2 Veigauna 4 - Ai Vola Tabu (Vakadewa Makawa Vakavoutaki 2021)（FRV21）

Nai Yaya ni Vale ni Kalou(1 Tui 7.23-51)

1 Lako 27.1,2 Ka sa cakava e dua nai cabocabo-ni-soro parasa, sa ruasagavulu na kiupiti na kena balavu, ka ruasagavulu na kiupiti na kena raraba, ka tini na kiupiti na kena cecere.

2A sa cakava e na ka sa vakawaicalataki na taqe levu, e tini na kiupiti mai na batina e dua ki na batina kadua; sa momokiti, a sa lima na kiupiti na kena cecere, ka sa vakavolivoliti e na dua na wa sa na tolusagavulu na kena kiupiti.

3A sa so nai vakatakarakara ni bulumakau e rukuna, sa vakavolivolita, e tini e na dua na kiupiti, ka volita na taqe levu; sa vakawaicalataki na bulumakau me rua nai yatu ni sa vakawaicalataki vata.

4Sa tu e deladra na bulumakau e tinikarua, e tolu sa vakanamata ki na vualiku, ka tolu sa vakanamata ki na ra, ka tolu sa vakanamata ki na ceva, ka tolu sa vakanamata ki na tokalau. A sa toka e cake e deladra na taqe levu, a ra sa vakanadaku ki loma kecega.

5Ia na kena vavaku sa tautauvata kei na raba ni liga, a sa caka na batina me vaka na bati ni bilo, e na se ni viavia; ka sa rauta e rua na oba ka rua na udolu ka lima na drau na qaloni (rauta ni 60,000 na lita).

6 Lako 30.17-21 Sa cakava talega ko koya e tini na taqe; a sa viritura e lima e nai matau, ka lima e nai mawi, me deredere kina. Na veika era sa vakacabora mei soro kama era sa derea kina, ia na taqe levu sa nodra i vuivui na bete.

7 Lako 25.31-40 Lako 25.23-30 A sa cakava ko koya e tini nai tutu-ni-cina koula, me vaka na kedrai vakatakarakara, ka viritura e na vale-ni-soro, e lima e nai matau, ka lima e nai mawi.

8Sa cakava talega ko koya e tini na tepeli, ka vakatikora e na vale-ni-soro, e lima e nai matau, ka lima e nai mawi. A sa cakava e dua na drau na beseni koula.

9Sa cakava talega ko koya na nodra rara vakabai na bete, kei na rara vakabai levu, kei nai sogo ni rara vakabai, a sa botana na kedrai sogo e na parasa.

10A sa viritura na taqe levu e na yasa i matau ni vale vaka ki na tokalau, ka donuya na ceva.

11A sa cakava na sedre ko Urami, kei nai sivi me kau tani kina na dravusa, kei na beseni me kau kina na dra me kureitaki. A sa vakaotia ko Urami na cakacaka kecega sa cakava ko koya vei Solomoni na tui, ki na vale ni Kalou:

12e rua na duru, kei nai ukuuku momokiti e na domodomo sa tu e na dela ni duru ruarua; ka rua na ka sa caka vakalawa, me ubia nai ukuuku momokiti ruarua e na domodomo sa tu e na deladrau na duru;

13kei nai ukuuku e va na drau e vaka na pomekaraneti, ki na ka vakalawa ruarua; e rua na yatu ukuuku e vaka na pomekaraneti ki na dua na lawa, me ubia nai ukuuku momokiti ruarua e na domodomo sa tu e na deladrau na duru;

14sa cakava talega na veitutu, a sa cakava na taqe e na deladratou nai tutu;

15e dua na taqe levu, kei na bulumakau e tinikarua e rukuna;

16kei na kuro, kei nai sivi me kau tani kina na dravusa, kei nai cula ni lewe ni manumanu; ia na parasa sa solo vakavinaka nai yaya kecega oqo sa cakava ko Urami-avi vei Solomoni na tui, ki na vale i Jiova.

17Sa cakava oqo na tui e na buca mai Joritani, e na vanua tete e na maliwa i Sukoci kei Siretaca.

18A sa cakava nai yaya kecega oqo ko Solomoni, ka sa ka levu sara, ni sa sega ni qarai na kena bibi na parasa.

19A sa cakava ko Solomoni nai yaya kecega sa tu e na vale ni Kalou: nai cabocabo koula, kei na tepeli sa dautu kina na madrai dauraici,

20kei nai tutu-ni-cina koula dina, kei na nodra cina me caudre me vaka na kenai valavala, e na mata ni loqi ni Vosa;

21kei na senikau, kei na cina, kei na saga-ni-buka, e na koula, io na koula talei;

22kei nai koti-ni-cina, kei na beseni, kei nai taki, kei na miqa ni ka boi vinaka, e na koula dina; ia e nai curucuru ni vale, sa caka e na koula na kenai sogo e loma ki na tikina tabu sara, kei nai sogo ni vale, ko ya na vale-ni-soro.