Vakarua 26 - Ai Vola Tabu (Vakadewa Makawa Vakavoutaki 2021)（FRV21）

Nai Sevu kei na Katini

1“Ia ni ko ni sa lako mai ki na vanua sa solia vei kemuni ko Jiova na nomuni Kalou mei votavota, ka ko ni sa taukena, ka tiko kina,

2Lako 23.19mo ni qai kauta nai sevu ni vuata kecega ni vanua ko ni na kauta mai na nomuni vanua sa solia vei kemuni ko Jiova na nomuni Kalou, ka tawana ki na sova, ka lako ki na yasana sa digitaka ko Jiova na nomuni Kalou me vakatikora kina na yacana.

3Ia mo ni na lako vua ka bete e na gauna ko ya, ka kaya vua, ‘Au sa vakatusa e na siga oqo vei Jiova na nomuni Kalou, ni'u sa yaco mai ki na vanua sa bubului kina ko Jiova vei ira na noda qase me solia vei keda.’

4Me na qai taura na sova ko koya na bete mai na ligamuni, ka tauca e na mata ni cabocabo-ni-soro i Jiova na nomuni Kalou.

5“Ia mo ni na qai vosa e na mata i Jiova na nomuni Kalou, ka kaya, ‘A kai Arami sa dauveilakoyaki na tamaqu; a sa lako sobu ki Ijipita ko koya ka tiko vulagi kina, ka ra sa lewe lailai ga, ka sa tubu mai kea me dua na matanitu levu, sa kaukauwa, ka lewe vuqa.

6Ni ra sa vakacacani keimami ko ira na kai Ijipita, ka vakararawataki keimami, ka lesi keimami ki na cakacaka ni bobula sa dredre,

7keimami sa qai tagi vei Jiova na Kalou ni neimami qase, ka sa rogoca na domo i keimami ko Jiova, ka raica na neimami rarawa, kei na neimami cakacaka, kei na neimami vakasaurarataki.

8A sa kauti keimami tani mai Ijipita ko Jiova e na liga kaukauwa, kei na liga sa dodo yani, kei na ka rerevaki dina, kei nai vakatakilakila eso, kei na cakacaka mana eso.

9A sa kauti keimami mai ki na yasana oqo, ka sa solia vei keimami na vanua oqo, a vanua sa dave kina na sucu kei na oni.

10Ia oqo, kemuni Jiova, au sa kauta mai nai sevu ni vuata ni vanua ko ni sa solia mai vei au.’ Ia ko ni na tauca e na mata i Jiova na nomuni Kalou, ka lotu e na mata i Jiova na nomuni Kalou.

11Ia ko ni na rekitaka na ka vinaka kecega sa solia vei kemuni ko Jiova na nomuni Kalou, ka vei ira talega na nomuni lewe-ni-vuvale, koi kemuni, kei na Livai, kei na vulagi sa tiko kei kemuni.

12 Vrua 14.28,29 “Ni ko ni sa wasea oti nai katini ni nomuni vuata e nai katolu ni yabaki, na yabaki sa wase kina nai katini ni ka, ni qai solia vei ira na Livai, kei na vulagi, kei ira sa sega na tamadra, kei na yada, me ra kana e nomuni lomanibai, ka mamau,

13ka ko ni na qai kaya e na mata i Jiova na nomuni Kalou, ‘Au sa kauta mai vale na ka sa vakatabui, ka sa solia talega vei ira na Livai, kei na vulagi, vei ira sa sega na tamadra, kei na yada, me vaka na nomuni vakaro kecega ko ni sa vakarota vei au. Au sa sega ni vakacataka na nomuni vunau, au sa sega talega ni guilecava.

14Au sa sega ni kana kina ni'u sa tagi yaso, ka'u sa sega ni vakayagataka e na ka sa sega ni savasava, se'u vakacabora ki na mate. Au sa vakarorogo ki na vosa i Jiova na noqu Kalou. Au sa kitaka me vaka na ka kecega ko ni sa vakarota vei au.

15Mo ni rai sobu mai na nomuni tikotiko tabu, mai lomalagi, ka vakalougatataki ira na nomuni tamata na Isireli, kei na vanua ko ni sa solia vei keimami, me vaka ko ni a bubului kina vei ira na neimami qase—a vanua sa dave kina na sucu kei na oni.’

Na Tamata Digitaki ni Kalou

16“E na siga oqo sa vakaroti kemuni ko Jiova na nomuni Kalou mo ni cakava nai lesilesi kei na lewa oqo. Mo ni vakabauta kina ka cakava e na lomamuni taucoko, kei na yalomuni taucoko.

17O ni sa tukuni Jiova edaidai me nomuni Kalou, ka ko ni na lako e nona sala, ka me vakabauta na nona i lesilesi, kei na nona i vakaro, kei na nona lewa, ka vakarorogo ki na nona vosa.

18Lako 19.5; Vrua 4.20; 7.6; 14.2; Taito 2.14; 1Pita 2.9Ka sa tukuni kemuni edaidai ko Jiova mo ni nona matanitu talei, me vaka sa yalataka vei kemuni, ka mo ni vakabauta kina na nona i vakaro kecega;

19me laveti kemuni talega mo ni cecere vei ira na matanitu kecega sa cakava ko koya, ni ko ni sa vakavinavinakataki, ka sa rogo, ka sa vakarokorokotaki; ka mo ni matanitu tabu me nei Jiova na nomuni Kalou, me vaka na nona vosa.”