Jeremaia 29 - Ai Vola Tabu (Vakadewa Makawa Vakavoutaki 2021)（FRV21）

Nai Vola i Jeremaia vei Ira era Tiko Vakabobula mai Papiloni

1 2Tui 24.12-16; 2Vei 36.10 Ia oqo na vosa ni vola sa vakauta mai Jerusalemi ko Jeremaia na parofita vei ira na kena vo ni qase era sa kau tani vakabobula, vei ira talega na bete, kei na parofita, kei na tamata kece sa kauta vakabobula mai Jerusalemi ki Papiloni ko Nepukanesa;

2(ni ra sa lako tani oti mai Jerusalemi ko Jekonaia na tui, kei koya na ranadi, kei ira na mata, kei na turaga ni Juta kei Jerusalemi, kei ira na matai ni kaukamea kei ira na matai tani;)

3ka sa kauta ko Elasa na luve i Savani, kei Kimaraia na luve i Ilikaia, (koi rau ka tala ko Setekaia na tui Juta ki Papiloni vei Nepukanesa na tui Papiloni,) ka sa vaka ne:

4“Sa kaya vakaoqo ko Jiova-ni-lewevuqa, na Kalou ni Isireli, vei ira kecega era vakabobulataki, ko ira ka'u a lewa me ra kau tani mai Jerusalemi ki Papiloni:

5Dou tara vale, ka tiko kina; dou tea na were ka kania na vuana.

6Dou vakawati, mo dou vakatubura na gonetagane kei na goneyalewa, ka kauta na yalewa eso me watidra na luvemudou tagane, ia na luvemudou yalewa dou musuka vei ira na tagane me watidra, me ra vakasucuma na luvedra tagane kei na luvedra yalewa; mo dou lewe vuqa mai kea, ka sega ni lewe lailai.

7Ia dou gumatua me sautu na koro ka'u a lewa mo dou kau vakabobula kina, ka masulaka vei Jiova, ni sa sautu ko ya, dou na sautu talega.

8Ni sa kaya vakaoqo ko Jiova-ni-lewevuqa, na Kalou ni Isireli; Me ra kakua ni vakacalai kemudou ko ira na nomudou parofita kei na nomudou rairai, era tiko e na kemudou maliwa, dou kakua talega ni rogoca na nomudou tadra dou sa cakava me tadrataki.

9Ni sa ka lasu na ka era sa parofisaitaka vei kemudou e na yacaqu; au sa sega ni talai ira, sa kaya ko Jiova.

10 2Vei 36.21; Jere 25.11; Tani 9.2 “Ni sa kaya ko Jiova, Me oti mada e vitusagavulu na yabaki mai Papiloni ka'u na qai talevi kemudou, ka vakayacora vei kemudou na noqu vosa vinaka, ni'u sa vakalesui kemudou tale mai ki na yasana oqo.

11Ni'u sa kila koi au na nanuma ni yaloqu e na vukumudou, sa kaya ko Jiova, na nanuma mo dou vinaka, ka sega ni ca, ka me'u solia vei kemudou nai nuinui vinaka ni gauna e muri.

12Dou na qai tagi kivei au, ka la'ki masu vei au, ia ka'u na rogoci kemudou.

13Vrua 4.29Ia dou na golevi au, ka kunei au, ni dou sa golevi au sara mai na vu ni lomamudou.

14Dou na qai kunei au, sa kaya ko Jiova, ia ka'u na vakalesui kemudou mai na nomudou veivakabobulataki, ka vakasoqoni kemudou mai na veivanua kecega, kei na veiyasana kecega ka'u sa vakasevi kemudou kina, sa kaya ko Jiova, ia ka'u na kauti kemudou tale mai ki na yasana ka'u a lewa mo dou kau tani mai kina.

15“Ni dou sa kaya, ‘Sa vakatubura vei keimami ko Jiova eso na parofita mai Papiloni,’—

16O koya oqo sa kaya ko Jiova e na vuku ni tui sa tiko e nai tikotiko i Tevita, e na vukudra kece talega na tamata era tiko e na koro oqo, kei na wekamudou era sa sega ni lako tani vata kei kemudou:

17‘Sa kaya ko Jiova-ni-lewevuqa, Raica, au na vakayacora vei ira nai seleiwau, kei na viakana, kei na mate dauveiveitauvi, ka vakayacori ira me ra vaka na vua ni lolo vuca sa sega ni laukana rawa, ni sa ca.

