1Sa buli me tui ko Joasa ni sa vitu na nona yabaki, a sa lewa tiko ko koya mai Jerusalemi ka yabaki vasagavulu. A yaca i tinana talega ko Sipia mai Peri-sepa.
2A sa kitaka ko Joasa na ka dodonu e na mata i Jiova e na veisiga kecega sa bula kina ko Jioiata na bete.
3A sa kauta vua e le rua na watina ko Jioiata, ka sa vakatubura eso na luvena tagane kei na luvena yalewa.
4Sa oti na ka oqo, sa nanuma ko Joasa me vakavinakataka tale na vale i Jiova.
5A sa vakasoqoni ira vata na bete kei ira na Livai, ka kaya vei ira, “Dou lako yani ki na nodra veikoro na Juta, ka kumuna vata nai lavo mai vei ira kecega na Isireli, me vakavinakataka tale na vale ni nomudou Kalou e na veiyabaki, ia dou kusava na ka oqo.” Ia era sa sega ni kusava ko ira na Livai.
6 Lako 30.11-16 A sa kacivi Jioiata, ko koya sa liu, ko koya na tui, ka kaya vua, “E vakaevei ni ko sa sega ni tarogi ira na Livai e na nodra kauta mai Juta kei Jerusalemi nai yau sa lesi me kumuni vata, me vaka nai vakaro i Mosese na tamata i Jiova, kei nai soqosoqo ni Isireli, e na vuku ni vale ka tu kina na vunau?”
7Ni ra sa vakacacana oti na vale ni Kalou ko iratou na luve i Acalaia, na yalewa ca ko ya, kei nai yaya kecega sa vakacabori ki na vale i Jiova era a solia kivei ira na Peali.
8A ra sa cakava e dua na kato, ni sa vakaroti ira ko koya na tui, a ra sa viritura e tautuba mai na matamata-ni-koro ni vale i Jiova.
9A ra sa kacivaka e na veiyasana vaka-Juta kei Jerusalemi me sa kau mai kivei Jiova nai yau sa lesia ko Mosese na tamata ni Kalou kivei ira na Isireli e na vanua lala.
10A ra sa marau ko ira kecega na turaga, kei ira kecega na tamata, ka ra kauta mai, ka biuta ki na kato, ka ra sa ia tiko me oti mada.
11Ia ni ra sa kauta na kato ko ira na Livai vua sa lesia ko koya na tui, ka ni ra sa raica sa ka levu nai lavo, erau sa lako mai na nona vunivola na tui, kei na tamata ni bete levu, ka rau sa vakalalataka na kato, ka kauta tale ki na kenai tutu. A ra sa cakava vakakina e na veisiga, ka kumuna vata vakalevu sara nai lavo.
12A rau sa solia na tui kei Jioiata kivei ira era sa lewa na cakacaka e na vale i Jiova; ka ra sa volia kina na matai ni vatu kei na matai ni kau me vakavinakataka na vale i Jiova, kei ira talega era sa daucaka kaukamea kei na parasa, me vakavinakataka na vale i Jiova.
13A ra sa cakacaka ko ira na matai, ka vakaotia vakavinaka na cakacaka, ka ra sa cakava na vale ni Kalou me vaka eliu, ka vakaukauwataka.
14Ia ni ra sa vakaotia, era sa kauta mai vei koya na tui kei Jioiata nai lavo ka vo, ka sa caka kina nai yaya ni vale i Jiova, nai yaya ni cakacaka, me vakacaboisoro kina, kei nai taki, kei na bilo koula kei na bilo siliva. A ra sa vakacabora tiko eso nai soro kama e na vale i Jiova e na veisiga kecega i Jioiata.
15A sa qase mai ko Jioiata, ka sa vuqa na nona yabaki ni sa mate; sa dua na drau ka tolusagavulu na nona yabaki ni sa mate.
16Ka sa bulu vata ko koya kei ira na tui e na koro i Tevita, ni sa caka vinaka e Isireli, ka vua na Kalou, kei na nona vale.
17Ia ni sa mate ko Jioiata, sa ra lako mai na turaga ni Juta, ka sa vakarokoroko vua na tui. A sa vakarorogo vei ira ko koya na tui.
18Ka ra sa biuta na vale i Jiova na Kalou ni nodra qase, ka qaravi ira na kalouyalewa ni veikau kei na matakau; ka sa yaco na cudru kivei ira na Juta kei ira mai Jerusalemi e na vuku ni nodra caka cala oqo.
19Ia sa tala eso na parofita vei ira ko koya, me vakalesui ira tale kivei Jiova. A ra sa beitaki ira e na nodra i valavala, ka ra sa bese ga ni rogoca.
20 Maciu 23.35; Luke 11.51 A sa curu na Yalo ni Kalou kivei Sakaraia na luve i Jioiata na bete, ka sa tu e ra ko ira na tamata, a sa tu e cake ko koya ka kaya vei ira, “Sa vosa vakaoqo na Kalou, ‘A cava dou sa vakacacana kina na vunau i Jiova, ka sa dredre kina mo dou tamata yaco? Ni dou sa biuti Jiova, sa biuti kemudou talega ko koya.’ ”
21A ra sa buki kena vere, a ra sa vakaviriki koya e na vatu, e na rara ni vale i Jiova ni sa vakarota ko koya na tui.
22Io, sa sega ni nanuma ko Joasa na tui nai valavala vinaka ka cakava vei koya ko Jioiata na tamana, ia sa vakamatea ga na luvena. Ia ni sa mate, sa kaya, “Me raica mada oqo ko Jiova, ka taroga.”
Na Mate i Joasa23Ia ni sa cava na yabaki, sa lako mai na nodra mataivalu na kai Siria me vala kei Joasa. A ra sa lako mai ki Juta kei Jerusalemi, a ra sa mokuti ira kecega na nodra turaga na tamata, a sa vakauta vua na tui Tamasiko na nodra i yau kecega era sa tokitaka.
24Sa mataivalu lailai na nodra mataivalu na kai Siria era lako mai, a sa solia ko Jiova na mataivalu levu sara ki na ligadra, ka ni ra sa biuti Jiova na Kalou ni nodra qase. Ka ra sa vakayacora kina na cudru kivei Joasa.
25Ia ni ra sa lako tani mai vua (ni sa levu na mate ka tauvi koya ni ra sa lako tani mai vua), sa ra qai buki kena vere ko ira na tamata era qaravi koya, e na vuku ni kedratou dra na luve i Jioiata na bete, ka ra sa vakamatei koya e na nona i mocemoce. Ka sa mate ko koya, ka ra sa buluti koya e na koro i Tevita, ia sa sega ni bulu ko koya e na nodra i bulubulu na tui.
26Ia koi rau oqo erau a buki kena vere, ko Sapati na luve i Semeaca, e dua na yalewa ni Amoni, kei Jiosevata na luve i Semerice, e dua na yalewa ni Moapi.
27Ia e na vukudratou na luvena tagane, kei na kena bibi ni colacola sa bikai koya, kei na kena vakavinakataki tale na vale ni Kalou, raica, sa volai e nai tukutuku ni kedrai vola na tui. Ka sa buli me tui ko Amasaia na luvena, me kenai sosomi.
Who We AreWhat We EelieveWhat We Do
2025 by iamachristian.org,Inc All rights reserved.
