Cakacaka 28 - Ai Vola Tabu (Vakadewa Makawa Vakavoutaki 2021)（FRV21）

Mai Molota

1Ia ni keimami sa cabe bula, keimami sa qai kila sa yaca ni yanuyanu ko ya ko Molota.

2A ra sa lomani keimami vakalevu ko ira nai taukei; ni ra sa vakawaqa nai binibini buka, a ra sa kauti keimami yadua ki vale, e na vuku ni uca sa qai tau, kei na liliwa.

3Ia ni sa kumuna mai e dua nai vaubuka ko Paula, a sa laki tuva ki na buka sa waqa tu, sa dolo mai na katakata e dua na gata, ka vivica na ligana.

4Ia ni ra sa raica ko ira nai taukei, ni sa lili e na ligana na gata, era sa veikayaka vakai ira, “E dina sa tamata daulaba oqo, ia ni sa cabe bula mai na waitui, sa sega ni laivi koya ko Lewa Dodonu me bula.”

5A sa qai kureitaka na gata ki na bukawaqa ko koya, a sa sega ni vakaleqai kina.

6Ia era sa nanuma ena vuce mai na yagona, se bale sobu vakasauri ka ciba. Ia ni ra sa waraka vakadede, ka sega ni kunea e dua na ka ca sa yaco vua, sa qai vuki na nodra vakasama ka ra kaya ni sa dua na kalou ko koya.

7Ia sa tiko e na yasana ko ya eso na tiki ni vanua sa nona na turaga ni yanuyanu, o Pupiliu na yacana; a sa vakacegui keitou ko koya, ka vakani keitou vinaka ka bogi tolu.

8Ia sa tauvi-mate na tama i Pupiliu, a sa katakata ka coka-dra. A sa curu ki na nona rumu ko Paula, ka masu ka sa tabaka e na ligana, ka vakabula.

9Ia ni sa caka oqo, sa lako mai ko ira tale era sa tauvi-mate e na yanuyanu, a ra sa vakabulai.

10A sa levu na ka era sa vakarokorokotaki keitou kina, kei na gauna keitou sa vakarau soko yani kina, era sa kauta ki waqa na veika e yaga vei keitou.

Mai Molota ki Roma

11Sa oti e tolu na vula, keimami sa soko e na dua na waqa ni Alekisadria, ka kele e na yanuyanu ko ya e na vula i liliwa, a kena matakau na drua kalou.

12A keimami sa sobu ki Sairakuse, ka tiko kina ka bogi tolu.

13Ia keimami sa lako tani eke, ka veicavuyaki, ka yaco ki Rejiumi; ia sa bogi dua sa qai liwa na ceva, ka keimami sa yaco e na mataka ki Putioli.

14Ia keitou sa kunea kina na veiwekani eso, a ra sa masuti keitou me keitou tiko ga ka bogi vitu. Keitou sa qai lako ki Roma.

15A ra sa rogoca mai kina na keitou i tukutuku ko ira na veiwekani, ka sa lako mai ki Na Rara i Apio kei Na Bure e Tolu, me ra mai tavaki keitou. Ia ni sa raici ira ko Paula, sa vakavinavinaka vua na Kalou, ka sa vakayaloqaqataki.

Mai Roma

16Ia ni keimami sa curu ki Roma, sa biu ko Paula me tiko duaduaga kei na dua na sotia sa vakatawai koya.

17Ia sa bogi tolu, sa qai vakasoqoni ira vata na nodra turaga na Jiu ko koya. Ia ni ra sa soqoni vata mai, sa kaya ko koya vei ira, “Oi kemudou na veiwekani, au sa sega ni cakava e dua na ka ca vei ira na kai noda, se ki na nodra i valavala na noda qase, ia ka’u a vesuki ga ka soli yani ki na ligadra na kai Roma mai Jerusalemi.

18Ia ko ira, ni ra sa lewai au, era sa vinakata me ra sereki au, ni sa sega na ka vei au me’u mate kina.

19Caka 25.11Ia ni ra sa kaya ko ira na Jiu me kakua, sa uqeti ga na lomaqu me’u kerekere i cake vei Sisa—ka dina ga ni sa sega ni dua na ka me’u beitaki ira kina na kai noqu.

20O koya oqo ka’u sa vakasoqoni kemudou vata kina, mo dou raici au ka vosa kina vei au, ni’u sa vesu e na sinucodo oqo e na vuku ni nodra i nuinui na Isireli.”

21A ra sa kaya vua, “Sa sega ni dua nai vola mai Jutia keitou sa ciqoma me baleti iko, ka sa sega talega ni dua vei ira na veiwekani sa lako mai me vakatakila se tukuna e dua na ka ca e na vukumu.

22Ia keitou sa via rogoci iko se cava ko sa nanuma, ni keitou sa kila sa vosavakacacataki na vakabauta vakatani oqo e na veivanua kecega.”

Sa Vakamacalataka ko Paula na Matanitu ni Kalou

23A ra sa lokuca vua e dua na siga, ka ra lewe vuqa sa lako mai ki na nona vale. A sa sereka vei ira ko koya ka tukuna na matanitu ni Kalou, ka vakadinadinataki Jisu vei ira mai na vunau i Mosese, kei ira na parofita, sa vakatekivu e na mataka, ka yacova na yakavi.

24Ia sa vakadinata ko ira eso na veika sa vosataki, ka so sa sega ni vakadinata.

25Ia ni ra sa sega ni lomavata vakai ira, era sa lako tani, ni sa vosataka oti ko Paula e dua na vosa: “Sa vosa dina na Yalo Tabu ni sa tukuna vakaoqo ko Aisea na parofita vei ira na nomudou qase,

26 Aisea 6.9,10 “ ‘Lako vei ira na tamata oqo, ka kaya,

“Dou na daurogoca tikoga, ka lecava tu;

ia dou na dauraica tikoga, ka sega ni kunea.”

27Ni sa uro mai na lomadra na tamata oqo,

ka sa didivara na daligadra,

a sa bobo na matadra;

de dua na siga ena rai na matadra,

ka rogo na daligadra,

ka kila na lomadra ka ra saumaki mai—

ka’u na vakabulai ira.’

28O koya oqo mo dou qai kila, ni sa kau na bula mai vua na Kalou vei ira na veimatanitu tani; era na vakarogoca.”

29Ia ni sa vosataka oti ko koya na veika oqo, era sa lako tani ko ira na Jiu, a ra sa veileti vakalevu vakai ira.

Sa Veivakatavulici Tiko ko Paula me Rua na Yabaki

30A sa tiko ko Paula ka yabaki rua taucoko e na vale sa volia tiko ko koya, ka sa vakacegui ira kecega era sa lako vua,

31ka sa vunautaka na matanitu ni Kalou, ka sa vakatavuvulitaka vakadoudou sara na ka kei Jisu Karisito na Turaga, ka sa sega na tamata sa tarova.