou na kai Jerusalemi,

kei na tamata ni Juta,

dou lewa mada vei keirau

kei na noqu loga-ni-vaini.

4A cava tale me caka ki na noqu loga-ni-vaini,

ka'u a se sega ni cakava kina?

Ia e na vuku ni cava, ni'u a nuitaka me vuataka na vua-ni-vaini,

sa qai vuataka ga na vua-ni-vaini ca?

5Ia oqo, ka'u na tukuna mada vei kemudou

na ka ka'u na cakava ki na noqu loga-ni-vaini.

Au na kauta tani na kena bai soni,

ena qai laukana;

au na talaraka sobu na kena bai vatu,

ena qai butubuturaki.

6Au na biuta ga me veikau tu mada;

ena sega ni samaki se wereci;

ena tubura ga na kau vakavotona kei na soni,

ia ka'u na vakarota na o

me kakua ni vakatauca mai kina na uca.

7Ia sa loga-ni-vaini i Jiova-ni-lewevuqa

na veivuvale e Isireli,

kei ira na tamata ni Juta

era sa nona i teitei daudomoni;

a sa namaka ena ia na caka dodonu,

ka raica, sa ia ga na veivakamatei;

kei nai valavala dodonu,

ka raica, na rorogo ga ni qoqolou!

Na Veika Ca sa Cakava na Tamata

8Era na ca ko ira era dauvakaikuritaka na vale ki na vale,

ka daukuria na were ki na were,

me yacova ni sa sega na vanua e vo,

mo dou qai tiko vakataki kemudou ga e na loma ni vanua!

9Sa kaya tiko e na daligaqu ko Jiova-ni-lewevuqa,

“E dina ena lala mai na veivale e vuqa,

na veivale lelevu ka vinaka, ka me sega e tiko kina.

10Io, na loga-ni-vaini sa tini na eka ena rawati ga kina e dua na paca waini (8 na lita),

kei na dua na omeri sila (180 na lita) ena rawati kina e dua na efa (18 na lita na sila).”

11Era na ca ko ira era souta na gunu yaqona e na mataka caca;

ka bogicaka, me ra mateni e na waini!

12Ia na api kei na vaioli,

na tibereli kei na bitu-ni-vakatagi,

kei na waini, sa ka ni nodra so yaqona;

ia na cakacaka i Jiova era sa sega ni kauwaitaka,

kei na ka sa cakava na ligana era sa sega ni bau nanuma!

13O koya oqo era sa kau vakabobula tani kina na noqu tamata ka sa sega vei ira na lomavuku;

ia na nodra tamata rogo era sa mate e na viakana,

kei na nodra lewe vuqa era sa mate e na viagunu.

14O koya oqo sa vakalevutaki koya kina ko bulubulu,

ka sa dalaga vakalevu sara;

ka sa lako sobu kina ko ira era sa rogo, kei na kedra lewe vuqa,

kei na kedra totoka, kei koya sa marautaki koya.

15A sa vakamalumalumutaki na tamata wale,

ka vakasivoi na tamata turaga,

ena matamadua talega ko ira na mataviavialevu.

16Ia ko Jiova-ni-lewevuqa sa vakalevulevui e na lewa dodonu,

a sa vakarokorokotaki na Kalou yalosavasava e nai valavala dodonu.

17Ena qai kana voli na lami me vaka e na kedra vanua veico,

ia na nodra vanua lala na vutuniyau ena kania ko ira na kai tani.

18Era na ca ko ira era yarataka mai nai valavala ca e na dali ni ka lasu,

ka caka ca me vaka e na dali kaukauwa,

19o ira era kaya, “Me tei kusarawa ko koya,

ka me vakusakusataka na nona cakacaka

me rawa ni da raica;

ia na ka sa bosea ko koya na Yalosavasava ni Isireli

me toro mada mai ka yaco, me da kila kina!”

20Era na ca ko ira era vakatoka na ca me vinaka,

kei na vinaka me ca;

era kaya sa rarama na butobuto,

ka butobuto na rarama;

era kaya sa kamikamica na ka gaga,

ka gaga na ka sa kamikamica!

21Era na ca ko ira era nanumi ira ni ra vuku,

ka vakasami ira ni ra yaloqaseqase!

22Era na ca ko ira era gumatua ni gunu waini,

kei ira era tamata kaukauwa ni caka yaqona,

23ko ira sa vakadonui koya sa cala me nodra kina nai solisoli ni veivaqumi,

ka ra sa kauta tani mai vua na tamata dodonu na nona dodonu.

Tukutukutaki na Kaba Vakaivalu ni Matanitu Tani

24Ia me vaka sa kama na vu-ni-sila e na yameyame ni bukawaqa,

ka sa yavu sara na co madu ni sa caucaudre,

ena vuca sara vakakina na wakadra,

ia na sedra ena vuka cake me vaka na kuvu-ni-soso;

ka ni ra sa biuta tani na vunau i Jiova-ni-lewevuqa,

ka beca na vosa i Koya na Yalosavasava ni Isireli.

25O koya oqo sa waqa kina na cudru i Jiova vei ira na nona tamata,

ka sa dodoka yani na ligana vei ira, ka cudruvi ira;

ka sa sautaninini na ulunivanua,

ia na yagodra ka mate no sa vaka na soqosoqo benu

e loma ni saqata ni koro.

Ia ni sa caka kece oqo sa sega ni mudu kina na nona cudru,

sa dodo tikoga na ligana.

26Ia ena vakarewataka ko koya na kuila vei ira na veimatanitu vakayawa,

ka kaluvi ira mai nai yalayala kei vuravura;

ka raica, ena vakusakusa ka vakatotolo na nodra lako mai.

27Sa sega vei ira sa malumalumu se tidara;

sa sega ena sosovu se moce;

ia nai vau ni tolodra ena sega ni tasere,

kei na wa ni nodra i vava ena sega ni cavuka.

28Sa gata na nodra gasau,

ka sa loka tu na nodra dakai-titi kecega,

a ququ ni nodra ose sa nanumi ni sa vaka na qiwa,

kei na yava ni nodra qiqi-ni-valu sa vaka na covulaca.

29Era na tagi me vaka na laione,

era na tagi me vaka na luve ni laione;

io era na kudru, ka toboka na kedra,

ka kauta vakavinaka, ka na sega me vakabula.

30Era na qolouvaki ira e na siga ko ya

me vaka na vadugu ni wasawasa.

Ka kevaka sa rai ki vanua e dua—

raica, na butobuto ga kei ka rarawa;

ka sa tabonaki na rarama e na kena o.