1 Tui 7 - Ai Vola Tabu (Vakadewa Makawa Vakavoutaki 2021)（FRV21）

Na Vale-ni-tui nei Solomoni kei na Veivale Tale Eso

1A sa yabaki tinikatolu na nona tara tiko kina na nona vale ko Solomoni, ka sa vakaotia taucoko na nona vale.

2A sa tara talega na Vale ni Veikau ni Lepanoni. Na kena balavu e dua na drau na kiupiti, kei na kena raraba e limasagavulu na kiupiti, kei na kena cecere e tolusagavulu na kiupiti, e na domo ni duru sitari sa yatu va, ka sa so nai coka sitari e na domo ni veiduru.

3A sa ubi e cake e na sitari e na dela ni veicoka, sa no e na domo ni duru e vasagavulu ka lima, sa tauyatinikalima e na yatu yadua.

4A sa tolu na yatu sogo cicila me rai kina, a sa veidonui na yasana me rai kina e na yatu e tolu.

5A sa takiveilevu nai sogo cicila kecega, kei na veiduru talega; a sa veidonui nai sogo cicila me rai kina e na yatu e tolu.

6A sa cakava ko koya na Olo ni Duru Lelevu, a kena balavu e limasagavulu na kiupiti, kei na kena raraba e tolusagavulu na kiupiti. A sa tu e matadra na varada, ka so na duru kei nai coka levu sa tu e matadra.

7A sa qai cakava na Olo ni Tikotiko Vakaturaga ka me tu kina ka daulewa mai kina ko koya, io na Olo ni Veilewai. A sa botana e na sitari mai na yasa ni rara e dua ki na kenai karua.

8 1Tui 3.1 Ia na nona vale ka dautiko kina ko koya, sa dua tale na kena lomanibai, na kena bai na varada, a sa vakakina na kenai cakacaka. A sa cakava talega ko Solomoni e dua na vale me vaka na varada oqo me nona na luve i Fero, o koya ka watina.

9Sa vatu talei oqori kecega, me vaka nai vakarau ni vatu sa ta, sa lauvaro e nai varo, e loma, e sau talega, io mai na kena yavu ka yaco ki na dela ni lalaga, ka mai taudaku vaka ki na lomanibai levu.

10Ia sa vatu talei na kena yavu, na vatu lelevu, na vatu e tini na kena kiupiti, kei na vatu e walu na kena kiupiti.

11Ia e delana sa so na vatu talei, me vaka nai vakarau ni vatu sa ta, ka so na sitari.

12Ia na lomanibai levu sa vakavolivolita, sa yatu tolu ni vatu sa ta; ka dua na yatu ni coka sitari, ia me bai ni rara e loma ki na vale i Jiova, kei na varada ni vale.

Ko Urami na Matai ni Parasa

13A sa talaki ko Solomoni ka vakauti Urami mai Taia.

14O koya na luvena e dua na yada e na yavusa i Navitalai, a kai Taia ko tamana, ka sa matai ni parasa. A tamata vuku sara ko koya, ka daulomakasa, ka kena matai dina ni ka parasa kecega. A sa lako mai ko koya vei Solomoni na tui, ka kitaka na nona cakacaka kecega.

Na Duru Parasa e Rua ni Valenisoro(2 Veigauna 3.15-17)

15A sa cakava e rua na duru parasa, sa tauyatinikawalu na kiupiti na kedrau cecere; a sa vivia vei rau yadua e dua na dali sa tinikarua na kena kiupiti.

16A sa cakava e na parasa sa vakawaicalataki e rua na domodomo, me viri ki dela ni veiduru. A kena cecere e dua na domodomo e lima na kiupiti, ia na kena cecere na domodomo kadua e lima na kiupiti.

17Na lawa veivolavolai, kei na sinucodo sa muloci, ki na veidomodomo sa tu e dela ni veiduru; e vitu ki na dua na domodomo, ka vitu ki na domodomo kadua.

