Esiteri 9 - Ai Vola Tabu (Vakadewa Makawa Vakavoutaki 2021)（FRV21）

Sa Vakarusai na Kedra Meca na Jiu

1Ia e nai katinikarua ni vula, na vula ko Eta, e nai katinikatolu ni siga ni vula ko ya, ni sa voleka ni vakayacori nai vakaro ni tui kei na nona i lesilesi, e na siga era a nakita me rawai ira kina na Jiu ko ira na nodra meca, ia sa qai vuki me duatani, ka ra sa lewai ira kina era cati ko ira na Jiu;

2era sa soqoni vata ko ira na Jiu e na nodra veikoro e na yasana kecega nei Asuerosi na tui, me vakamatei ira era via vakacacani ira. Ka sa sega na tamata sa gumatua vei ira, ni sa kani ira kecega na tamata na rere e na vukudra.

3Ia ko ira kecega era turaga ni veiyasana, kei ira na turaga sa liu, kei ira na kovana ni veiyasana, kei ira na ovisa ni tui, era sa vukei ira na Jiu, ni sa kani ira na rere e na vuku i Motekai.

4Ni sa yaco ko Motekai me tamata dokai e na vale-ni-tui, ka sa kuruvaki ki na veiyasana kecega na kenai rogorogo, ni sa tubu me dokai vakalevu cake tikoga na tamata ko Motekai.

5Ka ra sa yaviti ira kece na nodra meca ko ira na Jiu e nai seleiwau, ka ia na veivakamatei, kei na veivakarusai, ka ra veitalia e na ka era cakava vei ira era sa cati ira.

6Ka ra sa vakamatea ka vakarusa ko ira na Jiu, e le lima na drau na tagane mai Susa na koro vakaturaga.

7Ka ra sa vakamatei Parisadaca, kei Talifoni, kei Asepaca,

8kei Poraca, kei Atelia, kei Aritaca,

9kei Pamasita, kei Arisai, kei Aritai, kei Vaisaca,

10eratou lewe tini na tagane na luve i Amani na luve i Emitaca ka tagane, na nodra meca na Jiu; ia era sa sega ni kovea e dua na nodra ka.

11E na siga ko ya sa kaya vua na tui na kedrai wiliwili era sa vakamatei mai Susa na koro vakaturaga.

12A sa kaya na tui vei Esiteri na ranadi, “Sa vakamatea ka vakarusa ko ira na Jiu e le lima na drau na tagane e Susa na koro vakaturaga, kei iratou na luve i Amani eratou lewe tini; ia ka cava beka era sa kitaka e na veiyasana ni tui sa vo? Ia ka cava ko sa masuta? Ena soli ga vei iko. Se cava tale na ka ko sa kerea? Ena vakayacori ga.”

13A sa kaya ko Esiteri, “Kevaka sa vinaka vua na tui, me soli ga vei ira na Jiu era sa tiko e Susa me ra kitaka talega e na mataka me vaka na ka sa lesi me caka edaidai, ia me vakalilici e na kau na luve i Amani eratou lewe tini.”

14Sa qai kaya ko koya na tui me caka vakakina. A sa tukuni nai vakaro mai Susa, ka ra sa vakalilici iratou na luve i Amani eratou lewe tini na tagane.

15Ka ra sa soqoni vata ko ira na Jiu mai Susa e nai katinikava ni siga talega ni vula ko Eta, ka vakamatea e lewe tolu na drau na tagane mai Susa; ia era sa sega ni kovea e dua na ka era taukena.

16Ia ko ira na Jiu sa vo e na veiyasana ni tui, era sa soqoni vata, ka veitotaki me ra bula, ka vakacegu e na vuku ni nodra meca, ka vakamatea e le vitusagavulu ka lima na udolu, ka ra sa sega ni kovea e dua na nodra ka,

17e nai katinikatolu ni siga ni vula ko Eta; ia e nai katinikava ni siga ni vula ko ya era sa vakacegu, ka lokuca me siga ni kana magiti kei na marau.

