Vakarua 8 - Ai Vola Tabu (Vakadewa Makawa Vakavoutaki 2021)（FRV21）

Ai Vakaro me Kakua ni Guilecavi na Kalou

1“Ai vakaro kecega ka'u sa vakarota vei kemuni edaidai mo ni vakabauta ka cakava, mo ni bula kina, ka tubu me lewe levu, ka lako yani ka taukena na vanua sa bubului kina ko Jiova vei ira na nomuni qase.

2Ia mo ni nanuma na sala kecega sa kauti kemuni kina ko Jiova na nomuni Kalou, e na vanua lala, e na yabaki e vasagavulu sa oti oqo, me vakayalomalumalumutaki kemuni, me vakatovolei kemuni, me kila kina na ka sa tiko e lomamuni, se ko ni na vakabauta na nona vunau, se segai.

3Maciu 4.4; Luke 4.4A sa vakayalomalumalumutaki kemuni, a sa laivi kemuni mo ni viakana, ka sa vakani kemuni e na mana, na ka ko ni a sega ni kila eliu, ka sega talega ni kila ko ira na nomuni qase; me vakatakila vei kemuni ni sa sega ni bula na tamata e na madrai duaduaga, ka ni sa bula ga na tamata e na ka kecega sa vosataka ko Jiova.

4Ai sulu ko ni a vakaisulu kina, sa sega ni madra mai, a sa sega ni vuvuce na yavamuni, e na yabaki e vasagavulu oqo.

5Ia mo ni kila e na lomamuni, ni sa vakanakuitataki kemuni ko Jiova na nomuni Kalou me vaka sa vakanakuitataka na luvena na tamata.

6Ia mo ni vakabauta kina nai vakaro i Jiova na nomuni Kalou, mo ni lako e na nona sala, ka mo ni rerevaki koya.

7Ni sa kauti kemuni ko Jiova na nomuni Kalou ki na vanua vinaka, na vanua vakauciwai, ka vakamata-ni-wai kei na wai levu sa tovure mai na veiqakilo kei na veiulunivanua;

8a vanua ni witi, kei na barile, kei na veivaini, kei na lolo, kei na pomekaraneti; a vanua ni waiwai ni olive, kei na oni;

9a vanua ko na kana madrai tiko kina ka mamau, ko na sega ni dravudravua kina e na dua na ka; a vanua sa kaukamea na kena vatu, ia ko ni na kelia na uma parasa mai na kena veiulunivanua.

10Ia ni ko ni sa kana ka mamau, mo ni qai vakavinavinaka vei Jiova na nomuni Kalou e na vuku ni vanua vinaka sa solia vei kemuni ko koya.

11 Osea 13.5,6 “Mo ni qarauni kemuni mo ni kakua ni guilecavi Jiova na nomuni Kalou mai na nomuni sega ni via muria na nona vunau, kei na nona lewa, kei na nona i lesilesi ka'u sa vakarota vei kemuni edaidai.

12De ko ni sa kana ka mamau, ka tara eso na vale vinaka ka tiko kina,

13ka sa tubu me levu na nomuni qele ni bulumakau kei na nomuni qele ni sipi, ka sa levu mai na nomuni siliva kei na nomuni koula, ka vakalevutaki na nomuni ka kecega,

14ia me kakua ni qai viavialevu mai na yalomuni ka ko ni guilecavi Jiova na nomuni Kalou, ko koya sa kauti kemuni tani mai na vanua ko Ijipita, mai na vale ni veivakabobulataki,

15o koya ka kauti kemuni yani e loma ni vanua lala ka vakarerevaki ko ya, ka sa tiko kina na gata vakabukawaqa kei na batibasaga, kei na vanua sa sega kina na wai. Ni sa kauta mai na memu wai ko koya mai na vatu qiwa,

16ka vakani iko e na mana mai na vanua lala ka ra sega ni kila eliu na nomuni qase, me vakayalomalumalumutaki kemuni kina ka vakatovolei kemuni, ka mo ni na qai vinaka kina e muri.

17Kakua ni kaya e lomamuni, ‘Na noqu i gu kei na kaukauwa ga ni ligaqu sa rawati kina nai yau oqo.’

18Ia mo ni nanumi Jiova ga na nomuni Kalou, ni sai koya sa solia vei kemuni na kaukauwa mo ni rawata kina nai yau, me vakataudeitaka ko koya na nona veiyalayalati sa bubului kina vei ira na nomuni qase, me vaka edaidai.

19Ia kevaka ko ni sa guilecavi Jiova na nomuni Kalou e na dua na ka, ka muria na kalou tani, ka qaravi ira, ka cuva vei ira, au sa tukuna vei kemuni e na siga oqo ni ko ni na rusa vakaidina.

20Me vaka na veimatanitu sa vakarusa ko Jiova e matamuni, ko ni na rusa vakakina, ni ko ni sa sega ni vakarorogo ki na domo i Jiova na nomuni Kalou.