18A sa cakava na veiduru, ka sa rua na yatu me volita e taudaku ni lawa, me ubia e nai ukuuku e vaka na pomekaraneti na domodomo, ko ya sa tu e delana; a sa cakava vakakina ki na domodomo kadua.

19A sa caka na domodomo sa tu e na dela ni veiduru, me vaka na se ni viavia e na varada, sa va na kena kiupiti.

20Ia na domodomo e na dela ni duru ruarua sa tu mai cake mai na tikina sa tolo levu, sa donuya na lawa; ia nai ukuuku e vaka na pomekaraneti, e rua na drau, sa yatuni ka vivia na domodomo ruarua.

21A sa vakaduria ko koya na duru e na varada ni vale-ni-soro. A sa vakaduria na duru i matau, ka vakatoka na yacana ko Jakini; a sa vakaduria na duru i mawi, ka vakatoka na yacana ko Poasa.

22A sa caka na domo ni duru me vaka na se ni viavia. A sa oti na cakacaka ni duru ruarua.

Na Taqe Parasa(2 Veigauna 4.2-5)

23A sa cakava ko koya e na parasa sa vakawaicalataki e dua na taqe levu ka mokimokiti, e tini na kiupiti mai na batina e dua ki na batina kadua, ka sa lima na kiupiti na kena cecere. Ke sa voliti e na dua na wa, sa na tolusagavulu na kena kiupiti.

24A sa so na vago sa volita e ruku ni batina, e tini e na dua na kiupiti, ka volita sara na taqe levu. Sa vakawaicalataki na vago ka sa rua na kenai yatu.

25A sa taqa e deladra na bulumakau e tinikarua, e tolu sa vakanamata ki na vualiku, ka tolu sa vakanamata ki na ra, ka tolu sa vakanamata ki na ceva, ka tolu sa vakanamata ki na tokalau. Sa toka e cake e na deladra na taqe levu, a sa qara ki loma na mudra kecega.

26Ia na kena vavaku, sa tautauvata kei na raba ni liga, a sa caka na batina me vaka na bati ni bilo, e na se ni viavia; ka sa rauta e dua na oba ka lima na udolu na qaloni (40,000 na lita).

Nai Tutu Parasa

27A sa cakava ko koya e tini nai tutu parasa; e va na kiupiti na kena balavu e dua nai tutu, ka va na kiupiti na kena raraba, ka tolu na kiupiti na kena cecere.

28Ia sa caka vakaoqo nai tutu: sa vakatutuna, ia na veitutuna sa no e na maliwa ni kau sa vakababa;

29ia e na veitutuna sa no e na maliwa ni kau sa vakababa, sa toka kina eso na laione, na bulumakau, kei na jerupi. Ia e cake, e na dela ni kau vakababa, sa dua na botona; ia e ruku ni laione kei na bulumakau sa vakaikuritaki kina eso na cakacaka mamare.

30Era sa tau ya-va na yavadra parasa nai tutu kecega, kei na kau parasa me cawiri kina; ia sa vakaitokoni na tutuna vava. E ruku ni taqe kei na yasana kecega sa vakaikuritaki, sa so kina nai totoko sa vakawaicalataki.

31Ia na kena dreke sa tu ki loma ni domodomo, ka e cake, sa dua na kiupiti. Ia sa momokiti na kena dreke, me vaka na cakacaka ni tutu, a sa dua veimama na kiupiti. A sa ceu na kena dreke kei na belena, a sa sega ni momokiti, sa rivirivi me va na yasa.

32Ia e ruku ni belena sa va na yavana. A sa vakamauti ki nai tutu na kau e cawiri kina na yavana; ia na kena cecere e dua na yavana sa dua veimama na kiupiti.

33Ia na kenai cakacaka ni yavana, sa vaka na kenai cakacaka ni yavana na qiqi ni tamata; sa vakawaicalataki kecega na kau sa cawiri kina, kei na tikina sa curu kina na ka sa cawiri kina, kei na batina, kei na kenai sa.

34A sa tau ya-va na kenai totoko e na dua nai tutu e na tutuna vava. Sa caka vata sara na veitotoko kei nai tutu.

