1 Korinica 12 - Ai Vola Tabu (Vakadewa Makawa Vakavoutaki 2021)（FRV21）

Na Veisolisoli Vakayalo

1Ia e na vuku ni veika vakayalo, oi kemudou na veiwekani, au sa sega ni vinakata mo dou sega ni kila.

2Dou sa kila ni dou a tiko tawa-lotu, dou sa kau yani ki na veimatakau galu, me vaka ni dou sa tuberi voli vaka ka vaka.

3O koya oqo ka'u sa vakatakila kina vei kemudou, ni sa sega e dua na tamata sa vosa e na Yalo ni Kalou, “me sa vosavakacacataki Jisu,” ka sa sega e dua sa kaya rawa ni “sa Turaga ko Jisu,” ke sega ni vuna na Yalo Tabu.

4 Roma 12.6-8 Ia sa duidui na ka sa soli, ia sa dua bauga na Yalo Tabu.

5Sa duidui talega na kena cakacaka, ia sa dua bauga na Turaga.

6Sa duidui talega nai valavala ni ka sa caka, ia sa dua bauga na Kalou, o koya sa cakava na ka kecega vei ira kecega.

7A sa soli vei ira na tamata yadua nai vakatakilakila ni Yalo Tabu me yaga kina.

8Sa soli vua e dua e na cakacaka ni Yalo Tabu na vosa ni vuku; vua tale e dua na vosa ni kila-ka, e na cakacaka talega ni Yalo Tabu;

9vua tale e dua na vakadinata, e na cakacaka talega ni Yalo Tabu; vua tale e dua nai solisoli me vakabulai ira sa tauvi-mate, e na cakacaka talega ni Yalo Tabu;

10vua tale e dua me cakava na cakacaka mana; vua tale e dua me parofisai; vua tale e dua me kila na veiyalo; vua tale e dua na vosa tani eso; vua tale e dua me laveta na vosa tani eso.

11Ia na Yalo Tabu e dua bauga sa cakava na ka kecega oqo, ni sa vota vei ira na tamata yadua me vaka sa vinakata ko koya.

Sa Dua Bauga na Yago ka Vuqa na Veitikina

12 Roma 12.4,5 Me vaka sa dua bauga na yago, ka sa vuqa na kena tikina, ia na tiki ni yago kecega, sa vuqa ga, ka sa dua bauga na yago, sa vaka talega kina na Karisito.

13Ni da sa papitaisotaki kecega ki na yago e dua bauga e na Yalo Tabu e dua bauga—se da Jiu se da kai Kirisi, se da bobula se da tamata galala—eda sa vagunuvi talega e na Yalo Tabu e dua bauga.

14Ni sa sega ni dua walega na tikina e na yago, sa vuqa ga.

15Kevaka ena kaya na yava, “Oi au, ka'u sa sega ni tiki ni yago, ni'u sa sega ni liga;” sa sega ni ka oqo sa sega kina ni tiki ni yago.

16Ia kevaka ena kaya na daliga, “Oi au, ka'u sa sega ni tiki ni yago, ni'u sa sega ni mata;” sa sega ni ka oqo sa sega kina ni tiki ni yago.

17Kevaka sa mata na yago taucoko, ena qai evei na ka me rogo kina? Kevaka e ka ni rogo na tikina kece, ena qai evei na ka me boi kina?

18Ia oqo, sa cakava na Kalou na veitiki ni yago me tu yadua, me vaka na nona lewa.

19Ia kevaka sa dua bauga na tikina kecega, ena qai evei na yago?

20Ia oqo, sa vuqa na tikina, a sa dua bauga na yago.

21A sa sega ni kaya rawa na mata ki na liga, “Ko sa sega ni yaga vei au;” se na ulu ki na yava, “Drau sa sega ni yaga vei au.”

22Ia sa vakalevu cake talega oqori, a veitiki ni yago eda sa nanuma ni ra sa malumalumu, era sa yaga sara,

23ia na veitiki ni yagoda eda sa nanuma sa matavinaka vakalailai, oqori eda sa vakaiukuukutaka vakalevu cake, ia na veitikida sa sega ni lagilagi sa vakalagilagitaki vakalevu cake;

24ni sa sega ni yaga ki na veitikida sa lagilagi vakai ira. Ia na Kalou sa cakava me veirauti na veitiki ni yago, a sa lewa me nanumi vakalevu cake oqori sa uasivi sobu,

25me kakua kina ni veisei na yago, ka me veinanumi vakatautauvata na veitikina vakai ira.

26Ia kevaka sa rarawa e dua na tikina, sa rarawa vata na tikina kecega; se dua na tikina sa dokai, sa reki vata na tikina kecega.

27Ia koi kemudou na yago i Karisito, ka dui tikina yadua kina.

28Efe 4.11A sa lesi ira eso na Kalou e nai soqosoqo lotu, a kenai matai ko ira nai apositolo, ai karua na parofita, ai katolu nai vakavuvuli, sa qai muri ko ira sa daucaka-mana, kei ira, sa soli vei ira me ra vakabula na tauvi-mate, ko ira era veivuke, ko ira era lewa, ko ira era kila na vosa tani eso.

29Era sai apositolo kecega li? Era sa parofita kecega li? Era sai vakavuvuli kecega li? Era sa daucaka-mana kecega li?

30Era sa rawata kecega li nai solisoli me ra vakabula na tauvi-mate? Era sa vosa kecega li e na vosa tani e vuqa? Era sa lave vosa li ko ira kecega?

31Ia dou gadreva vakalevu na veisolisoli vinaka sara. Ia ka'u sa vakatakila vei kemudou nai valavala sa uasivi cake na kena vinaka.