Vosa Vakaibalebale 18 - Ai Vola Tabu (Vakadewa Makawa Vakavoutaki 2021)（FRV21）

1Ni sa tawasei koya tani na tamata, sa qara na ka e domona,

a sa veivorati kei na vuku kece.

2Sa sega ni reki ni vuli vuku na lialia,

sa reki ga ni tukuna na lomana.

3Ni sa lako mai na tamata ca, sa lako talega mai na veibeci,

a veivakamaduataki talega kei na veivakalialiai.

4Na vosa ni gusu ni tamata sa vaka na wai titobu,

kei nai vurevure ni vuku sa vaka na uciwai drodro.

5Sa sega ni vinaka na vinakata na tamata ca,

me vukica kina na yalododonu ni sa lewai.

6A tebenigusu ni tamata lialia sa goleva na veileti,

ia na gusuna, sa kere kuita.

7Na gusu ni tamata lialia sa rusa kina ko koya,

kei na tebenigusuna sai cori ni yalona.

8A vosa ni daukakase sa vaka na mavoa,

ka sa lau ki na vu ni loma ni tamata.

9O koya talega e gu ca e na nona cakacaka,

ka rau veitacini kei koya na dauvakacaca.

10Na yaca i Jiova sa vale-cecere kaukauwa;

sa dro kina na yalododonu, ka sa bula.

11Ai yau ni tamata vutuniyau sa nona koro kaukauwa;

ka sa vakasama ko koya ni sa vaka na bai cecere.

12Sa liu e na loma ni tamata na viavialevu ka sa muria tarava na rusa,

ia sa liu na yalomalumalumu ka sa muria na vakarokorokotaki.

13O koya sa vosa e na ka ni se bera ni rogoca,

sa ka lialia vua ka sa ka me madua kina.

14A yalo ni tamata sa vosota rawa ni sa tauvi mate;

ia na yalo sa mavoa—ko cei sa vosota rawa?

15A loma ni tamata yalomatua sa rawata na vuku,

kei na daligana na yalovuku sa gu ni kila ka.

16A nona i solisoli na tamata sa vakarawarawataki koya;

ka sa kauti koya ki na matadra na tamata turaga.

17Ko koya sa tukuna taumada na nona ka e veiletitaki sa rairai dodonu ga,

ia sa tarava mai na kai nona ka vakatarogi koya.

18Sa tinia na veileti na vakawiri madigi,

ka sa lewa rawa vei rau na kaukauwa.

19Na veitacini erau veimecaki sa dredre, ka rawarawa na koro kaukauwa;

ia na nodrau veileti sa vaka nai sogo ni vale kaukauwa.

20E na vua ni gusuna sa na mamau kina na kete ni tamata;

ena vakamamautaki talega e na ka e tubu mai na tebenigusuna.

21Na mate kei na bula sa tiko ga e na kaukauwa ni yame,

ia ko koya sa vinakata ena kania na vuana.

22O koya sa kunea e dua me watina sa kunea na ka vinaka,

ka sa rawata na loloma mai vei Jiova.

23Sa ia na vakamamasu na tamata dravudravua,

ia na vutuniyau sa vosa vakaukauwa ga.

24A tamata sa vakaveiwekani tiko kei na lewe vuqa sa vakaveiwekani kei na rusa,

ia sa dua na wekada sa voleka dina sara ka sa sega ni vakakina na veitacini.