Aisea 2 - Ai Vola Tabu (Vakadewa Makawa Vakavoutaki 2021)（FRV21）

Na Vale i Jiova e na Gauna mai Muri

1Na vosa ka vakatakilai vei Aisea na luve i Emosi e na vuku i Juta kei Jerusalemi.

2Sa na yaco e na gauna mai muri,

ni na vakataudeitaki na ulunivanua ni vale i Jiova

me sivia na veiulunivanua,

ena vakaceceretaki ka me lolovira na veiulu-ni-koro;

ka ra na kui yani kina na veimatanitu kecega.

3A ra na lako na tamata e lewe vuqa, ka kaya,

“Me da mai la'ki cabe cake ki na ulunivanua i Jiova,

ki na vale ni Kalou i Jekope;

ena vakavulica vei keda ko koya na nona i valavala,

ia eda na muria na nona sala.”

Ni na lako yani mai Saioni na vunau,

kei na vosa i Jiova mai Jerusalemi.

4 Joeli 3.10; Maika 4.3 Ia, ena ia na veilewai e na vuku ni veimatanitu,

ka na vunauci ira na veimataqali e vuqa;

ka ra na tukitukia na nodra i seleiwau mei bati ni siviyara,

kei na nodra moto mei sele ni samaki;

ena sega ni lave i seleiwau e dua na matanitu ki na dua tale na matanitu,

a ra na sega ni vulica tale nai valu.

Cudruvi ko Ira na Dokadoka ka Viavialevu

5Koi kemudou na lewe-ni-vuvale i Jekope,

me da mai lako voli e na rarama i Jiova!

6Ka ni kemuni a biuti ira na nomuni tamata

na vale i Jekope,

ni sa tawa na nodra vanua e na daurairai mai na tokalau,

kei ira na daucaka mana lasu me vakataki ira na kai Filisitia,

ka ra sa muria na nodra i valavala na kai tani.

7Ia na nodra vanua talega sa sinai e na siliva kei na koula,

ka sa sega ni wili rawa na nodra i yau;

ka sa ka levu na ose e na nodra vanua

ka sa sega ni wili rawa na nodra qiqi-ni-tamata.

8Ka sa oso na nodra vanua e na matakau;

era sa cuva ki na cakacaka ni ligadra,

ki na veika sa cakava nai qaqalo ni ligadra.

9A sa cuva kina na tamata wale,

ka sa vakayalomalumalumutaki koya na tamata turaga—

mo ni kakua ni vosoti ira!

10 Vtaki 6.15; 2Cesa 1.9 Mo curuma na qara vatu,

ka vunitaki iko e na qele

mai na ka rerevaki i Jiova,

kei nai ukuuku ni nona ka vakaturaga.

11Na mata viavialevu ni tamata ena vakayalomalumalumutaki,

kei na nodra viavialevu na tamata ena vakabalei sobu;

ia ena cecere duaduaga ko Jiova

e na siga ko ya.

12Ia ena dua na siga i Jiova-ni-lewevuqa

vei ira kecega era sa yalolevu ka viavialevu,

kei ira kecega era sa vakacecerei;

ia ena vakamalumalumutaki.

13Ena tauca kece talega na sitari ni Lepanoni,

sa cecere ka laveti cake;

kei na oki kecega ni Pasani;

14kei na ulunivanua cecere kecega,

kei na ulu-ni-koro kecega sa cecere cake;

15kei na vale ni valu cecere kecega,

kei na bai ni valu kecega;

16kei na waqa kecega ni Tasisi,

kei nai yaya kecega e dauvinakati.

17Ia ena vakabalei sobu na yalolevu ni tamata,

ka vakamalumalumutaki na viavialevu ni tamata;

ia ko Jiova duaduaga ena cecere ena siga ko ya.

18Ia na matakau ena vakaotia sara ko koya.

19A ra na curu na tamata ki na qara vatu

kei na qara qele,

e na vuku ni ka rerevaki i Jiova,

kei nai ukuuku ni nona i tutu vakaturaga,

ni sa qai tucake ko koya me vakayavalati vuravura vakalevu.

20E na siga ko ya ena biuta tani na tamata

na nona matakau siliva kei na nona matakau koula,

ka cakava me soro kina ko koya

ki na kalavo kei na beka;

21me la'ki curu ki na qara vatu kei na gusu ni uluvatu,

e na vuku ni nona rerevaki Jiova,

kei na nona i ukuuku vakaturaga,

ni sa qai tucake ko koya me vakayavalati vuravura vakalevu.

22Dou kua ni goleva e dua na tamata,

sa tiko e na qara ni ucuna na nona i cegu,

ni sa yaga ki na cava ko koya?