Jeremaia 36 - Ai Vola Tabu (Vakadewa Makawa Vakavoutaki 2021)（FRV21）

Sa Wiliki nai Vola Vivigi e na Valenisoro

1 2Tui 24.1; 2Vei 36.5-7; Tani 1.1,2 E na kenai kava ni yabaki i Jioiakimi na luve i Josaia na tui Juta, sa yaco na vosa oqo vei Jeremaia mai vei Jiova, ka vaka:

2“Mo taura e dua nai vola vivigi, ka vola kina na vosa kecega ka'u sa tukuna vei iko ka baleti ira na Isireli, kei ira na Juta, kei na veimatanitu kecega, mai na siga ka'u a vosa kina vei iko, io mai na gauna i Josaia, ka yacova na siga oqo.

3Era na rogoca beka ko ira na lewe-ni-vuvale i Juta na ca kecega ka'u sa nakita me'u cakava vei ira; me ra dui lesu kina ko ira yadua mai na nona sala ca; ia me'u vosota kina na nodra caka cala kei na nodra i valavala ca.”

4Ia ko Jeremaia, sa kacivi Baruki na luve i Neraia, a sa vola ko Baruki ni sa tukuna tiko ko Jeremaia na vosa kecega i Jiova, sa vosataka vua, ki nai vola vivigi.

5Ka sa vakaroti Baruki ko Jeremaia, ka kaya, “Au sa sogolati tu, au sa sega ni lako rawa ki na vale i Jiova;

6ia mo lako ko iko, ka wilika mai nai vola vivigi, na vosa ka'u sa tukuna oti vei iko, io na vosa i Jiova vei ira na tamata e na vale i Jiova e na siga ni lolo. Ia mo wilika talega vei ira na Juta kecega era sa lako mai na nodra veikoro.

7Era na via vakamamasu beka e na mata i Jiova, ka dui lesu yadua mai na nona sala ca, ni sa levu na cudru kei na lesa sa cavuta ko Jiova me yaco vei ira na tamata oqo.”

8Ka sa la'ki cakava ko Baruki na luve i Neraia me vaka na ka kecega sa vakarota vua ko Jeremaia na parofita, ka sa wilika mai nai vola na vosa i Jiova e na vale i Jiova.

9Ia e nai kalima ni yabaki i Jioiakimi na luve i Josaia na tui Juta, e nai kaciwa ni vula, era sa kacivaka na lolo e na mata i Jiova vei ira kece na tamata mai Jerusalemi, kei ira kece na tamata era lako mai na veikoro vaka-Juta ki Jerusalemi.

10Ka sa wilika ko Baruki mai nai vola na vosa i Jeremaia e na vale i Jiova, e na tiki ni vale e cake, ka nei Kimaraia na luve i Sefani na vunivola, e na lomanibai e cake, e na Matamata-ni-koro Vou ki vale i Jiova, io sa wilika vei ira na tamata kecega.

Sa Wiliki nai Vola Vivigi e na Vale ni Tui

11Ia ni sa rogoca ko Mekaia na luve i Kimaraia, na luve i Savani, na vosa kecega i Jiova mai nai vola,

12sa lako sobu ko koya ki na vale-ni-tui, ki na nona tikina na vunivola; ka raica, sa tiko mai kea ko ira kece na turaga, ko Ilisama na vunivola, kei Tilaia na luve i Semaia, kei Elinecani na luve i Akipori, kei Kimaraia na luve i Savani, kei Setekaia na luve i Enanaia, kei ira kece na turaga.

13Ka sa tukuna vei ira ko Mekaia na vosa kecega sa rogoca ko koya, ni sa wilika mai nai vola ko Baruki vei ira na tamata.

14Ia ko ira kece na turaga era sa talai Jiutai na luve i Necanaia, na luve i Selemaia, na luve i Kusi, vei Baruki, me kaya vua, “Mo taura mada nai vola vivigi ko sa wilika mai kina vei ira na tamata, ka lako ga mai.” Ka sa taura ko Baruki na luve i Neraia nai vola vivigi, a sa lako mai vei ira.

15A ra sa kaya vua, “Mo tiko sobu mada, ka wilika vei keitou.” Ka sa wilika ko Baruki vei ira.