18Ia ko ira na Jiu mai Susa era sa soqoni vata e nai katinikatolu ni siga, kei na kenai katinikava; ia na kenai katinikalima era sa vakacegu, ka lokuca me siga ni kana magiti kei na marau.

19Ia ko ira na Jiu mai na veikoro lalai, era sa tiko e na veikoro sa sega ni vakabai, era sa lokuca nai katinikava ni siga ni vula ko Eta me siga ni marau kei na kana magiti, kei na siga vinaka, kei na veisoliyaka na ka.

Na Solevu ni Purimi

20A sa vola na veika oqo ko Motekai, ka sa vakauta na veivola kivei ira kece na Jiu e na veiyasana kecega ni tui ko Asuerosi, vei ira era voleka kei ira era yawa,

21me vakataudeitaka vei ira, me ra vakabauta nai katinikava ni siga ni vula ko Eta, kei na kenai katinikalima talega, e na veiyabaki,

22me kena siga era vakacegu kina ko ira na Jiu mai vei ira na nodra meca, kei na vula sa vukici kina na nodra rarawa me reki, kei na nodra tagi me olodei, me ra lokuca me siga ni kana magiti kei na reki, kei na veisoliyaka na ka, kei na soli ka-ni-loloma vei ira na dravudravua.

23A ra sa bolea ko ira na Jiu me ra cakava na ka era sa vakatekivuna, ka me vaka sa vola vei ira ko Motekai.

24A sa nakita na ca vei ira na Jiu, io me vakarusai ira, ko Amani na luve i Emitaca ka tagane, na luve i Ekaki, na nodra meca na Jiu, ni sa ia na Puri—oqori na “vakawiri madigi”—me vakacacani ira ka vakarusai ira.

25Ia ni sa lako mai ko Esiteri vua na tui, sa vakarota ko koya e nai vola me vakalesui kivei koya na vere ca sa bukiveretaki ira kina na Jiu, ka me ratou vakalilici e na kau ko koya kei iratou na luvena tagane.

26O koya oqo sa vakatokai kina na siga oqori na Purimi, mai na vosa na Puri. O koya e na vuku ni vosa kecega ni vola oqo, kei na ka era sa kunea e nai valavala oqo, kei na ka sa yacovi ira,

27era sa lesia ko ira na Jiu, ka bolea e na vukudra, kei na vukudra na nodra kawa, kei na vukudra kecega era sa mai kabiti ira, me kakua kina ni mudu, ka me ra vakabauta ga na siga ruarua oqo me vaka na vosa sa volai kina; kei na kenai lokuloku e na veiyabaki kecega;

28ia me daunanumi ka me vakabau na siga ruarua oqo e nai tabatamata kecega, vei ira na veivuvale kecega, e na veiyasana kecega, kei na veikoro kece; ka me kakua ni mudu na siga ni Purimi oqo vei ira na Jiu, se me oti na kenai vakananumi vei ira na nodra kawa.

29A sa volavola vakaturaga sara ko Esiteri na ranadi, na luve i Epaieli, kei Motekai na Jiu, me vakataudeitaka nai karua ni vola oqo e na vuku ni Purimi.

30A sa vakauta nai vola vei ira kecega na Jiu, ki na yasana e dua na drau ka ruasagavulu ka vitu e na matanitu i Asuerosi, a sa kau vata kei na vosa ni veivakacegui kei na vosa dina,

31me vakataudeitaka na siga ruarua ni Purimi me ia kina e na kena gauna, me vaka sa vakadreta vei ira ko Motekai na Jiu kei Esiteri na ranadi, me vaka talega na nodrau i lesilesi e na vukudra, e na vukudra talega na nodra kawa, io e na vuku ni lolo kei na tagi.

32Ka sa vakataudeitaka na ka oqo e na vuku ni Purimi na lewa i Esiteri; a sa volai e nai vola.