1 Aisea 34.5-17; 63.1-6; Jere 49.7-22; Isi 25.12-14; Emo 1.11,12; Ope 1.1-14; Mala 1.2-5 A sa yaco vei au na vosa i Jiova, ka vaka:
2“Ko iko na luve ni tamata, mo vaqara na matamu ki na Ulunivanua ko Sia, ka parofisaitaka na ka ca sa na yaco kina,
3ka kaya kina, Sa kaya vakaoqo na Turaga ko Jiova:
Raica, ko iko na Ulunivanua ko Sia, ka'u sa veisaqasaqa kei iko;
ka'u na dodoka yani na ligaqu me'u ravuti iko,
ka'u na vakalalai iko sara.
4Ka'u na vakacacana na nomu veikoro;
ia ko iko, ko na rusa sara,
ia ko na qai kila ni sai au ko Jiova.
5Ni ko sa yalo ca tikoga, ka sa soli ira na Isireli ki na kaukauwa ni seleiwau e na gauna ni nodra rarawa, e na gauna ka tini kina na nodra i valavala ca.
6O koya oqo, me vaka ni'u sa bula, sa kaya na Turaga ko Jiova, au na vakarautaki iko vakaidina ki na vakadave-dra, ia na dra ena vakasavi iko; ni ko a sega ni cata na vakadave-dra, ena vakasavi iko kina na dra.
7Ia ka'u na vakalalataka sara na Ulunivanua ko Sia, ka muduki koya tani kina sa lako voli yani kei koya talega sa lako tale mai.
8Ia ka'u na robota na kena veiulunivanua e na nona tamata sa vakamavoataki kina. E na nomu veiulu-ni-koro, kei na nomu veibuca, kei na nomu uciwai kecega, era na bale kina era vakamatei e nai seleiwau.
9Au na vakalalataki iko mo vanua lala ka sega ni mudu, ia na nomu veikoro ena sega ni tawa tale. Ia dou na kila ni sai au ko Jiova.
10“Baleta ni ko a kaya, ‘A matanitu ruarua oqo kei na vanua ruarua oqo ena noqu ga, ia keimami na taukena’—ka dina ga ni sa tiko kina ko Jiova—
11o koya oqo, me vaka ni'u sa bula, sa kaya kina na Turaga ko Jiova, ka'u na kitaka talega me vaka na nomu cudru, ka vaka na nomu vuvu ko sa muria ni ko cati ira. Ia ka'u na qai vakatakilai au vei ira, ni'u sa qai lewai iko.
12Ia ko na kila ni sai au ko Jiova.
“Ka'u sa rogoca kecega na nomu vosa ca ko sa vosavakacacataka kina na veiulunivanua ni Isireli, ka kaya, ‘Sa vakalalataki, sa soli vei keda me da kania.’
13Ia dou a bolei au vakaoqo e na gusumudou, ka sa vakalevutaka na nomudou vosa ca vei au; koi au ka'u sa rogoca.
14Sa kaya vakaoqo na Turaga ko Jiova: Ni sa qai reki ko vuravura taucoko, ka'u na vakacacani iko sara.
15Me vaka ni ko a marautaka na nodra vanua na vale i Isireli, ni sa lala, ka'u na kitaka vakakina vei iko; ko na vakalalataki sara, ko iko na Ulunivanua ko Sia, io ko Itomi kecekece sara ga. Ka ra na kila ni sai au ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
