1Mo lewa vinaka na yavamu ni ko sa lako ki na vale ni Kalou, ia mo kusarawa mo vakarorogo, mo berabera ga ni vakacabora nai soro ni tamata lialia, ni ra sa sega ni nanuma era sa caka ca.
2Mo kakua ni totolo ni vosa, kakua talega ni vakariri na lomamu me vosa e na mata ni Kalou, ni sa tiko mai lomalagi na Kalou, ia ko iko e vuravura. O koya me lailai kina na nomu vosa.
3Ni sa vakavuna na tadra na ogaoga levu, kei na domo ni lialia sa kilai e na vosa e vuqa.
4 Same 66.13,14 Ni ko sa ia na bubului vua na Kalou, mo kakua ni berabera ni vakayacora, ni sa sega ni vinakati ira na lialia. Mo vakayacora na ka ko sa bubului kina.
5Sa vinaka mo kakua ni bubului, ka ca ni ko bubului ka sega ni vakayacora.
6Mo kakua ni solia na gusumu me vakacala na nomu bula, ka mo kakua talega ni kaya e matana na agilosi ni sa nomu vosa cala. A cava me cudru kina na Kalou e na vuku ni nomu vosa, ka vakarusa kina na cakacaka ni ligamu?
7Ni sa levu na tadra ka vuqa na vosa, sa vuqa talega na ka wale; ia mo rerevaka ga na Kalou.
8Kevaka ko sa kunea ni ra sa vakasaurarataki na dravudravua, ka sa kau vakatani ka vakaukauwa na lewa kei na caka dodonu e na dua na qali, kakua ni ko kidacala kina, ni sa vakaraica tiko ko koya sa cecere vei ira sa cecere sara; ia sa tiko ka cecere vei ira.
9Ia na vuata ni vanua sa nodra kece na tamata, ia sa rawa na kena na tui mai na veiwere.
10O koya sa lomana na siliva ena sega ni mamau e na siliva; se ko koya sa lomana nai yau e na kenai kuri. Oqo talega na ka wale.
11Ni sa levu mai na ka, era sa lewe levu mai era kania, ia ka cava na kena yaga vei ira na kenai taukei, ka me ra raica walega e na matadra?
12Sa vinaka na nona moce na tamata daucakacaka se kana vakalailai se kana vakalevu; ia na nona i yau levu na vutuniyau sa dredre kina vua me moce.
13Sa dua na ka ca sara ka'u sa kunea e ruku ni mata-ni-siga, io nai yau sa maroroi me nodra ga na kenai taukei ka ra sa ca kina,
14ka sa yali ga nai yau ko ya e na caka cala. Ia sa sucu mai e dua na luvena, ka sa sega na ka me tu vua.
15Jope 1.21; Same 49.17; 1Timo 6.7Me vaka sa curu luvawale mai na kete i tinana, ena lesu tale ka luvawale me vaka ni sa lako mai, ka sega na ka e rawa e na nona cakacaka me kauta kina, sa sega na ka me kauta yani e ligana.
16Ia oqo talega na ka ca sara, ni sa vaka dina na nona lako mai, ena vakakina na nona lako yani; ia ka cava na kena yaga vua ni sa cakacaka me nona na cagi?
17Sa kana talega e na butobuto e na nona siga kecega, ia na rarawa levu kei na cudru sa yaco vata kei na nona mate.
18Raica, na ka ka'u a kunea, ni sa yaga ka kilikili kaya na tamata me kana ka gunu, ka rekitaka na kena vinaka ni nona cakacaka kece sa oga kina e ruku ni mata-ni-siga e na veisiga kece ni nona bula, sa solia vua na Kalou, ni sa nona i votavota oqo.
19Ia na tamata yadua talega sa solia vua na Kalou nai yau kei na kamunaga, a sa solia vua me kana rawa kina, ka me taura na nona i votavota ka rekitaka na nona cakacaka—oqo nai solisoli ni Kalou.
20Ni na sega ni nanuma vakalevu na siga ni nona bula; ni sa rogo vua na Kalou e na reki ni lomana.
Who We AreWhat We EelieveWhat We Do
2025 by iamachristian.org,Inc All rights reserved.
