Vakarua 21 - Ai Vola Tabu (Vakadewa Makawa Vakavoutaki 2021)（FRV21）

Vakaro e Vauca na Daulaba e Sega ni Kilai

1“Kevaka sa kune e dua sa moku-mate e na vanua sa solia vei kemuni ko Jiova na nomuni Kalou mo ni taukena, ka sa koto e na vanua, ia sa sega ni kilai se ko cei sa mokuta,

2me ra qai lako yani na nomuni qase kei na nomuni turaga-ni-lewa, ka ra na vakarautaka na kena yawa ki na veikoro sa voliti koya sa moku-mate.

3Ko ira na qase ni koro sa voleka kivei koya sa moku-mate era na kauta e dua na luve ni bulumakau yalewa ka se sega ni taurivaki e na dua na cakacaka, ka sega ni se yarataka nai vua.

4Kei ira na qase ni koro ko ya era na kauta sobu na luve ni bulumakau yalewa ki na buca sa sega ni cuki ka sega ni tei, ka tamusuka mai kea na domo ni luve ni bulumakau e na buca.

5Era na qai toro mai na bete na luve i Livai, ni sa digitaki ira ko Jiova na nomuni Kalou me ra qaravi koya, ka tauca na vosa ni veivakalougatataki e na yaca i Jiova, ia e na nodra vosa ena wali kina na ka kecega e veiletitaki kei na veimoku e vakayacori.

6Ko ira na qase kecega e na koro ko ya sa voleka vei koya sa moku mate me ra qai vuluvulu e dela ni luve ni bulumakau sa tamusuki na uluna e na buca,

7ka ra na cavuta, ‘A liga i keitou sa sega ni vakadavea na dra oqo, a sa sega ni raica na mata i keitou.

8I Jiova, mo ni yaloveivosoti mada vei ira na nomuni tamata na Isireli, ko ira ko ni a vakabula, ka mo ni kakua talega ni beitaki ira na nomuni tamata na Isireli e na dra sa sega ni cala.’ Era na qai sega ni cudruvi e na dra ko ya.

9O ni na biuta tani kina na dra sa sega ni cala mai na kemuni maliwa, ni ko ni na caka dodonu e na mata i Jiova.

Ko Ira na Yalewa era Vesu mai nai Valu

10“Ni ko ni sa lako yani me vala kei ira na nomuni meca, ka sa soli ira ko Jiova na nomuni Kalou ki na ligamuni ka mo ni sa tauri ira vakabobula,

11ka ko ni sa qai raica vei ira na bobula e dua na yalewa matavinaka ko ni sa domona ka via taura me watimuni,

12ka ko ni na qai kauta ki na nomuni vale, ia me tasia na uluna ko koya ka civia na nona i taukuku.

13Me qai luvata tani ko koya na nona i sulu ni bobula, ka tiko e na nomuni vale, ka tagicaki tamana kei tinana ka dua vinaka na vula. Ni sa oti ko ya, ko na qai kauti koya mo drau veiwatini kaya.

14Ia kevaka ko na sega ni vinakati koya, mo qai laiva ga me lako galala yani ko koya; ia e tabu sara mo ni volitaka e nai lavo; mo ni kakua ni volitaka, ni ko ni sa vakamadualaka.

Nai Votavota ni Ulumatua

15“Kevaka sa le rua na watina e dua na tamata, ka sa lomana e dua ka cata e dua, ka rau sa vakasucu gone ko koya sa lomani kei koya talega sa cati, ka sa nona sa cati na ulumatua tagane,

16ia ni sa vota na nona i yau ko koya vei rau na luvena, sa tabu ni lesia na luve i koya sa lomani me ulumatua, ka biuta na luve i koya sa cati, ko koya sa ulumatua.

17Ia me vakataudeitaka ga ko koya ni sa ulumatua na luve i koya sa cati, ni sa solia vua e rua nai votavota ni nona ka kecega, ni sai sevu ni nona kaukauwa ko koya. Sa dodonu me nona nai votavota ni ulumatua.

Na Gonetagane Dautalaidredre

18“Kevaka sa yalovakatani ka dautalaidredre na luvena tagane e dua na tamata, ka sa bese ni vakarorogo kivei tamana, se vei tinana, ka rau sa dauvakanakuitataki koya, ka sa sega ni vakarorogo vei rau,

19me rau qai taura na tamana kei na tinana, ka kauta yani vei ira na qase ni nona koro, ki na matamata-ni-koro ni nona yasana;

20a rau na kaya vei ira na qase ni nona koro, ‘A luve i keirau oqo sa yalovakatani ka dautalaidredre, sa bese ni vakarorogo kivei keirau; sa daukana ko koya, ka daumateni.’

21Era na qai vakaviriki koya e na vatu ko ira kecega na lewe ni nona koro me mate kina. Ko ni na vakaotia kina na ca mai na kemuni maliwa, ia era na rogoca ko ira na Isireli kecega, ka ra na rere.

Na Veilawa Tale Eso

22“Ia kevaka e dua na tamata sa kitaka nai valavala ca sa dodonu me mate kina, a sa lewai ko koya me mate, ka ko ni sa vakalilica e na kau,

23Kala 3.13me kakua ni lili tu na yagona e na kau e na bogi, ia mo ni buluta e na siga dina ga ko ya, ni sa cudruvi mai vua na Kalou ko koya sa vakalilici e na kau. Mo ni kakua kina ni vakadukadukalitaka na nomuni vanua, sa solia vei kemuni ko Jiova na nomuni Kalou mo ni taukena.