Same 149 - Ai Vola Tabu (Vakadewa Makawa Vakavoutaki 2021)（FRV21）

Na Vakacaucau me Baleta na Vinaka ni Kalou vei Isireli

1Dou ia vei Jiova na vakavinavinaka!

Dou seretaka vei Jiova na sere vou,

kei na vakavinavinaka vua e na nodra i soqosoqo na tamata yalosavasava.

2Ko ira na Isireli, me ra rekitaki koya sa buli ira;

na luve i Saioni me ra rekitaka na nodra Tui.

3Me ra vakavinavinaka ki na yacana e na meke,

me ra sere vua ka qiria na tibereli kei na api.

4Ni sa vinakati ira na nona tamata ko Jiova;

ena vakaiukuukutaki ira na yalomalumalumu e na bula.

5Me ra reki vakalevu ko ira na yalosavasava;

me ra sere vakadomoilevu e na nodra i mocemoce.

6Me sere vakaidina vua na Kalou na gusudra,

ka me taura nai seleiwau batirua na ligadra,

7me cudruvi ira na veimatanitu,

ka totogitaki ira na lewe ni veivanua;

8me vesuki ira na nodra tui e na sinucodo,

kei na nodra turaga e nai vesu kaukamea,

9me vakayacora vei ira na lewa sa volai.

Era sa dokai vakaoqo ko ira na nona tamata yalosavasava kecega.

Dou ia vei Jiova na vakavinavinaka!