Dauveilewai 19 - Ai Vola Tabu (Vakadewa Makawa Vakavoutaki 2021)（FRV21）

Na Turaga Kawa i Livai kei na Watina Lailai

1Ia e na gauna ko ya, ni sa sega na tui vei ira na Isireli, sa dua vei ira na yavusa i Livai sa tiko vulagi e na dua na yasa ni vanua veiulunivanua ko Ifereimi, a sa kauta e dua na yalewa mai Peceliema e Juta me watina lailai.

2A sa cala na watina lailai ni sa dautagane, ka sa lako tani vua ki na vale nei tamana mai Peceliema e Juta, ka sa tiko kina ka vula va.

3A sa qai cavu tu na watina, ka muri koya me vosa vakayalovinaka vua, ka me kauti koya tale mai. A sa lako kaya e dua na nona cauravou, ka rua na asa. A sa kauti koya na yalewa ki na vale nei tamana. Ia ni sa raici koya na tama ni yalewa, sa reki ni sa tavaki koya.

4Ia na vugona, na tama ni yalewa, sa cikevi koya me tiko; a sa tiko kaya ka bogi tolu. A ratou sa kana ka gunu, ka moce kina.

5Ia e nai kava ni siga eratou sa sou e na mataka, a sa ia ko koya me lako; ia sa kaya na tama ni yalewa vei koya na vugona, “Mo vakaukauwataki iko mada e na dua na tiki ni madrai, ia e muri dou qai lako.”

6A rau sa tiko sobu, ka kana ka gunu vata. A sa qai kaya vua na tama ni yalewa, “Mo yalovinaka mo tiko tale mada e na bogi oqo, ka me marau na yalomu.”

7Ia ni sa cavu tu na tamata me lako, sa cikevi koya ko vugona, me yacova ni sa moce tale e na bogi ko ya.

8A sa sou e na mataka ko koya e nai kalima ni siga, me lako. A sa kaya na tama ni yalewa, “Me vakacegu mada na lomamu.” A rau sa vakaberabera, ka sa yakavi mai, ka rau sa kana vata ruarua.

9Ia ni sa ia me lako na tamata, kei na watina lailai, kei na nona cauravou, sa kaya vua na vugona, na tama ni yalewa, “Raica, sa qai yakavi mai; mo dou tiko mada ka moce. Raica, sa bogi na vanua, mo moce eke, ka me marau na yalomu. Ia mo dou qai sou e na mataka ka lako ki na nomu vale.”

10Ia sa sega ni via tiko tale na Livai. A sa ia ka lako yani, ka la'ki donui Jepusa, (ko ya ko Jerusalemi). A sa tu vua e rua na asa sa vakavodoki tu, sa lako vata kaya talega na watina lailai.

11Ni ratou sa voleka ki Jepusa, sa la'ki dromu na siga, ka sa kaya vua na nona turaga na tamata, “Tou mai lako ki na nodra koro oqo na Jepusaiti, ka moce kina.”

12A sa kaya vei koya na nona turaga, “Edatou na sega ni gole ki na nodra koro na kai tani, era sa sega ni Isireli; ia edatou na lako ga ki Kipea.”

13A sa kaya ko koya vua na nona tamata, “Me datou lako voleka ki na dua na koro oqo, me moce kina, ko Kipea, se ko Rama.”

14A ratou sa lako tu; ka sa dromu na siga ni ratou sa voleka ki Kipea, ko ya sa nei Penijamini.

15A ratou sa gole kina, me la'ki moce e Kipea. Ia ni sa yaco kina ko koya, sa tiko sobu e na sala ni koro, ni sa sega e dua na tamata sa kauti iratou ki vale me ra moce kina.

16Ka raica, sa dua na tamata qase sa tale mai e na yakavi mai na nona cakacaka e na were, a tamata mai na vanua veiulunivanua ko Ifereimi, ka sa tiko vulagi mai Kipea. (Era sa yavusa i Penijamini na lewe ni koro ko ya.)

