Aisea 45 - Ai Vola Tabu (Vakadewa Makawa Vakavoutaki 2021)（FRV21）

Sa Kacivi Sairusi na Kalou

1Sa kaya vakaoqo ko Jiova vua sa lumuta ko koya, io vei Sairusi,

o koya ka ligana i matau ka'u sa taura

me'u vakamalumalumutaka na veimatanitu e rukuna,

ka'u na sereka nai vau ni tolodra na tui,

me'u dolava vua na veikatuba—

ka na sega ni sogo tale na kena veimatamata:

2“Au na liutaki iko,

ka vakalogalogavinakataka na yasana sukusukura;

ka'u na basuka na katuba parasa,

ka musumusuka na kenai vakadei kaukamea,

3ka'u na solia vei iko na ka sa kumuni tu e na butobuto,

kei nai yau vuni sa no e na yasana tabogo,

mo kila kina ni sai au, ko Jiova,

na Kalou i Isireli, ka sa kacivi iko e na yacamu.

4E na vuku i Jekope na noqu tamata,

kei Isireli ka'u sa digitaka,

au sa kacivi iko kina e na yacamu,

ni ka'u a vakayacani iko, ka dina ga ni ko sa sega ni kilai au.

5Koi au ko Jiova, ka sa sega e dua tale;

sa sega tale na Kalou, sai au ga.

Ko sa sega ni kilai au, ia ka'u a vakaiyaragitaki iko,

6me ra kila kina na tamata mai nai cadracadra ni mata-ni-siga

kei na kenai dromudromu, ni sa sega ni dua tale, sai au ga.

Koi au ko Jiova, ka sa sega ni dua tale.

7Au sa vakatubura na rarama, ka cakava na butobuto;

au sa vakayacora na sautu, ka vakatubura na ca.

Koi au ko Jiova ka'u sa cakava na ka kecega oqo.

8“Dou vakatauca sobu, na lomalagi, mai cake,

ia me sovaraka na cakacaka dodonu na o;

me gunuva ko vuravura, ka vakatubura mai na bula

kei na cakacaka dodonu me sa tubu vata ga.

Koi au ko Jiova ka'u sa cakava.”

Na Turaga ni Veika Buli kei na Veitabagauna

9 Aisea 29.16; Roma 9.20 “Ena ca ko koya sa veivorati kei Koya ka Buli koya!

Nai caca ni bilo sa duavata kei nai caca ni bilo ni qele!

Me kaya li na tete vua sa tulia, ‘A cava ko sa tulia tiko?’ se,

‘Na nomu cakacaka, sa sega na ligana?’

10Ena ca ko koya sa kaya vei tamana, ‘A cava ko sa vakatubura?’

Se vua na yalewa, ‘A cava ko sa vakasucuma?’ ”

11Sa kaya vakaoqo ko Jiova,

na Yalosavasava ni Isireli, o koya ka buli koya:

“Dou na taroga li vei au na ka ena yaco e na vukudra na luvequ?

Ena vuku talega ni cakacaka ni ligaqu, dou na vakaroti au li?

12Au a buli vuravura,

ka'u a bulia talega na tamata e tiko kina;

io na ligaqu ga sa tevuka na lomalagi,

kei na ka kenai vavakoso kecega ka'u sa vakarota.

13Koi au ka'u a vakauqeti koya e na yalododonu,

ka'u na vakadodonutaka talega na nona sala kecega;

sai koya ga ena tara na noqu koro,

ia ko ira na noqu tamata era sa bobula ena sereka ko koya,

ka na sega ni soli e dua na kedrai sere se i voli,”

sa kaya ko Jiova-ni-lewevuqa.

14Sa kaya vakaoqo ko Jiova,

“Nai yau kei Ijipita, kei na veivoli kei Eciopea,

kei ira na kai Sipa, era tamata lelevu,

ena lako mai vei iko, ia ena nomu ga,

era na muri iko;

era na lako mai ni ra vesu tu; era na cuva vei iko,

era na vakamasuti iko, ka kaya,

‘Sa tiko dina vei iko na Kalou, ka sa sega tale ni dua,

sa sega tale na Kalou.’ ”

15E dina ko ni sa Kalou sa vunitaki kemuni,

na Kalou i Isireli, nai Vakabula.

16Era na madua, era na taqaya vata kece talega,

era na lako tani, ka taqaya vata ko ira era sa matai ni matakau.

17Ia ko ira na Isireli ni ra tiko kei Jiova

era na vakabulai e na bula e sega ni mudu;

dou na sega ni madua se taqaya

ka yacova na gauna e sega ni mudu.

18Ni sa kaya vakaoqo ko Jiova,

ko koya ka bulia na lomalagi

(na Kalou!),

ko koya ka bulia na vuravura ka cakava

(a sa vakataudeitaka ko koya;

a sa sega ni cakava me lala,

sa bulia ga me tawa!):

“Koi au ko Jiova, ka sa sega e dua tale.

19Sa sega ni ka'u vosa vuni,

e na dua na tikina butobuto e vuravura;

ka'u a sega ni kaya vei ira na kawa i Jekope,

‘Mo dou qarai au mada.’

Koi au ko Jiova ka'u sa vosa dina,

ka'u sa tukuna na ka dodonu.

Ko Jiova kei na Veimatakau Ceuceu ni Papiloni

20“Dou soqoni vata ka lako mai;

dou toro voleka mai, koi kemudou na lewe ni veivanua sa dro bula!

Sa sega na nodra vuku—

ko ira era sa colata na kau ni nodra matakau ceuceu,

ka sa masu ki na kalou

sa sega ni vakabulai ira rawa.

21Dou tukutuku ka wasea na nomudou leqa;

io, me ra bose vata ga!

Ko cei ka vakaraitaka makawa na ka oqo?

Ko cei ka tukuna e na gauna eliu?

A sega li ni koi au, ko Jiova?

Ka sa sega e dua tale na Kalou, sai au ga;

na Kalou yalododonu kei nai Vakabula;

sa sega e dua tale, koi au ga.

22“Dou golevi au mai, mo dou vakabulai,

nai yalayala kecega kei vuravura!

Ni sai au ga na Kalou, ka sa sega e dua tale.

23 Roma 14.11; Fpai 2.10,11 Au a cavuti au ni'u sa bubului;

sa lako yani mai na gusuqu e na yalodina

na vosa ka na sega ni vakalesui tale:

‘Ena tekiduru vei au na duru ni tamata vakaaduaga,

ena vakatusai au na yame ni tamata kecega.’

24Ena kaya na tamata,

“Sai Jiova ga ka'u sa donu kina ka kaukauwa;

era na lako mai vei Koya ga ko ira na tamata;

ia ko ira kecega era sa cudru vua

era na madua.

25Era na vakadonui e na vuku i Jiova,

ko ira kecega na kawa i Isireli ka lagilagi kina.”