1Me vakacaucautaki ko Jiova na noqu kaukauwa,
o koya sa vakavulica na ligaqu me ia nai valu,
kei nai qaqalo ni ligaqu me vala;
2o koya sa lomani au, ka sa noqu i drodro;
na noqu vale ni valu cecere kei na noqu i vakabula;
a noqu i sasabai kei koya ka'u sa vakararavi kina;
o koya sa vakamalumalumutaki ira na noqu tamata vei au.
3 Jope 7.17,18; Same 8.4 I Jiova, a cava na tamata, mo ni kauwaitaki koya kina,
se na luve ni tamata, mo ni nanumi koya kina?
4Sa vaka na ka wale na tamata;
na nona gauna sa vaka na yaloyalo sa yali rawarawa.
5Mo ni vakalolovirataka na nomuni lomalagi, i Jiova, ka lako sobu mai;
mo ni tara na veiulunivanua, ena qai kubou yani.
6Mo ni vakacaudreva na livaliva, ka vakasevi ira;
vanataka na nomuni gasau, ka vakubutaki ira.
7Ni dodoka mai na ligamuni mai cake;
vueti au, ka vakabulai au mai na wai levu,
mai na ligadra na luve ni kai tani,
8o ira era sa dauvosa vakailasu e na gusudra,
ia na ligadra i matau na liga daulasulasu.
9Au na seretaka na sere vou vei kemuni na Kalou;
e na soliteri e tini na kena wa ka'u na sere vei kemuni.
10O koya ga sa solia vei ira na tui me ra gumatua,
o koya sa vakabulai Tevita na nona tamata mai nai seleiwau sa vakacaca.
11Ni sereki au, ka vakabulai au
mai na ligadra na kai tani,
o ira era sa dauvosa vakailasu na gusudra,
ka sa liga daulasu na ligadra i matau.
12Ia na neimami gonetagane
me ra vaka na kau ni ra sa tubu e na nodra cauravou;
kei na neimami goneyalewa
me ra vaka na vatu e na tutu ni vale sa solo me vatu ni vale vakaturaga.
13A neimami lololo,
me oso me kau rawa mai kina na kakana kecega sa duidui;
me luvei udolu na neimami sipi,
ia me udolu vakatini e na neimami vanua veico,
14ka me kaukauwa me cola i yaya na neimami bulumakau.
Me kakua na basu bai, kei na se,
ka me kakua na tagi e na neimami saqata ni koro.
15Sa kalougata na tamata era sa vakakina;
io, sa kalougata na tamata sa nodra Kalou ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