17Ia ni sa ta cake na qase ko ya ka sa kunea na tamata vulagi sa tiko e na sala ni koro, a sa kaya na qase, “Ko sa lako mai vei? Ia ko sa lako kivei?”

18A sa kaya vua ko koya, “Keitou sa lako tiko mai Peceliema e Juta, me lako ki na yasa ni vanua veiulunivanua ko Ifereimi, oqori ka'u sa lako mai kina. Ia ka'u a lako ki Peceliema e Juta, ia ka'u sa lako tu ki na vale i Jiova, ia sa sega na tamata sa kauti au ki vale.

19Ia sa tu ga na co kei na kedrau na neirau asa, kei na madrai kei na waini me rauti keitou kei na watiqu, kei na cauravou, o koya sa tiko kei keirau na nomu tamata. Sa sega ni yali e dua na ka.”

20A sa kaya na qase, “Mo vakacegu. Sa noqu i tavi ga na ka e rauti kemudou. Ia mo kakua ga ni moce e na sala ni koro.”

21A sa kauti koya ki na nona vale, ka sa vakania na asa. A ratou sa vuya na yavadratou, ka ra kana ka gunu.

Na Cala nei Kipea

22 Vteki 19.5-8 Ia ni ratou sa marau tiko, raica, ko ira na lewe ni koro eso, era luve ni ca, era sa tu wavolita na vale, ka tukia nai sogo ni katuba, ka vosa vua na qase, nai taukei ni vale, ka kaya, “Mo kauta mai ki tautuba na tamata ka curu ki na nomu vale, me keitou veimoceri kaya.”

23A sa curu yani vei ira ko koya nai taukei ni vale, ka kaya vei ira, “Na wekaqu, mo dou kakua ni cakava na ka ca oqo; ni sa lako mai ki na noqu vale na tamata oqo, dou kakua ni cakava na ka lialia oqo.

24Raica, sa tiko na luvequ, sa goneyalewa tabu-tagane, kei na watina lailai na tamata oqo. Au na kauti rau mai oqo ki tautuba, ia dou moceri rau, ka cakava vei rau na ka dou vinakata; ia dou kakua ga ni kitaka vua na tamata oqo na ka lialia oqo.”

25Ia sa bese ni vakarorogo vua ko ira na tamata. A sa taura na watina lailai na tamata, ka kauta ki tautuba vei ira. A ra sa moceri koya, ka vakalolomataki koya vakaca e na bogi ka sigavaka. Ia ni sa kida na mataka, era sa laivi koya.

26A sa lako mai na yalewa e na mataka, ka bale sobu ki nai sogo ni katuba ni nona vale na tamata sa tiko kina na nona turaga, me yacova ni sa siga mai.

27A sa tucake e na mataka na nona turaga, ka dolava nai sogo ni vale, ka curu ki tautuba me lako e nona i lakolako, ka raica, sa bale koto na yalewa, na watina lailai, e na katuba ni vale, ka sa tabaka nai lago na ligana.

28A sa kaya vua ko koya, “Mo tucake, me datou lako.” Ia sa sega e dua sa vosa mai. Sa qai laveti koya cake ka tauca ki na asa, a sa ia na tamata, ka lako yani ki na nona vale.

291Samu 11.7Ia ni sa yaco ki na nona vale, sa taura nai sele, ka taura na watina lailai, ka musumusuka vata kei na suina, me tinikarua na tikina, ka vakauta ki na nodra i yalayala kecega na Isireli.

30Ia sa kaya ko ira kecega era kunea, “Sa sega e dua na ka vakaoqo sa caka se kune mai na siga era sa lako cake kina na Isireli mai na vanua ko Ijipita, ka yacova na siga oqo; dou vakasamataka mada, ka dou bosea, ka vosa kina.”