Vakatekivu 47 - Ai Vola Tabu (Vakadewa Makawa Vakavoutaki 2021)（FRV21）

Vakatikori mai Koseni na Vuvale i Jekope

1A sa lako ko Josefa ka tukuna vei Fero, ka kaya, “Ko tamaqu kei iratou na tuakaqu, kei na nodra qele ni sipi, kei na nodra qele ni bulumakau, kei na nodra ka kecega, sa lako mai na vanua ko Kenani; ka ra sa tiko mai na vanua ko Koseni.”

2A sa kauta e lewe lima vei iratou na tuakana, me ratou tu e na mata i Fero.

3A sa kaya ko Fero vei iratou na veitacini, “A cava dou sa daukitaka?” A ratou sa kaya vei Fero, “A nomuni tamata sa dauvakana sipi, koi keitou, ko ira talega na neitou qase.”

4Eratou sa kaya talega vei Fero, “Keitou sa lako mai me keitou tiko vulagi e na vanua oqo; ni sa sega na kedra na neitou sipi na nomuni tamata ni sa ka levu sara na dausiga e na vanua ko Kenani. Ia keitou sa kerekere kina vei kemuni me keitou tiko mada na nomuni tamata e na vanua ko Koseni.”

5A sa qai kaya vei Josefa ko Fero, “Sa lako mai vei iko ko tamamu kei iratou na tuakamu.

6Sa tiko e matamu na vanua ko Ijipita. E na vanua vinaka mo vakatikora kina na tamamu kei na veitacini. Me ra tiko e na yasana ko Koseni, ia kevaka ko sa kila eso vei ira era tamata gugumatua, mo qai lesi iratou me ratou lewa na noqu manumanu.”

7A sa qai kauti Jekope na tamana ko Josefa, me tu e na mata i Fero, ka sa vosavakalougatataki Fero ko Jekope.

8A sa kaya vei Jekope ko Fero, “E vica na yabaki ni nomu bula?”

9A sa kaya vei Fero ko Jekope, “Na yabaki ni noqu veitokiyaki voli sa dua na drau ka tolusagavulu na yabaki; sa vica ga ka ca vakalevu na veiyabaki oqori ni noqu bula. Sa sega ni tautauvata kei na nodra yabaki ni bula na noqu qase e na gauna ni nodra veitokiyaki.”

10A sa qai vosavakalougatataki Fero ko Jekope, ka lako tani mai na mata i Fero.

11Ia sa vakatikora na tamana kei na veitacini ko Josefa, ka solia vei ira e dua nai votavota e na vanua ko Ijipita, io e na vanua ka vinaka cake, e na yasana ko Ramisese, me vaka sa vakarota ko Fero.

12A sa vakania na tamana kei na veitacini, kei na vuvale kecega i tamana ko Josefa e na kakana me rauta na nodra vuvale yadua.

Ko Josefa kei na Dausiga e Ijipita

13A sa sega na kakana e na vanua taucoko ko ya, ni sa ka levu sara na dausiga. A sa malumalumu e na viakana na vanua ko Ijipita kei na vanua ko Kenani e na vuku ni dausiga.

14A sa kumuna vata ko Josefa nai lavo kecega sa kune e na vanua ko Ijipita kei na vanua ko Kenani, me kenai sau ni sila era volia; ka sa kauta nai lavo ko Josefa ki na vale i Fero.

15Ia ni sa oti nai lavo e na vanua ko Ijipita kei na vanua ko Kenani, era sa qai lako kecega mai vei Josefa na kai Ijipita, ka ra kaya, “Mo ni solia mada vei keimami na kakana! A cava me keimami mate kina e matamuni? Ni sa qai oti na neimami i lavo.”

16A sa kaya ko Josefa, “Dou solia mai vei au na nomudou manumanu, ka'u na solia vei kemudou na kakana mei sau ni nomudou manumanu, ke sa oti na nomudou i lavo.”

