Tiko mai na Lekutu 25 - Ai Vola Tabu (Vakadewa Makawa Vakavoutaki 2021)（FRV21）

Na Nodra Dauyalewa na Isireli mai Moapi

1A sa tiko mai Sitimi ko ira na Isireli, a ra sa qai dauveibutakoci kei ira na goneyalewa ni Moapi ko ira na tamata.

2Ka ra sa kacivi ira na tamata ki nai soro vei ira na nodra kalou, a ra sa kana na tamata, ka cuva ki na nodra kalou na yalewa.

3A ra sa kabiti Peali-piori na Isireli. A sa waqa mai na cudru i Jiova vei ira na Isireli.

4A sa kaya vei Mosese ko Jiova, “Mo tauri ira kecega era sa turaga vei ira na tamata, ka vakarubeci ira e mata-ni-siga vei Jiova, me mudu kina na cudru i Jiova vei ira na Isireli.”

5A sa kaya ko Mosese vei ira na mataveilewai e Isireli, “Dou dui vakamatea yadua na nona tamata era sa kabiti Peali-piori.”

6Ka raica, sa lako mai e dua vei ira na Isireli, ka kauta mai kivei ira na wekana e dua na yalewa ni Mitiani, e na mata i Mosese, e matadra talega nai soqosoqo taucoko ni Isireli, ni ra sa tagi tiko mai na katuba ni vale ni veitavaki.

7Ia ni sa raica ko Finiasi na luve i Iliesa, na luve i Eroni na bete, sa tucake mai vei ira nai soqosoqo, a sa taura e dua na moto,

8ka muri koya na tamata ni Isireli ki na valelaca, ka sa cokaveituituitaki rau, na tamata ni Isireli, kei na yalewa e na ketena. A sa mudu kina na mate levu vei ira na Isireli.

9Ia ko ira ka mate e na mate levu, era le rua na oba ka va na udolu (24,000).

10A sa vosa vei Mosese ko Jiova, ka kaya,

11“Ko Finiasi, na luve i Iliesa, na luve i Eroni na bete, sa muduka na noqu cudru vei ira na Isireli, ni sa gumatua ni totaki au ko koya e na kedra maliwa, ia ka'u a sega kina ni vakarusai ira na Isireli e na noqu vuvu.

12O koya mo kaya kina, ‘Raica, ka'u sa cakava vua na vosa ni noqu veiyalayalati me kalougata.

13Ia ena nona ga kei ira na nona kawa talega na vosa ni yalayala me ra taura na cakacaka vakabete ka tawa mudu, ni sa gumatua ko koya me totaka na nona Kalou ka ni sa sorovaki ira na Isireli.’ ”

14Na yacana na tamata ni Isireli ka vakamatei vata kei na yalewa ni Mitiani ko Simiri, na luve i Salu, ka turaga ni vale ni nodra qase na Simione.

15Ia na yaca ni yalewa ni Mitiani ka vakamatei ko Kosipi, na luve i Suri, ka turaga ni mataqali ko koya mai na dua na vale ni nodra qase mai Mitiani.

16A sa vosa vei Mosese ko Jiova, ka kaya,

17“Mo vakararawataki ira na kai Mitiani, ka mo dou mokuti ira,

18ni ra sa vakararawataki kemudou e na nodra lawaki, era sa vereti kemudou kina e na vuku i Piori, kei na vuku i Kosipi, na luve ni dua na turaga ni Mitiani, na ganedra, ko koya ka vakamatei e na siga ni mate levu e na vuku i Piori.”