Dauveilewai 7 - Ai Vola Tabu (Vakadewa Makawa Vakavoutaki 2021)（FRV21）

Sa Valuti Ira na Kai Mitiani ko Kitione

1A sa sou e na mataka ko Jerupeali, sai koya ko Kitione, kei ira na tamata kecega era tiko vata kaya, ka ra la'ki tiko mai na mata-ni-wai ko Aroti. A sa toka na nodra i tikotiko na kai Mitiani vaka ki na vualiku e na buca ka voleka ki na vanua-cecere ko More.

2A sa kaya vei Kitione ko Jiova, “Na kedra lewe levu na tamata era tiko vata kei iko sa tarovi kina na noqu soli ira na kai Mitiani ki na ligadra, de ra yalolevu vei au ko ira na Isireli, ka kaya, ‘A ligaimami ga sa vakabulai keimami.’

3Vrua 20.8Ia oqo, mo kacivaka vei ira na tamata, ka kaya, ‘O koya sa rere ka yalolailai me lesu yani ko koya mai na Ulunivanua ko Kiliati.’ ” A ra sa lesu yani e le ruasagavulu ka rua na udolu vei ira na tamata, ka sa vo ga e le tini na udolu.

4A sa kaya vei Kitione ko Jiova, “Era sa rui lewe vuqa tiko na tamata; kauti ira sobu ki na wai, kau na vakatovolei ira mai keri mo kila. Ia ko koya ka'u na kaya kina vei iko, ‘Me lako vata kei iko ko koya oqo’, ena lako vata kei iko ko koya; ia ko koya yadua ka'u na kaya kina vei iko, ‘Me kakua ni lako vata kei iko ko koya oqo’, ena sega ni lako ko koya.”

5A sa qai kauti ira sobu na tamata ko koya ki na wai. A sa kaya vei Kitione ko Jiova, “Ko koya yadua e gunu ka sa dramica na wai e na yamena, me vaka sa dramica na koli, mo biuta e na dua na yasana; me ra biu talega ki na dua na yasana ko ira kece era cuva e durudra me ra gunu.”

6Ia na kedrai wiliwili era sa gunusevusevu, ni ra sa takiva na wai mai ligadra ki na gusudra, era sa le tolu na drau na tamata; ia ko ira kece na tamata sa vo, era sa cuva e durudra me gunu wai.

7A sa kaya vei Kitione ko Jiova, “Ni sa mai vei ira na lewe tolu na drau na tamata sa gunusevusevu ka'u na vakabulai kemudou kina, ka soli ira na kai Mitiani ki na ligamu. Ia me ra qai lako ki na nodra veivale ko ira kecega na kena vo.”

8A ra sa kauta e ligadra nai vaqa ko ira na tamata, kei na nodra davui. A sa vakatalai ira kecega na vo ni Isireli ko koya, na tamata yadua me lesu ki na nona valelaca, ka tauri ira ga na lewe tolu na drau na tamata. A sa no yani ki ra e na buca na nodra i tikotiko na kai Mitiani.

9A sa kaya vua e na bogi ko ya ko Jiova, “Mo cavu tu, mo lako sobu ki na nodra i tikotiko, ni'u sa solia oti ki na ligamu.

10Ia kevaka ko sa rere ni lako sobu, mo drau lako sobu vata kei Fura, na nomu tamata, ki na nodra i tikotiko.

11Ko na rogoca kina na ka era sa kaya, ia e muri ena vakaukauwataki na ligamu, ko na qai lako sobu ka valuta na nodra i tikotiko.” Erau sa qai lako sobu ko koya kei Fura, na nona tamata, ki na nodra i yalayala na tamata sa vakaiyaragi e na nodra i tikotiko.

12A ra sa koto e na buca me vaka na vodre na kedrai wiliwili ko ira na kai Mitiani, kei ira na Amalekaiti, kei ira kecega mai na tokalau; kei na nodra kameli sa sega ni wili rawa, na kedrai wiliwili sa vaka na nuku sa no mai matasawa.

