1I Jiova, mo ni rogoca na kena dodonu,
ni vakarorogo ki na noqu tagi;
ni rogoca na noqu masu
sa sega ni lako mai na tebenigusu lasulasu.
2Me lako dina mai na matamuni na lewa e na vukuqu;
me vakaraica ga na matamuni na ka e dodonu.
3O ni sa vakatovolea na yaloqu; o ni sa lako mai vei au e na bogi,
ko ni a vakatovolei au sara, ia sa sega na ka ko ni na kunea;
sa lomaqu ga me sega ni lako vakatani na gusuqu.
4E na vuku ni nodra cakacaka na tamata,
ka'u a maroroi au e na vosa ni tebenigusumuni mai na nona i valavala na dauveivakarusai.
5Sa vakataudeitaki na noqu i lakolako e na nomuni sala,
ka sa sega ni sikalutu na yavaqu.
6Au sa tagi vei kemuni, ko ni na qai rogoci au, na Kalou;
mo ni vakarorogo kivei au, io, ki na noqu vosa.
7Ni vakatakila mai na nomuni loloma e veivakurabuitaki,
Oi kemuni nai Vakabula vei ira sa gadreva na bula
mai vei ira na nodra meca e na ligamuni matau.
8Ni maroroi au me vaka na loa ni mata;
vunitaki au e ruku ni yaloyalo ni tabamuni,
9mai vei ira na tamata ca era sa vaqeavutaki au,
mai vei ira na noqu meca era sa vakavolivoliti au me'u mate.
10Era sa kovuni e na nodra uro;
sa vosa vakaviavialevu na gusudra.
11Era sa vakavolivoliti au e na noqu i lakolako;
ka sa wanonovi au ki na qele na matadra.
12O koya oqo sa tautauvata kei na laione sa gu me ia na veidresulaki;
kei na luve ni laione sa lako lo e na yasana vuni.
13I Jiova, ni tucake, ni saqati koya, ka vakabalei koya sobu!
Ni vakabula na yaloqu mai na tamata ca, e na nomuni seleiwau,
14mai vei ira na tamata—e na ligamuni, i Jiova,
mai vei ira na tamata ni vuravura oqo era sa rawata na nodra i votavota e na nodra bula oqo.
O ni sa vakamamautaka na ketedra e na nomuni yau vuni;
sa ka levu tu na luvedra;
ka ra sa tataunaka na vo ni nodra i yau me nodra na luvedra lalai.
15Ia koi au, ka'u na raica na matamuni e na yalododonu;
ka'u na qai yalo vakacegu ni'u sa yadra tale, ni'u sa vakaraici kemuni.
Who We AreWhat We EelieveWhat We Do
2025 by iamachristian.org,Inc All rights reserved.