18Ia ka'u na vakacacani ira e nai seleiwau, kei na viakana, kei na mate dauveiveitauvi, ka soli ira me ra kau tani ki na veimatanitu e vuravura; me ra vosavosacati, ka vakurabuitaki, ka vakasiusiutaki, ka vakalialiai, e na veivanua kecega ka'u sa dui vakasevi ira kina,

19ka ni ra sa sega ni rogoca na noqu vosa, sa kaya ko Jiova, o koya ka'u sa talai ira na noqu tamata na parofita me ra tukuna, ka'u sa sou e na mataka ka tala, ia dou a sega ni vakarogoca, sa kaya ko Jiova.’

20Ia dou rogoca mada kina na vosa i Jiova, koi kemudou kece sa vakabobulataki, ka'u sa vakatala tani mai Jerusalemi ki Papiloni:

21‘Sa kaya vakaoqo ko Jiova-ni-lewevuqa, na Kalou ni Isireli, e vuku i Eapi na luve i Kolaia, kei Setekaia na luve i Meesea, erau sa parofisaitaka na lasu vei kemudou e na yacaqu: Raica, au na soli rau ki na liga i Nepukanesa na tui Papiloni; ena vakamatei rau ko koya e na matamudou,

22ia ko ira kece na Juta era vakabobulataki mai Papiloni, era na vatonaki rau, ka vaka, “Me vakayacori iko ko Jiova mo tautauvata kei Setekaia ka tautauvata kei Eapi, sa vakamai rau ko tui Papiloni e na bukawaqa,”

23baleta ni rau sa cakava na ka ca sara e Isireli ka sa veibutakoci kei na watidra na kai nodrau, ka sa cavuta talega e na yacaqu na vosa lasu ka'u a sega ni vakarota vei rau. Koi au ga ka'u sa kila, ka kenai vakadinadina, sa kaya ko Jiova.’ ”

Nai Vola i Semaia

24Ia mo kaya talega vei Semaia na Niilamaiti, ka vaka,

25“Sa kaya vakaoqo ko Jiova-ni-lewevuqa, na Kalou ni Isireli, ka vaka, Ko iko, ni ko sa vakauta e na yacamu ga nai vola vei ira kece na tamata mai Jerusalemi, vei Sefanaia talega na luve i Meesea na bete, kei ira kecega na bete, ka kaya,

26‘Sa lesi iko ko Jiova mo bete me sosomi i Jioiata na bete, mo dou ovisa e na vale i Jiova, e na vuku ni tamata yadua sa curumi, ka viavia parofita, mo vakacurumi koya ki na valeniveivesu, kei nai vesu kau.

27Ia ka cava ko sa sega kina ni vunauci Jeremaia na kai Anacoci, sa viavia parofita vei kemudou?

28Ni sa ka ga ko ya sa talaki kina ko koya vei keimami ki Papiloni, ka kaya, “Sa na dede na tiko vakabobula oqo; dou tara vale, ka tiko kina, ka tea na were, ka kania na vuana.” ’ ”

29A sa wilika ko Sefanaia na bete nai vola oqo kivei Jeremaia na parofita.

30Sa qai yaco na vosa i Jiova vei Jeremaia, ka vaka:

31“Mo talaki vei ira kece sa vakabobulataki, ka kaya, ‘Sa kaya vakaoqo ko Jiova e na vuku i Semaia na Niilamaiti: Ni sa ia na parofisai vei kemudou ko Semaia, ia koi au ka'u sa sega ni talai koya, ka sa vuna ni dou vakaraviti kemudou ki na ka lasu ga,

32o koya oqo sa kaya kina vakaoqo ko Jiova: Raica, au na cudruvi Semaia na Niilamaiti, kei ira na nona kawa. Ena sega e dua na tagane mai vua me tiko kei ira na tamata oqo, ena sega talega ni raica na ka vinaka ka'u na cakava vei ira na noqu tamata, sa kaya ko Jiova, ni sa vakatavulica na vuki tani mai vei Jiova.’ ”