1 Samuela 23 - Ai Vola Tabu (Vakadewa Makawa Vakavoutaki 2021)（FRV21）

Sa Vakabula na Koro ko Keila ko Tevita

1A sa tukuni vei Tevita, ka vaka, “Raica, era sa la'ki kabai Keila ko ira na kai Filisitia, a ra sa butakoca na veirara ni samu sila.”

2A sa tarogi Jiova ko Tevita, ka kaya, “Me'u la'ki mokuti ira na kai Filisitia oqo, se me'u kakua?” A sa kaya vei Tevita ko Jiova, “Lako ka la'ki mokuti ira na kai Filisitia, ka vakabulai Keila.”

3Ia era sa kaya ko ira na tamata nei Tevita vei koya, “Raica, keitou sa rere na tiko oqo e Juta. Ia sa na qai levu cake sara kevaka keitou na lako ki Keila ki na nodra veimataivalu na kai Filisitia.”

4Sa qai tarogi Jiova tale ko Tevita. Ka sa vosa vua ko Jiova, “Mo cavu tu, mo lako sobu ki Keila; ni'u na soli ira na kai Filisitia ki na ligamu.”

5A sa lako ko Tevita kei ira na nona tamata ki Keila, ka veivala kei ira na kai Filisitia, ka kovea na nodra manumanu, ka mokuti ira e na moku levu. A sa vakabulai ira na kai Keila ko Tevita.

6Ia ni sa dro ko Epaiaca na luve i Eiimeleki kivei Tevita ki Keila, sa lako sobu ko koya, ka kauta e ligana e dua na efoti.

7A sa tukuni vei Saula ni sa lako mai ki Keila ko Tevita. Sa qai kaya ko Saula, “Sa soli koya na Kalou ki na ligaqu; ni sa sogolati koya ki loma, ni sa curu ki na dua na koro sa vakaisogo ka vakalawalawa kaukamea.”

8Ka sa kacivi ira na tamata kecega ko Saula me ia nai valu, ka me ra lako sobu ki Keila me buku na druadrua ni koro vei Tevita kei ira na nona tamata.

9Ia ni sa kila ko Tevita ni sa nakita tiko na ka ca vua ko Saula, a sa kaya vei Epaiaca na bete ko koya, “Mo kauta mada mai eke na efoti.”

10Sa qai kaya ko Tevita, “I Jiova na Kalou i Isireli, sa rogoca vakavinaka na nomuni tamata ni sa nakita tiko ko Saula me lako mai ki Keila, me vakarusa na koro e na vukuqu.

11Era na soli au yani na kai Keila ki na ligana, se segai? Ena lako sobu mai ko Saula, me vaka ka'u sa rogoca na nomuni tamata, se segai? I Jiova na Kalou i Isireli, mo ni tukuna mada vei au na nomuni tamata.” A sa kaya ko Jiova, “Ena lako sobu mai ko koya.”

12A sa kaya ko Tevita, “Era na soli au yani, kei ira na noqu tamata, ki na liga i Saula, ko ira na kai Keila, se segai?” A sa kaya ko Jiova, “Era na soli kemudou yani.”

13Sa qai cavu tu ko Tevita, kei ira na nona tamata, era sa le ono beka na drau, ka lako tani mai Keila, ka lako tu e na yasana era sa lako rawa kina. Ni sa tukuni yani vei Saula ni sa dro ko Tevita mai Keila, a sa sega tale ni qai lako yani.

14A sa tiko mai na vanua lala ko Tevita e na veitikina kaukauwa, e na vanua veiulunivanua e na vanua lala mai Sifi. A sa qarai koya e na veisiga kecega ko Saula, ia na Kalou sa sega ni soli koya ki na ligana.

Vunitaki Saula ko Tevita e na Veikau mai Sifi

15A sa raica ko Tevita ni sa lako voli yani ko Saula me qarai koya me mate. A sa tiko ko Tevita mai Oresi, e na vanua lala mai Sifi.

16A sa cavu tu ko Jonacani na luve i Saula, ka lako yani vei Tevita ki Oresi, ka vakaukauwataki koya e na vuku ni Kalou.

17A sa kaya vua ko koya, “Mo kakua ni rere, ni na sega ni rawai iko na liga i Saula na tamaqu. Ia ko na nodra tui na Isireli, ka'u na taravi iko koi au. Sa kila talega oqori ko Saula na tamaqu.”

181Samu 18.3A rau sa ia na veiyalayalati e na mata i Jiova. A sa tiko ga ko Tevita e na vanua ko Oresi, ka sa lako yani ko Jonacani ki na nona vale.

19 Same 54 Era sa qai lako cake mai na kai Sifi kivei Saula ki Kipea, ka ra sa kaya, “Sa sega li ni vunitaki koya tiko ko Tevita e na keda maliwa mai na veitikina kaukauwa e Oresi, e na vanua cecere ko Ekila, ka sa no vaka ki na ceva kei Jesimoni?

20Ia oqo, mo ni lako sobu mada mai na tui, me vaka na gagadre ni yalomuni mo ni lako sobu; ia ena neitou i tavi me keitou soli koya yani ki na ligamuni na tui.”

21A sa kaya ko Saula, “Mo dou na vakalougatataki mai vei Jiova, ni dou sa lomani au.

22Dou lako mada yani, ka vakadeitaka tale mada. Mo dou kila ka raica na tikina sa dautiko kina, se ko cei sa raici koya mai kina, ni sa tukuni vei au ni sa dauivalavala vaqaseqase sara ko koya.

23Dou vakararai vinaka, ka kila na tikina vuni kecega sa vunitaki koya kina, mo dou qai lesu tale mai vei au ni dou sa kila na kena dina. Ia au na qai lako vata kei kemudou. Ka kevaka sa tiko e na vanua oqo, ka'u na qarai koya e na kedra maliwa na veiudolu kecega e Juta.”

24A ra sa ia, ka liu yani vei Saula ki Sifi.

Ia ko Tevita kei ira na nona tamata era sa tiko e na vanua lala mai Maoni, e na vanua veibuca vaka ki na ceva kei Jesimoni.

25A sa lako ko Saula kei ira na nona tamata, me qarai koya. Ni sa tukuni oqo vei Tevita, a sa lako sobu ko koya ki na uluvatu ka tiko e na vanua lala mai Maoni. Ia ni sa rogoca ko Saula, sa muri Tevita ki na vanua lala mai Maoni.

26A sa lako ko Saula e na yasa ni ulunivanua e dua, ia ko Tevita kei ira na nona tamata e na yasa ni ulunivanua ka dua. A sa vakatotolo ko Tevita me dro tani mai vei Saula, ni sa vakavolivoliti Tevita kei ira na nona tamata ko Saula vata kei ira na nona tamata, me ra vesuki ira.

27A sa qai lako mai vei Saula e dua na talai, ka kaya, “Mo ni kusarawa, ka lako mai; ni ra sa curuma vakaivalu na vanua na kai Filisitia.”

28A sa cegu ni muri Tevita ko Saula, ka lesu ka la'ki vala kei ira na kai Filisitia. O koya sa vakatokai kina na tikina ko ya ko Sela-amalikoci.

29A sa lako cake mai kea ko Tevita, ka la'ki tiko e na veitikina kaukauwa mai Eni-keti.