Same 3 - Ai Vola Tabu (Vakadewa Makawa Vakavoutaki 2021)（FRV21）

Vakadinata na Kalou e na Gauna ni Dredre A Same i Tevita, ni sa drotaki Apisalome na luvena.

1Kemuni Jiova, sa ka tani na tamata sa tubu me vakararawataki au!

Era sa lewe vuqa sa tu me bolei au;

2era sa lewe vuqa sa tukutuku vei au, ka vaka,

“Ena sega sara ni vakabulai koya na Kalou.” Sela

3Ia koi kemuni, Jiova, ko ni sa noqu i sasabai,

na noqu i ukuuku, kei koya sa tabea cake na uluqu.

4Au a tagi vei Jiova e na domoqu,

a sa rogoci au ko koya mai na nona ulunivanua tabu. Sela

5Au a davo no ka moce;

au a yadra tale, ni sa maroroi au ko Jiova.

6Au na sega ni rerevaki ira era le udolu vakatini

era sa vakavolivoliti au vakaivalu.

7Ni tucake, Jiova; ni vakabulai au, noqu Kalou!

Sai kemuni ka yaviti ira kecega na noqu meca e na sui ni baludra;

ko ni sa musulaka na batidra na tamata ca.

8Sa nei Jiova ga na veivakabulai;

me tu vei ira na nomuni tamata na nomuni vosa ni veivakalougatataki! Sela