Isikeli 43 - Ai Vola Tabu (Vakadewa Makawa Vakavoutaki 2021)（FRV21）

Sa Lesu Tale mai ki na Vale Tabu na Serau ni Kalou

1Sa qai kauti au ko koya ki na matamata-ni-koro, io na matamata-ni-koro sa qara donu ki na tokalau.

2Isi 10.3-4,18-19; 11.22-23; Vtaki 1.15Ka raica, na serau ni Kalou ni Isireli sa lako mai e na sala mai na tokalau. Ia na domona sa vaka na domo ni wai levu; ia sa cilavi vuravura na nona i serau.

3A sa rairai tautauvata kei na raivotu ka'u a raica, io me tautauvata kei na raivotu ka'u a raica ni'u a lako mai me vakarusa na koro, ia na raivotu oqo sa tautauvata kei na raivotu ka'u a raica mai na uciwai ko Kipa; ia ka'u sa cuva vakatoboicu.

4Ia na serau i Jiova sa curuma na vale mai na sala ni matamata-ni-koro sa qara donu ki na tokalau.

5A sa tuberi au cake na yalo, ka kauti au ki loma ni bai e loma; ka raica, sa sinai na serau i Jiova e na loma ni vale.

6Au a qai rogoci koya sa vosa vei au mai na loma ni vale; ia sa dua na tamata keirau sa tu vata kaya.

7A sa kaya vei au ko koya, “Ko iko na luve ni tamata, oqo na tikina ni noqu i tikotiko, kei nai tutu ni qeteqete ni yavaqu, ka'u na tiko kina e na kedra maliwa na Isireli ka sega ni mudu, a ra na sega ni vakacacana tale na vale i Isireli na yacaqu tabu, ko ira, se na nodra tui, e na nodra dauyalewa, se na yagodra mate na nodra tui, e na nodra veiyasana cecere.

8Ni ra viritaka vata na nodra i lago kei na noqu i lago, kei na nodra duru ni sogo kei na noqu duru ni sogo, ka sa tu ga na lalaga e na keimami maliwa, era sa vakacacana ga na yacaqu tabu e nai valavala vakasisila era sa kitaka; o koya oqo ka'u sa vakarusai ira kina e na noqu cudru.

9Ia me ra biuta tani mada na nodra dauyalewa, kei na yago mate ni nodra tui, me yawa vei au, ka'u na qai tiko vata kei ira ka sega ni mudu.

10“O iko na luve ni tamata, mo vakatakila na vale ki na vale i Isireli me ra maduataka na nodra caka cala; ia me ra vakarautaka na kenai vakarau.

11Ia kevaka era sa maduataka na ka kece era sa cakava, mo qai vakatakila vei ira na kenai vakarau ni vale, kei na kenai valavala, kei na kenai curucuru ki tuba, kei na kenai curucuru ki loma, kei na kenai vakarau kecega—kei na kenai lesilesi kecega kei na kenai vakarau kecega, kei na kena vunau kecega; ka vola e matadra, me ra vakabauta taucoko kina na kenai vakarau kei na kenai lesilesi kecega, ka cakava ga.

12Oqo na vunau ni vale e dela ni ulunivanua, Sa tabu sara na kenai yalayala kecega e na veitikina kecega. Raica, sai koya oqo na vunau sa baleta na vale.

Nai Cabocabo-ni-soro

13 Lako 27.1,2; 2Vei 4.1 “Ka sa vakaoqo na kenai vakarau ni cabocabo-ni-soro e na kiupiti. Ia na kena kiupiti e dua sa kiupiti e dua ka dua na tikina; ia na botona me rua na kiupiti na kena cecere, ka dua na kiupiti na kena raraba, kei nai yalayala ni bati ni botona me veimama na kiupiti. Ia me vakaoqo na cere ni cabocabo-ni-soro:

14mai na botona e na qele ka yala ki na kena rara lailai me rua na kiupiti, ka dua na kiupiti na kena raraba; ia mai na kena rara lailai ki na kena rara levu me va na kiupiti, ka dua na kiupiti na kena raraba;

15kei na delana dina sa na va na kiupiti; ia me vu mai na tutuna ka yaco ki cake e va na tutuna sa balavu cake e nai cabocabo-ni-soro.

16Ia nai cabocabo-ni-soro me tinikarua na kiupiti na kena balavu, ka tinikarua na kiupiti na kena raraba, me takiveilevu na kena veiyasana va-va.

17Ia na kena rara me tinikava na kiupiti na kena balavu, ka tinikava na kiupiti na kena raraba e na kena veiyasana va-va; ia na belena e volita me veimama na kiupiti; ia na rara e botona me dua na kiupiti e na veiyasana; ia na kenai kabakaba me qara donu ga ki na tokalau.”

18 Lako 29.35-37 A sa kaya vei au ko koya, “Ko iko na luve ni tamata, sa kaya vakaoqo na Turaga ko Jiova: Me vakaoqo nai valavala ni cabocabo-ni-soro: E na siga era na cakava me ra vakacabora kina nai soro kama, ka kureitaka ki delana na dra,

19mo solia vei ira na bete era kawa i Livai mai na vuvale i Setoki, ko ira era sa dautorovi au me ra veiqaravi vei au, sa kaya na Turaga ko Jiova, e dua na luve ni bulumakau mei soro ni valavala ca.

20Ia mo kauta eso na kena dra, ka boroya kina na tutuna balavu cake va-va, kei na muana va-va ni rara, kei na kenai yalayala e na veiyasana. Ia mo sa vakasavasavataka ka sorovaka.

21Mo kauta talega na bulumakau sa kenai soro ni valavala ca, ia ena vakama ko koya e na kena tikina dodonu ni vale mai taudaku ni vale tabu.

22Ia e nai karua ni siga mo vakacabora e dua na luve ni me e sega na kena ca mei soro ni valavala ca; ka ra na vakasavasavataka nai cabocabo-ni-soro, me vaka era sa vakasavasavataka e na bulumakau.

23Ia ni sa oti na nomu vakasavasavataka, mo qai cabora e dua na luve ni bulumakau sa sega na kena ca, kei na dua na sipi tagane mai na qele ni sipi, e dua sa sega na kena ca;

24mo mani vakacabora e na mata i Jiova, ia ko ira na bete me ra kureitaka eso na masima ki na yagodrau, ka qai vakacabora vei Jiova mei soro kama.

25Me bogi vitu mo vakarautaka tiko e na veisiga e dua na me ka me kenai soro ni valavala ca; e dua na luve ni bulumakau, ka dua na sipi tagane mai na qele ni sipi, sa sega na kena ca, ka vakarautaka talega vakakina.

26Me bogi vitu me ra sorovaka tiko nai cabocabo-ni-soro, ka vakasavasavataka, ka vakatabui ira.

27Ia ni sa oti na veibogi ko ya, ka yaco nai kawalu ni siga, me ra qai vakacabora tiko na bete e nai cabocabo-ni-soro na nomudou i soro kama kei na nomudou i soro ni veivinakati; ia ka'u na vinakati kemudou, sa kaya na Turaga ko Jiova.”