Vakatakila 13 - Ai Vola Tabu (Vakadewa Makawa Vakavoutaki 2021)（FRV21）

Nai Matai ni Manumanu Rerevaki

1 Tani 7.3; Vtaki 17.3,7-12 Ia ka'u a raica e dua na manumanu sa lako cake mai na wasawasa, e vitu na uluna ka tini na nona i leu, a sa toka e na nona i leu nai sala-vakaturaga e tini, a sa tu ga e na uluna na yaca ni dauvosavakacacataki.

2Tani 7.4-6Ia na manumanu ka'u a raica sa vaka na lepate, a yavana sa vaka na yava ni bea, a gusuna e vaka na gusu ni laione. A sa solia vua na nona kaukauwa dina na gata levu, kei na nona i tikotiko-vakaturaga, me mai turaga levu.

3Ia ka'u a raica e dua na uluna e vaka sa vuetaki me mate kina, ia sa bula tale mai na nona mavoa ka voleka ni mate kina. A ra sa kurabui kecega na kai vuravura e na vuku ni manumanu.

4A ra sa vakarokoroko vua na gata levu, o koya sa solia na kaukauwa vua na manumanu, ka ra sa vakarokoroko vua na manumanu, ka kaya, “O cei sa vaka na manumanu oqo? Ocei sa rawata me rau veivala kaya?”

5 Tani 7.8,25; 11.36 A sa soli vua na gusu me vosataka na ka levu kei na vosa vakacaca sara, ka sa soli vua me turaga ka me vula vasagavulu-ka-rua.

6A sa dalaga me vosa ca ki na Kalou, me vosavakacacataka na yacana, kei na nona vale, kei ira era sa tiko mai lomalagi.

7Tani 7.21A sa soli vua me veivala kei ira na tamata yalosavasava, ka me rawai ira. A sa soli vua me veiliutaki vei ira na veimataqali kece, kei na veimatanitu kei na duivosavosa, kei na veivanua.

8Same 69.28Ia ena vakarokoroko vua ko ira kecega era sa tiko e vuravura, ko ira sa sega ni volai na yacadra e nai vola ni bula ni Lami sa vakamatei mai nai vakatekivu kei vuravura.

9Kevaka e dua sa vakadaligana, me mani rogoca sara:

10 Jere 15.2; 43.11 O koya sa dauia na veivakabobulataki

ena vakabobulataki;

o koya sa ia na veivakamatei e nai seleiwau

ena mate talega e nai seleiwau.

Oqo na nodra vosota kei na nodra vakabauta na tamata yalosavasava.

Nai Karua ni Manumanu

11Ia ka'u a raica e duatani tale na manumanu sa lako cake mai vuravura. A sa rua na nona i leu me vaka na luve ni sipi, ka sa vosa me vaka na gata levu.

12A sa tu vua na kaukauwa kecega ni manumanu sa liu vua, ka vakasaurarataki vuravura kina kei ira sa tiko kina me ra vakarokoroko vua na manumanu sa liu, o koya ka bula e na nona vue ka voleka ni mate kina.

13Ia sa kitaka na ka levu e veivakidacalataki ko koya, a sa kauta mai lomalagi ki vuravura na bukawaqa e na matadra na tamata;

14a sa temaki ira era sa tiko e vuravura e na vuku ni cakacaka mana sa kitaka ko koya e na mata ni manumanu, ka sa kaya vei ira era sa tiko e vuravura me ra cakava na matakau me nona na manumanu sa vakamavoataki e nai seleiwau, ka sa bula tikoga.

15A sa rawata ko koya oqo me solia na bula ki na matakau ni manumanu, me vosa rawa kina na matakau ni manumanu, ka vakavuna talega na nodra mate ko ira era sa sega ni via vakarokoroko ki na matakau ni manumanu.

16A sa vakasaurarataki ira kecega, na tamata lalai kei na turaga, o ira sa vutuniyau kei ira sa dravudravua, ai taukei kei na bobula, me volai e dua nai vakatakilakila e na ligadra i matau, se na yadredra,

17ka me kakua ni veivoli e dua, o koya ga sa tu vua nai vola, se na yaca ni manumanu, se nai wiliwili ni yacana.

18Oqo e gadreva na vuku: o koya sa yalomatua me mani wilika na naba ni manumanu, ni sa naba ni dua na tamata, ka sa nona naba na ono na drau ka onosagavulu-ka-ono.