Isikeli 11 - Ai Vola Tabu (Vakadewa Makawa Vakavoutaki 2021)（FRV21）

Era sa Cudruvi na Dauvakavuvuli Ca

1A sa laveti au cake na yalo, ka kauti au ki na matamata-ni-koro ni vale i Jiova ki na tokalau, o koya sa donuya na tokalau. Ka raica, sa tu mai na matamata-ni-koro e lewe ruasagavulu ka lima na tamata; ia ka'u a raica e dua vei ira ko Jeesanaia na luve i Asuri, kei Pilataia na luve i Penaia, erau sa turaga vei ira na tamata.

2A sa kaya vei au ko koya, “Ko iko na luve ni tamata, koi rau na tamata oqo erau bosea na caka ca, ka vakavuvulitaka nai vakavuvuli ca e na koro oqo;

3erau sa kaya, ‘Sa sega ni voleka mai na gauna me da tara vale kina. Na koro oqo sa dua na kuro, ia koi keda na lewe-ni-kuro.’

4O koya oqo mo parofisaitaka kina na ka ca vei ira; mo parofisaitaka ga, ko iko na luve ni tamata.”

5Ka sa yaco vei au na Yalo i Jiova, a sa kaya vei au, “Mo tukuna mada, Sa kaya vakaoqo ko Jiova: Dou a vakasama vakaoqo, na vale i Isireli; ni ka'u sa kila na ka sa tubu e na lomamudou.

6Dou sa vakalevutaka na nomudou veivakamatei e na koro oqo, ka vakasinaita na kena sala e na yago ni tamata mate.

7O koya oqo sa kaya kina na Turaga ko Jiova: Ko ira na nomudou tamata vakamatei dou sa virikotora e loma ni koro, sai ira na lewe-ni-kuro ka sa kena kuro na koro oqo; ia ka'u na kauti kemudou tani mai kina.

8Dou a rerevaka nai seleiwau, ia nai seleiwau ka'u na vakayacora vei kemudou, sa kaya na Turaga ko Jiova.

9Ia ka'u na kauti kemudou tani mai kina, ka soli kemudou ki na ligadra na kai tani, ka cudruvi kemudou.

10Dou na bale e nai seleiwau; ia ka'u na lewai kemudou e nai yalayala ni Isireli; ia dou na kila ni sai au ko Jiova.

11Na koro oqo, ena sega ni kemudou kuro; ia koi kemudou, dou na sega ni lewena; ia ka'u na lewai kemudou e nai yalayala ga ni Isireli.

12Ia dou na kila ni sai au ko Jiova. Ni dou sa sega ni muria na noqu vunau, ka dou sa sega ni cakava na noqu lewa, ia dou sa muria na nodra i tovo na veimatanitu sa tiko voliti kemudou.”

Na Kalou e na Vakataudeitaki Isireli Tale

13Ia ni'u sa parofisai tiko, sa qai ciba ko Pilataia na luve i Penaia. Au sa qai bale vakatoboicu, ka tagi vakadomoilevu, ka kaya, “Isa lei, Jiova na noqu Turaga! Ko ni na vakaoti ira kece li na vo-n-bula i Isireli?”

Ena Vakacokotaki Isireli Tale na Kalou

14Sa yaco tale vei au na vosa i Jiova, ka vaka:

15“Ko iko na luve ni tamata, ko ira na wekamu, io na wekamu, na kai nomu dina, kei ira kece sara na vale i Isireli, sa ra kaya kina na lewe i Jerusalemi, ‘Dou lako tani vakayawa vei Jiova; ia sa soli ga vei keimami na vanua oqo me keimami taukena.’

16O koya oqo mo kaya kina, ‘Sa kaya vakaoqo na Turaga ko Jiova; Ke'u sa biuti ira tani vakayawa ki na veimatanitu, ka dui vakasevi ira ki na veivanua, ke'u na yaco ga me nodra vale tabu lailai e na veivanua era na yaco kina.’

17O koya oqo mo kaya kina, ‘Sa kaya vakaoqo na Turaga ko Jiova; Io ka'u na vakasoqoni kemudou mai vei ira na veimataqali, ka vakasoqoni kemudou mai na veivanua dou sa dui vakasevi kina, ia ka'u na solia vei kemudou na vanua ko Isireli.’

18A ra na yaco yani ki kea, ka kauta tani mai kina na kena ka velavela kecega, kei na kena ka vakasisila kecega.

19Isi 36.26-28Ia ka'u na solia vei ira me ra loma vata, ka'u na tugana talega ki na lomamudou na yalo vou; ia ka'u na kauta tani na yalo vatu mai na lomadra, ka solia vei ira na yalo vakalewe,

20me ra muria kina na noqu vunau, ka vakabauta na noqu lewa, ka cakava. Ka ra na qai noqu tamata, ia koi au ka'u na nodra Kalou.

21Ia ko ira sa lomadra ga me ra muria na nodra i valavala velavela kei na nodra ka vakasisila ka'u na sauma ga kivei ira, sa kaya na Turaga ko Jiova.”

22 Isi 43.2-5 Ia na jerupi eratou sa qai vakatetaba, kei na yava ni qiqi sa tu vata kei iratou; ia nai ukuuku ni Kalou i Isireli sa donui iratou mai cake.

23A sa lako tani nai ukuuku i Jiova mai na loma ni koro, ka la'ki tu ki na ulu-ni-koro mai na yasa ni koro ki na tokalau.

24Ia sa laveti au cake na Yalo ka kauti au ki Kalitia e na raivotu e na Yalo ni Kalou, vei ira na bobula. A sa qai lako tani vei au na raivotu ka'u a raica.

25Au a qai tukuna vei ira na bobula na vosa kece i Jiova sa vakaraitaka vei au ko koya.