Same 40 - Ai Vola Tabu (Vakadewa Makawa Vakavoutaki 2021)（FRV21）

Na Vakavinavinaka ni Veivakabulai kei na Kere Veivuke Vua nai liuliu ni sere. A Same i Tevita.

1Au a dau waraki Jiova tikoga;

ka sa vakatu daligana vei au ka rogoca na noqu tagi.

2Sa tuberi au cake talega mai nai keli sa tu kina na rorogo rerevaki,

mai na qele lolobo talega,

ka sa vakatura na yavaqu e na dela ni uluvatu,

ka vakataudeitaka na noqu i lakolako.

3Sa biuta ki gusuqu e dua na sere vou,

na sere ni vakavinavinaka vua na noda Kalou.

Era na raica na le vuqa ka rere,

ka vakararavi vei Jiova.

4Sa kalougata na tamata

sa dauvakararavi vei Jiova,

ka sa gole tani mai vei ira na yalolevu,

mai vei ira talega era lesu tani ki na daulasu.

5I Jiova na noqu Kalou, sa ka levu na nomuni cakacaka

e veivakurabuitaki ko ni sa cakava,

kei na nomuni nanuma vei keimami.

E dredre me wiliki vakadodonu vei kemuni,

kevaka ka'u via vakatusa ka tukuna, e dredre ni wili.

6 Ipe 10.5-7 Ai soro kei nai madrali ko ni sa sega ni vinakata,

ia ko ni sa cula-basika ga na daligaqu.

Ai soro kama kei nai soro ni valavala ca

ko ni sa sega ni taroga.

7Au a qai kaya, “Raica, au sa lako mai;

ka'u sa volai vakaoqo e nai vola vivigi:

8Au sa reki me'u kitaka na ka ko ni sa vinakata, na noqu Kalou;

io, na nomuni vunau sa tu e na vu ni yaloqu.”

9Au a vunautaka na veivakadonui

e nai soqosoqo levu;

raica, ka'u sa sega ni tarova na gusuqu,

me vaka ko ni sa kila, i Jiova.

10Au a sega ni vunia e lomaqu na nomuni veivakadonui,

au a tukuna ga na nomuni dina kei na nomuni veivakabulai;

au a sega ni vunia na nomuni yalololoma kei na nomuni dina

mai vei ira nai soqosoqo levu.

11Koi kemuni talega, i Jiova, mo ni kakua

ni bureitaka vei au na nomuni yalololoma;

me maroroi au tikoga

na nomuni loloma kei na nomuni dina.

A Masu ni Kere Veivuke(Same 70)

12Ni sa voliti au na ka ca

sa sega ni wili rawa;

sa vauci au na noqu i valavala ca,

ka'u sa sega ni ta cake rawa kina;

sa levu oqori ka lailai na drau ni uluqu,

o koya sa waicala kina na yaloqu.

13Mo ni yalovinaka, Jiova, mo ni vakabulai au;

i Jiova, mo ni kusarawa mai mo ni vukei au.

14Me ra madua ka kidroa vata

era segata na yaloqu me ra vakarusa;

me ra suka vakanadaku ka vakamaduataki

ko ira era gadreva tiko me'u vakacacani.

15Me ra luveniyali me kenai sau ni nodra veivakamaduataki

ko ira era sa kaya vei au, “Sai koya! Sai koya!”

16Ia ko ira kecega era sa vakasaqarai kemuni,

me ra reki ka marautaki kemuni;

kei ira era sa vinakata na nomuni veivakabulai

me ra kaya tikoga, “Sa cecere ga ko Jiova!”

17Ia koi au, ka'u sa dravudravua ka luveniyali,

ia ka sa nanumi au tiko na Turaga.

Koi kemuni na noqu dauniveivuke kei na noqu i vakabula;

mo ni kakua ni vakaberabera, na noqu Kalou.