Same 33 - Ai Vola Tabu (Vakadewa Makawa Vakavoutaki 2021)（FRV21）

Na Cecere kei na Vinaka ni Kalou

1Dou rekitaki Jiova koi kemudou sa yalododonu;

ni sa kilikili kei ira na yalodina na vakavinavinaka.

2Vakavinavinaka vei Jiova e na api;

sere vua e na soliteri e tini na kena wa.

3Seretaka vua na sere vou;

qiriqiri vakavinaka ka me rogo levu.

4Ni sa dodonu na vosa i Jiova,

sa ka dina kecega na nona cakacaka.

5Sa vinakata ko koya nai valavala dodonu kei na lewa dodonu;

sa roboti vuravura na loloma i Jiova.

6Sa caka na lomalagi e na vosa i Jiova,

kei na lewena kecega e nai cegu ni gusuna.

7Sa binia vata ko koya na wai ni wasa liwa mei binibini;

sa maroroya na wai titobu e na lololo.

8Me rerevaki Jiova ko vuravura kecega;

me rerevaki koya ko ira kece sa tiko e vuravura.

9Ni sa vosa ko Koya, ka sa yaco;

sa vakarota ko Koya, ka sa vakataudeitaki.

10Sa vukica ko Jiova na nodra bose na veimatanitu me ka wale;

sa cakava na nodra vakanananu na tamata me sega ni yaga.

11Ena tu ga ka sega ni mudu na bose i Jiova,

kei na nanuma ni yalona ki na veitabatamata kecega.

12Sa kalougata na matanitu sa nodra Kalou ko Jiova,

kei na tamata sa digitaka ko koya me nona i votavota.

13Sa rai sobu mai lomalagi ko Jiova;

sa raici ira kecega na luve ni tamata.

14Mai na tikina sa tiko kina ko koya sa vakararai

vei ira kecega era sa tiko e vuravura—

15ko koya ka sa tuliraka na yalodra kecega,

ka vakaraica na nodra i valavala kecega.

16Sa sega e dua na tui me na vuetaki mai na nona mataivalu levu;

sa sega na tamata qaqa me vakabulai e na nona kaukauwa levu.

17A ka wale na ose me bula kina,

sa na sega ni vakabula e dua e na nona kaukauwa levu.

18Raica, na mata i Jiova sa wanonovi ira era sa rerevaki koya,

ko ira era sa nuitaka na nona loloma,

19me vakabula na yalodra mai na mate,

me maroroya na nodra bula e na dausiga.

20Sa waraki Jiova na yaloda;

a noda dauniveivuke kei na noda i sasabai ko koya.

21Ni na rekitaki koya na yaloda,

ni da sa vakararavi e na yacana tabu.

22I Jiova, me tu ga vei keimami na nomuni loloma,

me vaka ni keimami sa nuinui vei kemuni.