16Ia ni ra sa rogoca na vosa kecega, era sa dui rere na tamata yadua, ka ra kaya vei Baruki, “Keitou na tukuna vakaidina vua na tui na vosa kecega oqo.”

17Ka ra sa tarogi Baruki, ka kaya, “Tukuna mada vei keitou, Se ko sa vola vakaevei na vosa kece oqo mai na gusuna?”

18Sa qai kaya vei ira ko Baruki, “Sa cavuta vei au ko koya e na gusuna na vosa kece oqo, ia ka'u sa vola ki nai vola e na wai ni volavola.”

19A ra sa kaya vei Baruki ko ira na turaga, “Drau lako, mo drau la'ki vunitaki kemudrau mada kei Jeremaia; ia me kakua e dua na tamata e kila se drau sa tiko mai vei.”

Sa Vakama nai Vola Vivigi ko Jioiakimi

20Ka ra sa la'ki curu yani vua na tui ki na lomanibai, ia nai vola vivigi era sa maroroya e na tiki ni vale e cake nei Ilisama na vunivola, a ra sa tukuna e daligana na tui na vosa kecega oqori.

21A sa talai Jiutai na tui me la'ki kauta mai nai vola vivigi, ka sa la'ki kauta mai ko koya mai na tiki ni vale nei Ilisama na vunivola. Ka sa wilika vua na tui ko Jiutai, vei ira kece talega na turaga era tu e na mata ni tui.

22Ia na tui, sa tiko ga e na vale ni vula i liliwa e nai kaciwa ni vula, ka sa dua na miqa e matana ka waqa kina na buka.

23Ia ni sa wilika oti ko Jiutai e tolu se va na tikina, sa seleta ko koya na tui e nai sele ni vunivola, ka biuta ki na bukawaqa e na miqa, ka me kama oti nai vola vivigi e na bukawaqa sa tu e na miqa.

24A ra sa sega ni rere, se dresulaka na nodra i sulu, se ko koya na tui, se dua vei ira na nona talai era rogoca na vosa oqo.

25Ia ko iratou ga ko Elinecani kei Tilaia kei Kimaraia, eratou sa vakamasuta na tui me kakua ni vakama nai vola vivigi, ia sa bese ni rogoci iratou.

26A sa kaya sara na tui vei iratou ko Jiramieli na luve i Ameleki, kei Siraia na luve i Asirieli, kei Selemaia na luve i Apitieli, me ra tauri Baruki na vunivola kei Jeremaia na parofita. Ia sa vunitaki rau ko Jiova.

Sa Volai Tale e Dua nai Vola Vivigi

27Sa qai yaco vei Jeremaia na vosa i Jiova, ni sa vakama oti na tui nai vola vivigi kei na vosa i Jeremaia sa vola ko Baruki, ka vaka,

28“Mo qai taura tale e dua tale nai vola vivigi, ka vola kina na vosa kecega ka tu e nai vola vivigi eliu, oqori ka vakama ko Jioiakimi na tui Juta.

29Ia mo kaya vei Jioiakimi na tui Juta, ‘Sa kaya vakaoqo ko Jiova; Ko iko, ko sa vakama nai vola oqo, ka taroga, “A cava ko sa vola kina, ka vaka, Ena lako vakaidina mai ko tui Papiloni ka na vakarusa na vanua oqo, ka vakaotia tani mai kina na tamata kei na manumanu?”

30O koya oqo sa kaya kina ko Jiova e na vuku i Jioiakimi na tui Juta: Ena sega e dua mai vua me tiko e nai tikotiko vakaturaga i Tevita, ia na yagona ka mate ena biu tu ga ki na katakata e na siga, kei na tegu cevata e na bogi.

31Ia ka'u na sauma vua vei ira talega na nona kawa kei ira na nona tamata na nodra i valavala ca; ia ka'u na vakayacora vei ira, kei ira na lewe i Jerusalemi, kei ira na Juta, na ca kecega ka'u sa cavuta vei ira—ia era sa sega ga ni vakarorogo.’ ”

32Ia sa taura e dua tale nai vola vivigi ko Jeremaia, ka solia vei Baruki na vunivola, na luve i Neraia, ka sa vola kina ko koya mai na gusu i Jeremaia na vosa kecega ni vola sa vakama ko Jioiakimi na tui Juta e na bukawaqa. A sa vakaikuritaki e na vosa e vuqa sa vaka talega kina.