13Ia ni sa yaco kina ko Kitione, sa tukuna tiko e dua na tamata e dua na tadra vua na kai nona, ka sa kaya, “Au a raica e dua na tadra, ka raica, sa dua nai buli madrai barile sa vakatoqiqi mai ki na nodra i tikotiko na kai Mitiani, ka sa yacova na valelaca, ka cumuta, ka sa bale kina; a sa vuki vakatobuicu, ka sa bale no kina na valelaca.”

14A sa vosa mai na kai nona, ka kaya, “Sa sega ni ka tani, nai seleiwau ga i Kitione na luve i Joasa, e dua vei ira na Isireli; sa soli ira na kai Mitiani ki na ligana na Kalou, kei na nodra i tikotiko taucoko.”

15Ia ni sa rogoca oti ko Kitione nai tukutuku ni tadra kei na kenai balebale, sa ia na lotu ko koya. A sa lesu tale ki nai tikotiko ni Isireli, ka kaya, “Dou ia, ni sa solia ki na ligamudou ko Jiova na nodra i tikotiko na kai Mitiani.”

16A sa wasea ko koya e le tolu na drau na tamata me tolu na mataivalu, ka solia vei ira yadua na davui; kei na veibilo sa lala, kei na cina me tu e loma ni bilo.

17A sa kaya vei ira, “Dou raici au mada ka kitaka me vaka ka'u sa kitaka. Ka raica, ni'u sa yaco ki nai bili ni nodra i tikotiko, na ka ka'u na kitaka, dou kitaka vakakina.

18Ia ni'u sa uvuca na davui, ko au kei ira kece sa tiko vata kei au, mo dou uvuca talega na davui koi kemudou, ni dou sa vakavolivolita na nodra i tikotiko taucoko, ia dou kaya, ‘E na vuku i Jiova kei Kitione!’ ”

19A sa lako mai ko Kitione, kei ira na tamata e le dua na drau era tiko vata kaya, ki nai bili ni nodra i tikotiko e nai vakatekivu ni vakatawa e na lomaloma ni bogi; era sa qai lesi ira oti ga nai vakatawa. A ra sa uvuca na davui, ka vorolaka na bilo era sa taura e na ligadra.

20Ia era sa uvuca na davui ko ira na mataivalu tolutolu, a ra sa vorolaka na bilo, ka taura na cina e na ligadra i mawi, kei na davui e na ligadra i matau me ra uvuca, ka ra kailavaka, “Ai seleiwau i Jiova kei Kitione!”

21A ra sa tu na tamata yadua e na nona tikina, ni ra sa volita na nodra i tikotiko; ka ra sa cici na mataivalu kece, ka tagi, ka dro.

22Ia era sa uvuca tiko na davui ko ira na lewe tolu na drau, a sa vakauqeti ira na tamata yadua na Kalou me ra ravusebetaki ira na kai nodra e nai seleiwau, io, ko ira na mataivalu taucoko. A ra sa dro na mataivalu ki Peci-sita mai Sireraci, ka yaco ki nai yalayala i Epelimeola, ki Tapaci.

23A ra sa vakasoqoni vata na Isireli mai vei ira na Navitalai, kei ira na Aseri, kei ira kecega na Manasa, ka ra sa cici muri ira na kai Mitiani.

24A sa tala eso na tamata ko Kitione ki na vanua veiulunivanua taucoko ko Ifereimi, ka kaya, “Dou lako sobu me tavaki ira na kai Mitiani, ka la'ki vakatawa eliu na wai ka yaco ki Peci-para, kei na Joritani.” A ra sa vakasoqoni vata ko ira kecega na Ifereimi, a ra sa vakatawa na wai ka yaco ki Peci-para, kei na Joritani.

25A ra sa tauri rau na turaga ni Mitiani, ko Orepi kei Siepi, a ra sa vakamatei Orepi e na dela ni uluvatu ko Orepi, ka ra sa vakamatei Siepi mai nai keli-waini nei Siepi; a ra sa qai cici muri ira na kai Mitiani; ka kauta na uludrau ko Orepi kei Siepi kivei Kitione mai tai kadua ni Joritani.