35Ia e na dela ni tutu, sa dua na domodomo sa veimama na kiupiti na kena cecere; ia e dela ni tutu, na kenai vakababa, kei na belena sa caka vakakina.

36A sa ceuta ko koya e na veitikina raraba e na kenai vakababa, kei na belena, eso na jerupi, na laione, kei na vuni niu-sawa, a sa vakarauvatani vakavinaka kecega, kei na ka sa vakaikuritaki voli kina.

37Sa cakava vakaoqo nai tutu e tini. Sa tautauvata na kedratou i tulituli, na kedratou i vakarau kei na kedratou levu.

38 Lako 30.17-21 Sa cakava talega ko koya e tini na taqe parasa. E dua na taqe sa rauta e tolu na drau na qaloni, ka sa tau ya-va na kiupiti na taqe yadua. A sa tu yadua na taqe e nai tutu e tini.

39A sa vakatikora e lima nai tutu ki na yasa i matau ni vale, ka lima ki na yasa i mawi ni vale; a sa viritu na taqe levu e na yasa i matau ni vale vaka ki na tokalau, ka donuya na ceva.

Nai Ukuuku e Loma ni Valenisoro(2 Veigauna 4.11—5.1)

40A sa cakava na taqe ko Urami, kei nai sivi me kau tani kina na dravusa, kei na beseni me kau kina na dra me kureitaki. A sa vakaotia ko Urami na cakacaka kecega sa cakava ko koya vei Solomoni na tui, ki na vale i Jiova;

41e rua na duru, kei nai ukuuku momokiti e na domodomo sa tu e dela ni duru ruarua; ka rua na lawa, me ubia nai ukuuku momokiti e rua e na domodomo sa tu e na dela ni duru ruarua;

42kei nai ukuuku e va na drau e vaka na pomekaraneti, ki na lawa ruarua; e rua na yatu i ukuuku e vaka na pomekaraneti ki na dua na lawa, me ubia nai ukuuku momokiti e rua e na domodomo sa tu e na dela ni duru ruarua;

43kei nai tutu e tini, kei na taqe e tini e na deladratou nai tutu;

44ka dua na taqe levu, kei na bulumakau e tinikarua e ruku ni taqe levu ko ya;

45kei na kuro, kei nai sivi me kau tani kina na dravusa, kei na beseni me kau kina na dra me kureitaki, ia sa parasa solo vakavinaka nai yaya kecega sa cakava ko Urami vei Solomoni na tui, me yaga e na vale i Jiova.

46Sa cakava oqori na tui e na buca mai Joritani, e na vanua tete e na maliwa i Sukoci kei Saricani.

47A sa sega ni vakarautaka na bibi ni bilo kecega ko Solomoni, ni sa rui levu; ka sega ni kilai na bibi ni parasa sa tu kina.

48 Lako 25.23-30; 30.1-3 A sa cakava ko Solomoni nai yaya kecega sa tu e na vale i Jiova: nai cabocabo-ni-soro koula, kei na tepeli koula sa dautu kina na madrai dauraici,

49Lako 25.31-40kei nai tutu-ni-cina koula dina sa caka kina na senikau, e lima e nai matau, ka lima e nai mawi, e na mata ni loqi ni Vosa, kei na cina kei na saga-ni-buka koula;

50kei na bilo, kei nai koti-ni-cina, kei na beseni me kau kina na dra me kureitaki, kei nai taki, kei na miqa ni ka boi vinaka, e na koula dina; kei nai ruberube ni sogo ni vale e loma, na tikina tabu sara, io mei sogo ni vale, ko ya na vale-ni-soro, e na koula.

51 2Samu 8.11; 1Vei 18.11 A sa caka oti na cakacaka kecega ka cakava ko Solomoni na tui ki na vale i Jiova. A sa kauta ki loma ko Solomoni na ka sa vakatabuya me nei Jiova ko Tevita na tamana, na siliva, kei na koula, kei nai yaya, sa viritu vata kei nai yau ni vale i Jiova.