Same 47 - Ai Vola Tabu (Vakadewa Makawa Vakavoutaki 2021)（FRV21）

Na Lewa ni Kalou e Vuravura Vua nai liuliu ni sere. A nodra Same na luve i Kora.

1Oi kemudou kecega na tamata, dou vakasausau;

dou kaila vua na Kalou e na kaila ni marau.

2Ni sa rerevaki ko Jiova, o Koya sa Cecere Sara,

na Tui levu kei vuravura taucoko.

3O koya ga ena vakamalumalumutaki ira na tamata vei keda,

kei na veimatanitu ki na ruku ni yavada.

4O koya ga ena digitaka na noda i votavota,

Na vanua vinaka sara i Jekope sa lomana ko koya. Sela

5Sa lako cake na Kalou kei na kaikaila,

ko Jiova kei na rorogo ni davui.

6Dou seretaka na vakamolimoli vua na Kalou, seretaka na vakavinavinaka;

dou seretaka na vakamolimoli vua na noda Tui, seretaka na vakavinavinaka.

7Ni sa Tui kei vuravura taucoko na Kalou;

dou vakavinavinaka ka sere e na lomavuku.

8Sa lewai ira na veimatanitu na Kalou;

sa tiko na Kalou e na nona i tikotiko tabu.

9O ira na turaga ni veimatanitu era sa soqoni vata,

o ira na nona tamata na Kalou i Eparaama.

Ni sa nona na Kalou nai sasabai kei vuravura;

sa vakalevulevui cake sara ko koya.