17A ra sa kauta mai kina vei Josefa na nodra manumanu; a sa solia vei ira na kakana ko Josefa mei voli ni ose, kei na qele ni sipi, kei na qele ni bulumakau, kei na asa. A sa vakani ira e na kakana e na yabaki ko ya me kenai voli ni nodra manumanu kecega.

18Ia ni sa oti na yabaki ko ya, era sa lako tale mai vei koya e na yabaki ka tarava, ka ra sa kaya vua, “Keimami na sega ni vunia vua na neimami turaga ni sa oti vakadua na neimami lavo; ka sa nona na neimami turaga na neimami qele ni manumanu. Sa sega tale na ka sa vo e mata ni neimami turaga, a yagoi keimami ga kei na neimami vanua.

19Me keimami mate beka li e matamuni, koi keimami kei na neimami vanua? Mo ni voli keimami mada vata kei na neimami vanua e na kakana. Keimami na qai nona bobula ko Fero, ena nona talega na neimami vanua; ia mo ni solia vei keimami nai tei ni sila me keimami tea, me keimami bula kina ka sega ni mate, ka me kakua ni lala tu na vanua.”

20A sa volia ko Josefa na vanua taucoko ko Ijipita me nei Fero. A ra sa volitaka na kai Ijipita na nodra dui were, ni sa ka levu tiko vei ira na dausiga; ka sa qai nei Fero na vanua.

21Ia ko ira na tamata, sa vakayacori ira me ra bobula mai nai yalayala kei Ijipita e dua ka yacova na yasana kadua.

22A nodra vanua ga na bete sa sega ni volia ko koya; ni sa vota ko Fero e dua na kedrai votavota na bete, ka ra sa bula voli e nai votavota ka vota vei ira ko Fero; o koya era sega ni volitaka kina na nodra vanua.

23Sa qai kaya vei ira na tamata ko Josefa, “Raica, me vaka ni'u sa voli kemudou edaidai kei na nomudou vanua me nei Fero, sa tu oqo nai tei ni sila me nomudou; mo dou la'ki teivaka ki na qele.

24Ia ni sa gauna ni tatamusuki, mo dou na solia e dua-nai-kalima vei Fero; ka me nomudou e va-nai-kalima, ka oqori me nomudou itei ki na were, ka me kemudou kakana kei na kedra na nomudou lewe ni veivale, kei na kedra talega na nomudou lalai.”

25A ra sa kaya, “Ko ni sa qai vakabulai keimami; ka mo ni lomavinaka kina na neimami turaga, ni keimami na qai bobula i Fero.”

26A sa vakatura oqo ko Josefa me kenai lesilesi tiko e na vanua ko Ijipita, ka yacova na gauna oqo, ka me nei Fero e dua-nai-kalima. Ia na nodra vanua duaduaga na bete sa sega ni yaco me nei Fero.

Otioti ni Kerekere nei Jekope

27A sa tiko ko Isireli e na vanua ko Ijipita, e na yasana ko Koseni; a ra sai taukei kina, ka ra tubu, ka lewe vuqa sara mai.

28A sa bula ko Jekope ka yabaki tinikavitu e na vanua ko Ijipita; ia na yabaki kecega sa bula kina ko Jekope sa dua na drau ka vasagavulu ka vitu na yabaki.

29 Vteki 49.29-32; 50.6 Ni sa toro mai na gauna me mate kina ko Isireli, a sa kacivi Josefa na luvena ka sa kaya vua, “Kevaka ka'u sa kune loloma e matamu, mo daramaka mada na ligamu ki ruku ni sagaqu, ka yalataka mo cakacaka vakayalololoma ka vakayalodina vei au. Mo kakua ni buluti au e Ijipita.

30Ia ni'u sa moce vata kei ira na noqu qase, mo kauti au tani mai Ijipita ka la'ki buluti au e na nodra i bulubulu.” A sa kaya ko koya, “Au na cakava me vaka na nomu vosa.”

31A sa kaya ko koya, “Mo bubului kina vei au”; ka sa bubului kina vua. A sa qai cuva ko Isireli e na ulu ni nonai mocemoce.