Esera 6 - Ai Vola Tabu (Vakadewa Makawa Vakavoutaki 2021)（FRV21）

Sa Kunei nai Vakaro i Sairusi na Tui Perisia

1Sa qai cakava e dua nai vakaro ko Taraiasi na tui, ka sa yaco e dua na vakasaqaqara e na valenivola sa maroroi tu kina na ka talei mai Papiloni.

2A sa kune e dua nai vola vivigi mai Akimeca, na koro-turaga ni yasana ko Mitia, ka sa volai kina: “Ai tukutuku maroroi.

3E nai matai ni yabaki i Sairusi na tui, sa vakarota vakaoqo ko Sairusi na tui e na vuku ni vale ni Kalou mai Jerusalemi: Me tara na vale oqori, na yasana ka vakacabori kina nai soro, ia me viritaki me kaukauwa na kena yavu. A kena cecere me onosagavulu na kiupiti, na kena raraba me onosagavulu na kiupiti,

4me tolu na yatu vatu lelevu, ka dua na yatu kau vou. Ia me soli na kenai voli mai na vale-ni-tui.

5Ia me vakasukai tale nai yaya koula kei na siliva ni vale ni Kalou ka kauta ko Nepukanesa mai na vale mai Jerusalemi, ka kauta ki Papiloni; ia me kau tale ki na vale ni Kalou mai Jerusalemi, ki na kena yasana yadua, ka me viritu e na vale ni Kalou.”

Sa Vakarota ko Taraiasi me Tomani na Cakacaka

6“Ia, ko iko Tatinai, na kovana mai tai kadua, kei Sicari-posinai, kei ira na nomudrau i tokani na Efasakaiti, mai tai kadua ni uciwai, dou vakatikitiki tani.

7Mo dou laiva mada na cakacaka ni vale ni Kalou oqo; me ra tara ga na vale ni Kalou oqo e na kena vanua, na nodra kovana na Jiu, kei ira na nodra qase na Jiu.

8Au sa vakarota talega na ka mo dou cakava vei ira na nodra qase na Jiu, me tara kina na vale ni Kalou oqo: ka me soli nai voli vei ira na tamata oqo mai na nona i yau na tui, io mai na vakacavacava mai tai kadua, me ra kakua ni tarovi.

9Kei na ka era sa dravudravua kina, na luve ni bulumakau eso, kei na sipi tagane eso, kei na lami eso, mei soro kama vua na Kalou kei lomalagi, na witi, na masima, na waini, kei na waiwai, me vaka na ka era lesia na bete era tiko mai Jerusalemi, me soli vei ira e na veisiga, me soli tikoga,

10me ra vakacabora nai soro e boi vinaka vua na Kalou ni lomalagi, ka masulaka me bula na tui, kei iratou na luvena.

11Au sa vakarota talega, e na vukuna e dua sa vakatanitaka na vosa oqo, me taurivaki na kau ni nona vale, ka vakaduri cake, me qai vakalilici kina ko koya; ia mei sovasova ni benu na nona vale e na vuku ni ka oqo.

12Ia na Kalou, ko koya sa vakatikora mai kea na yacana, me vakarusai ira kecega na tui kei ira na tamata, era dodoka na ligadra me vakatanitaka ka vakarusa na vale ni Kalou oqo mai Jerusalemi. Oi au ko Taraiasi, au sa vakarota; me caka vakusakusa sara.”

Na Vakacavari kei na Vakatabui ni Valenisoro

13Ia ko Tatinai, na kovana e na tai ni uciwai oqo, kei Sicari-posinai, kei ira na nodrau i tokani, era sa kitaka vakusakusa na ka e talaki kina ko Taraiasi na tui.

14Akeai 1.1; Saka 1.1A ra sa tara ko ira na nodra qase na Jiu, ka cakacaka yaco, ni sa parofisai ko Akeai na parofita, kei Sakaraia na luve i Ito. A ra sa tara tiko, ka vakaotia, me vaka nai vakaro ni nodra Kalou na Isireli, ka vaka nai vakaro i Sairusi, kei Taraiasi, kei Atakisekise na tui Perisia.

15A sa caka vakaoti na vale oqo e nai katolu ni siga ni vula ko Eta, e nai kaono ni yabaki ni lewa i Taraiasi na tui.

16A ra sa ia na solevu ni curu vale ni Kalou oqo e na marau, ko ira na Isireli, ko ira na bete, kei ira na Livai, kei na kedra vo era vakabobulataki,

17a ra sa vakacabora, ni sa curumi na vale ni Kalou oqo, e dua na drau na bulumakau, e rua na drau na sipi tagane, e va na drau na lami; kei nai soro ni valavala ca e na vukudra kecega na Isireli, e tinikarua na me tagane, me vaka nai wiliwili ni nodra yavusa na Isireli.

18A ra sa lesia na bete e na kedrai wasewase, kei ira na Livai e na nodra i tavi, ki na cakacaka vua na Kalou, mai Jerusalemi; me vaka sa volai e nai vola i Mosese.

Na Solevu ni Lako-sivia

19 Lako 12.1-20 A ra sa ia na solevu ni Lako-sivia ko ira ka vakabobulataki e nai katinikava ni siga ni matai ni vula.

20Ni ra sa vakasavasavataki vata ko ira na bete kei ira na Livai, era sa savasava kecega, ka ra vakamatea na lami ni Lako-sivia e na vukudra kece era a vakabobulataki, e na vukudra talega na wekadra na bete, e na vukudra talega.

21A ra sa kania ko ira na Isireli era sa lako tale mai na veivakabobulataki, kei ira kece era tawasei ira mai na nodra dukadukali na lewe-ni-vanua, me ra qarai Jiova na nodra Kalou na Isireli.

22A ra sa soqoni vata e na marau ka kana madrai sa sega ni vakaleveni, ka bogi vitu; ni sa vakamarautaki ira ko Jiova, ka sa vagolea na lomana na tui Asiria vei ira, me vakaukauwataka na ligadra e na cakacaka ni vale ni Kalou, na nodra Kalou na Isireli.