2 Korinica 10 - Ai Vola Tabu (Vakadewa Makawa Vakavoutaki 2021)（FRV21）

Sa Taqomaka na Nona Cakacaka ko Paula

1Ia koi au ko Paula, ka'u sa masuti kemudou e na yalomalumalumu kei na yalomalua i Karisito—koi au ka sa yalomalumalumu ni'u sa tiko vei kemudou, ia ka'u sa doudou vei kemudou ni'u sa tiko tani!—

2ka'u sa vakamasuti kemudou me'u kakua ni doudou vakasivia ni'u sa tiko vata kei kemudou, ka'u sa nanuma me'u doudou kina vei kemudou eso ka sa vakasami keitou ni keitou sai valavala me vaka na ka vakayago.

3Sa dina ga sa vakayago na neitou bula, ia keitou sa sega ni vala tiko me vaka na ka vakayago;

4ni sa sega ni ka vakayago na neitou i yaragi ni valu, ia sa kaukauwa ga e na vuku ni Kalou me talaraki kina na bai ni valu kaukauwa.

5Keitou sa talaraka sobu na veivakasama kei na ka cecere kecega sa vakalevulevui me vorata na vuku ni Kalou, ka sa vakamalumalumutaka na nanuma kecega me talairawarawa vei Karisito.

6Ia keitou sa vakarau tu me keitou totogitaka na talaidredre kecega, ni sa vakataucokotaki na nomudou talairawarawa.

7Dou sa dauraica beka ga na kena i rairai e taudaku? Kevaka e dua sa vakadinata ni sa nei Karisito ko koya, me qai vakananumi koya talega ko koya me vaka ni sa nei Karisito ko koya, keitou sa nei Karisito vaka talega kina.

8Ia kevaka ka'u sa dokai au vakalevu cake e na vuku ni lewa (sa solia mai vei keitou na Turaga, mo dou vakatataki cake kina, ia ka sega ga mo dou vakarusai kina,) au na sega ni vakamaduataki.

9Meu kakua ni vaka ni ka'u sa via vakarerei kemudou e na noqu i vola;

10ni ra sa kaya, “Sa bibi ka kaukauwa na nona i vola; ia sa malumalumu ga ni sa tiko vei keda, ka sa ka wale na nona vosa;”

11me qai nanuma na ka oqo, ko koya sa vakakina, ni rau na tautauvata ga, na neitou vosa e nai vola ni keitou sa tiko tani, kei na neitou i valavala ni da sa tiko vata ga.

Sa Sakitaki Koya ko Paula ena Vuku ni Turaga

12Ni keitou sa sega ni doudou me wiliki keitou vata kei ira eso, se vakatautauvatataki keitou kei ira era sa dautukuni ira vakai ira; ia ko ira ni ra sa vakarautaki ira vakai ira, ka vakatautauvatataki ira vakai ira, era sa sega ni vuku.

13Ia koi keitou, keitou na sega ni vakalevulevui keitou e na veika sa uasivita nai vakarau, me vaka ga nai vakarau ni yalayala sa vota vei keitou na Kalou, ai vakarau me keitou yaco dina vei kemudou.

14Ni keitou sa sega ni uasivita na neitou i yalayala, me vaka keitou sa sega ni yacovi kemudou, ni keitou sa yacovi kemudou talega e nai tukutuku-vinaka kei Karisito.

15Keitou sa sega ni dokai keitou e na veika sa uasivita nai vakarau, e na vuku ni nodra cakacaka na tamata tani; ia keitou sa nuinui ga, ni sa vakalevutaki tiko na nomudou vakabauta, keitou na vakalevulevui kina vei kemudou me vaka na neitou i yalayala me keitou uasivi,

16me keitou vunautaka nai tukutuku-vinaka e na yasana sa uasiviti kemudou, me keitou kakua ni vakalevulevui keitou e na vuku ni yalayala ni tamata tani, e na veika sa vakarau tu vei keitou.

17Jere 9.24“Ia ko koya sa vosa doudou, me vosa doudou e na vuku ni Turaga.”

18Ni sa sega ni vakabau ko koya sa tukuni koya, sa vakabau ga ko koya sa tukuna na Turaga.