1 2Tui 25.8-10; 2Vei 36.17-19; Jere 52.12-14 Kemuni na Kalou, era sa curu mai ki na nomuni vanua ko ira na kai tani;
era sa vakadukadukalitaka na nomuni vale tabu;
era sa vakacacani Jerusalemi me sa bukebuke walega.
2Era sa solia na yago mate ni nomuni tamata
me kedra na manumanu vuka,
kei na lewedra na nomuni tamata yalododonu vei ira na manumanu kei vuravura.
3Era sa livia na kedra dra me vaka na wai
ka sa voliti Jerusalemi,
ka sa sega me buluti ira.
4Keimami sa rogo ca vei ira sa tiko voleka vei keimami,
ka sa vakalialiai ka dredrevaki vei ira era tiko voleka vei keimami.
5Kemuni Jiova, ena vaka beka evei na kena dede? Ena sega ni mudu beka na nomuni cudru?
Ena waqa tiko beka na nomuni vuvu me vaka na bukawaqa?
6Sovaraka yani na nomuni cudru vei ira na veimataqali
era sa sega ni kilai kemuni,
vei ira talega na veimatanitu
era sa sega ni masuta na yacamuni.
7Ni ra sa kani Jekope oti,
ka vakacacana na nona i tikotiko.
8Mo ni kakua ni nanuma na nodra caka cala na neimami qase ka cudruvi keimami kina;
ia me taumada vakatotolo vei keimami na nomuni yalololoma levu,
ni keimami sa vakalolomataki vakalevu.
9Kemuni na Kalou na neimami vakabula, mo ni vukei keimami,
me rogo kina na yacamuni;
ka vakabulai keimami, ka vosota na neimami valavala ca,
e na vuku ni yacamuni.
10A cava era kaya kina na veimatanitu,
“Sa evei na nodra Kalou?”
Me kilai vei ira na veimatanitu e na mata i keimami
ni sa cudruvaki na kedra dra na nomuni tamata sa vakadavei.
11Me yaco mada ki na matamuni na nona vutugu na tamata sa vesu;
me vaka na kaukauwa ni ligamuni mo ni vakabulai ira era sa lesi me mate.
12Ia mo ni sauma vakavitu vei ira na tiko voleka vei keimami
e na vuku ni nodra vosa ca, era sa vosacataki kemuni kina, na Turaga!
13Ia koi keimami na nomuni tamata kei na sipi ni nomuni vanua veico,
keimami na sega ni mudu ni vakavinavinaka vei kemuni;
keimami na tukuna na ka mo ni vakavinavinakataki kina ki nai tabatamata kecega.
Who We AreWhat We EelieveWhat We Do
2025 by iamachristian.org,Inc All rights reserved.
