Same 63 - Ai Vola Tabu (Vakadewa Makawa Vakavoutaki 2021)（FRV21）

Yalovakacegu Tiko e na Mata ni Kalou A Same i Tevita, ni sa tiko ena vanua lala mai Juta.

1Oi kemuni na Kalou, ko ni sa noqu Kalou; ka'u na sou me'u qaravi kemuni,

sa viagunu vei kemuni na yaloqu;

sa gu ga vei kemuni na lewequ,

e na vanua mamaca ka dauveivakaocataki, sa sega kina na wai.

2Me'u kunea na nomuni kaukauwa kei na nomuni ukuuku,

me vaka ka'u a kunea e na nomuni vale tabu.

3Ni sa vinaka na nomuni loloma ka ca na bula,

ena vakavinavinaka kina vei kemuni na tebenigusuqu.

4Ka'u na vosavinakataki kemuni vakaoqo me vaka ni'u sa bula;

ka'u na dodoka cake na ligaqu e na yacamuni.

5Ena mamau na yaloqu me vaka e na uto ni sui kei na uro,

ena vakavinavinaka talega na tebenigusuqu ni sa reki tiko,

6ni'u sa nanumi kemuni e na noqu i mocemoce,

ka vakanananu vei kemuni e na veitiki ni bogi;

7ni kemuni sa dauvukei au,

ka'u na rekitaka kina na yaloyalo ni tabamuni.

8Sa gumatua na yaloqu ni'u muri kemuni;

sa tokoni au na ligamuni matau.

9Ia ko ira era segata na yaloqu me ra vakarusa

era na lako sobu ki na tikina e ruku i vuravura;

10era na bale e nai seleiwau,

era na kedrai votavota na fokisi.

11Ia na tui ena rekitaka na Kalou;

era na marau tiko ko ira yadua sa bubului vua,

ia ena vagagalutaki na gusudra na vosa lasu.