1 Samuela 8 - Ai Vola Tabu (Vakadewa Makawa Vakavoutaki 2021)（FRV21）

Era Kerea na Isireli me Dua na Nodra Tui

1Ia ni sa qase ko Samuela, sa lesi rau na luvena me rau turaga-ni-lewa vei ira na Isireli.

2Ia na yaca ni nona ulumatua ko Joeli, kei na yacana na kenai karua ko Epaia; erau sa turaga-ni-lewa koi rau mai Peri-sepa.

3A rau sa sega ni muria na nona i valavala koi rau na luvena, ka rau sa vuki tani me guta nai yau. A rau sa taura nai solisoli ni veivaqumi ka rau sa vakatanitaka kina na lewa.

4A ra sa soqoni vata ko ira kecega na qase ni Isireli, ka lako vei Samuela ki Rama,

5Vrua 17.14a ra sa kaya vua, “Raica, ko sa qase mai, ia na luvemu erau sa sega ni muria na nomu i valavala. Mo lesia mada vei keda e dua na tui me lewai keda me vakataki ira na veimatanitu kecega.”

6Ia sa ca vei Samuela na ka oqo ni ra sa kaya, “Solia vei keda e dua na tui me lewai keda.” A sa masu vei Jiova ko Samuela.

7Ka sa kaya vei Samuela ko Jiova, “Mo vakarorogo vei ira na tamata e na ka kecega era sa kaya vei iko, ni ra sa sega ni beci iko, ia sai au ga era sa beca, me'u kakua ni nodra tui koi au.

8Me vaka na ka kecega era sa cakava mai na siga ka'u a kauti ira cake mai kina mai Ijipita ka yacova na siga oqo, ni ra sa biuti au ka qarava na veikalou tani, era sa kitaka vaka talega kina vei iko.

9Ia oqo, mo vakarorogo ki na nodra vosa; ia, mo vunauci ira vakabibi sara, ka vakatakila vei ira na nona i valavala na tui sa na lewai ira.”

10A sa tukuna kecega na vosa i Jiova ko Samuela vei ira na tamata era masuta vua me dua na nodra tui.

11A sa kaya ko koya, “Oqo na nona i valavala na tui sa na lewai kemuni: ena kauti ira na luvemuni ko koya, ka lesia me ra yaga ki na nona qiqi-ni-turaga ka me ra nona tamata dauvodo ose, ka eso me ra cici ka liutaka na nona qiqi-ni-turaga.

12Ena lesia eso me ra turaga ni yayaudolu, ka turaga ni yayalimasagavulu, ka eso me cukita na nona veiwere e nai siviyara ka tamusuka talega na nona sila, ka me ra mataitaka na nona i yaya ni valu kei nai yaya ni nona qiqi-ni-valu.

13Ena kauti ira ko koya na nomuni goneyalewa me ra caka kakana kamikamica, ka me ra dauvakasasaqa talega, ka dauvavavi.

14Ena kauta talega ko koya na ka vinaka kece ni nomuni veiwere kei na nomuni veiloga-ni-vaini kei na nomuni veiolive, ka na solia vei ira na nona tamata.

15Ena kauta na kenai katini ni nomuni sore ni kau kei na nomuni veiloga-ni-vaini, ka solia vei ira na nona vakailesilesi kei ira na nona tamata.

16Ena kauti ira talega na nomuni tamata, kei ira na nomuni vada, kei ira na nomuni cauravou vinaka, kei na nomuni asa, me ra yaga e na nona cakacaka.

17Ena kauta ko koya nai katini ni nomuni sipi, ia koi kemuni e na nona tamata.

18Kemuni na qai tagi sara e na siga ko ya e na vuku ni nomuni tui kemuni sa digitaka me nomuni; ena qai sega ni rogoci kemuni ko Jiova e na siga ko ya.”

Vakadonuya ko Jiova na Nodra Kerekere na Isireli

19A ra sa bese ga na tamata ni vakarogoca na vosa i Samuela. A ra sa kaya, “E segai! Ia me dua ga na neimami tui,

20me keimami sa vakataki ira talega na veimatanitu kecega, me rawa ni lewai keimami na neimami tui, ka liutaki keimami, ka vala e na neimami i valu.”

21Ni sa rogoca kecega na nodra vosa na tamata ko Samuela, a sa la'ki tukuna e na daliga i Jiova.

22A sa kaya vei Samuela ko Jiova, “Mo vakarorogo ki na nodra vosa, ka bulia vei ira e dua na tui.” A sa kaya vei ira na Isireli ko Samuela, “Ni lesu na tamata yadua ki na nomuni koro.”