Lako Yani 15 - Ai Vola Tabu (Vakadewa Makawa Vakavoutaki 2021)（FRV21）

Na Sere i Mosese

1 Vtaki 15.3 Ia ko Mosese kei ira na Isireli, era sa qai seretaka vei Jiova na sere oqo, ka ra sa kaya,

“Au na sere vei Jiova, ni sa ka talei na nona gumatua;

na ose kei koya sa vodoka sa biuta ko koya ki na wasawasa.

2 Same 118.14; Aisea 12.2 Sa noqu kaukauwa ko Jiova, ko koya ka'u sa seretaka,

a sa noqu vu-ni-bula ko koya;

sa noqu Kalou ko koya, ka'u na vakavinavinaka vua,

na Kalou nei tamaqu, ka'u na vakalevulevui koya.

3A qaqa e nai valu ko Jiova;

ko Jiova na yacana.

4“A qiqi-ni-valu nei Fero kei na nona mataivalu sa biuta ko koya ki na wasawasa;

era sa dromu e na Wasa Damudamu na nona kavetani vinaka.

5Sa luvuci ira na wai titobu;

era sa dromu ki botona me vaka na vatu.

6Kemuni Jiova, sa rogovaki na kaukauwa ni ligamuni matau—

kemuni Jiova, sa musumusuka na meca na ligamuni matau.

7Ia e na kena levu ni nomuni kaukauwa ko ni sa vukici ira era tucake me nomuni meca;

ko ni a vakatauca na nomuni cudru waqawaqa, a sa vakamai ira me vaka na vu-ni-sila.

8A sa bini toka na wai e nai cegu ni ucumuni,

sa tu vakadodonu na wai levu me vaka na bukebuke levu,

sa cevata tu na wai titobu e na loma ni wasawasa.

9Sa kaya na meca, Au na vakasava, au na vauca,

au na vota nai toki-ni-valu, ena mamau vei ira na noqu kocokoco.

Ka'u na ucuna na noqu i seleiwau, ena vakarusai ira na ligaqu.

10Ko ni a vakaliwava na nomuni cagi ka sa luvuci ira na wasawasa;

era sa dromu e na wai rerevaki me vaka na uma.

11“Ko cei vei ira na kalou sa tautauvata kei kemuni Jiova?

Ko cei sa tautauvata kei kemuni, sa vakaiukuuku e na savasava,

sa dokai ka cecere, ka sa caka mana tiko?

12Ko ni a dodoka na ligamuni matau,

sa qai tilomi ira ko vuravura.

13“E na nomuni loloma ko ni sa tuberi ira yani na tamata ko ni a volia;

e na nomuni kaukauwa ko ni sa kauti ira ki na nomuni tikotiko tabu.

14Era na rogoca na veimatanitu, era na taqaya;

ena kani ira na kai Filisitia na rarawa.

15Era na qai domobula na turaga ni Itomi;

ena tauvi ira na qaqa ni Moapi na sautaninini;

era na waicala yani na kai Kenani kecega.

16Ena tauvi ira na rere kei na domobula;

e na kena kaukauwa ni ligamuni era na tiko lo me vaka na vatu,

ka me ra lako mada yani na nomuni tamata, i Jiova,

me ra lako mada yani na tamata ko ni a volia.

17Ko ni na vakayacori ira kina, ka tea e na ulunivanua ko ni sa taukena,

na yasana ko ni sa cakava Jiova me nomuni tikotiko,

na vale tabu sa vakarautaka na ligamuni, na Turaga.

18Ena tawa mudu ka tawa mudu na nona lewa ko Jiova.”

Na Sere i Miriama

19Ni ra sa lako ki loma ni wasawasa na ose nei Fero kei na nona qiqi-ni-valu, kei ira na nona mataivalu sa vodo ose, a sa vakasuka tale ko Jiova na wai ni wasawasa me luvuci ira; ia ko ira na Isireli, era sa lako e na vanua mamaca e loma ni wasawasa.

20Ia ko Miriama, na parofita yalewa, na gane i Eroni, sa kauta e ligana na tibereli; a ra sa muri koya ko ira na yalewa kecega, ka taura na tibereli ka meke lako.

21A sa veisausau meke kei ira na tagane ko Miriama,

“Dou sere vei Jiova, ni sa ka talei na nona gumatua;

na ose kei koya sa vodoka sa biuta ko koya ki na wasawasa.”

Vukici na Wai Gaga me Kamikamica

22A sa kauti ira na Isireli mai na Wasa Damudamu ko Mosese, ka ra sa lako ki na vanua lala mai Suri; a ra sa lako e loma ni vanua ka bogi tolu, ka sega ni kunea na wai.

23A ra sa yaco ki Mara, a ra sa sega ni gunuva rawa na wai mai Mara, ni sa gaga. O koya sa vakayacani kina ko Mara.

24A ra sa vosakudrukudru vei Mosese ko ira na tamata, ka kaya, “A cava me keimami gunuva?”

25A sa tagi vei Jiova ko koya; a sa vakatakila vua ko Jiova e dua na kau, a sa biuta ko koya ki na wai, a sa qai kamikamica mai na wai.

Sa tauca mai kea ko koya eso na vunau kei nai vakaro me ra dau muria, ka sa vakatovolei ira mai kea.

26A sa kaya, “Kevaka ko ni na vakarorogo vakavinaka ki na domo i Jiova na nomuni Kalou, ka cakava na ka sa dodonu e matana, ka vakatu daligamuni ki na nona vunau, ka vakabauta na ka kecega sa lesia ko koya, ka'u na qai sega ni vakayacora vei kemuni e dua na mate ka'u a vakayacora vei ira na kai Ijipita; ni sai au ko Jiova, ka'u sa vakabulai kemuni tiko.”

27A ra sa yaco ki Elimi, sa tu kina e tinikarua na mata-ni-wai, ka vitusagavulu na vuni niu; a ra sa tiko mai kea, voleka ki na wai.