Osea 4 - Ai Vola Tabu (Vakadewa Makawa Vakavoutaki 2021)（FRV21）

Sa Beitaki Isireli na Kalou

1Dou rogoca na vosa i Jiova, koi kemudou na Isireli;

ni sa dua na veileti i Jiova kei ira na lewe-ni-vanua.

Sa sega na vosa dina se na loloma,

ka sa sega ni kilai na Kalou e na vanua.

2A ruru, kei na vosa lasu, kei na laba,

kei na butako, kei na veibutakoci sa ia tiko;

ia na vakadave-dra sa veitaravi tiko.

3O koya oqo ena tagi kina na vanua,

a ra na dui ceguoca kecega ko ira era tiko kina;

ka vakakina na manumanu ni vanua

kei na manumanu vuka;

io, na ika talega ni waitui ena kau tani.

4Ia me kakua e dua vei kemudou me ia na veileti,

se me ia na veivunauci kaya e dua;

ko ira na kai nomu era vakataki ira

era sa ia na veileti kei na bete.

5O koya oqo ko na toqi kina e na siga;

ia drau na toqi vata talega kei na parofita e na bogi,

ia ka'u na vakarusai koya talega na tinamu.

6Era sa rusa ko ira na noqu tamata ni sa yali vei ira na vuku;

ni ko sa biuta na vuku, au na biuti iko talega,

mo kakua ni bete tiko vei au.

Ni ko sa guilecava na vunau ni nomu Kalou,

koi au talega, ka'u na guilecavi ira na luvemu.

7Ni ra sa tubu me lewe levu,

sa tubu talega na nodra i valavala ca vei au;

ka'u na vukica me ka ni madua na nodra lagilagi.

8Era sa kania nai soro ni nodra i valavala ca na noqu tamata

ka ra sa gadreva e na vu ni yalodra na nodra caka cala.

9Ia, me vakataki ira na tamata, ena vaka talega kina ko koya na bete;

ia ka'u na cudruvi ira e na vuku ni nodra i valavala,

ka'u na sauma vei ira na nodra i valavala.

10Ni ra na kana, ka sega ni mamau;

era na ia na veibutakoci, ka sega ni tubu;

ni ra sa mudu ni qaravi Jiova.

Na Nodra Tavuki ka Qaravi Kalou Tani na Isireli

11A dauyalewa,

na waini kei na waini vou

sa kauta vakatani na loma ni tamata.

12A noqu tamata era sa taroga na nodra kau,

ia na nodra i titoko sa tukuna vei ira.

Ni sa vakacalai ira na yalo ni veibutakoci,

ia na nodra dauveidauci,

sa ra vuki tani kina mai na lewa ni nodra Kalou.

13Era sa dau vakacaboisoro e dela ni veiulunivanua,

ka ra sa dauvakama nai madrali boi vinaka e na veiulu-ni-koro

kei na ruku ni oki kei na ivi kei na paini,

ni sa vinaka na kena rugurugua;

o koya oqo era na ia kina na dautagane ko ira na luvemudou yalewa,

kei na watidra na luvemudou tagane era na veibutakoci.

14Au na sega ni cudruvi ira na luvemudou yalewa ni ra ia na dautagane,

se na watidra na luvemudou tagane ni ra ia na veibutakoci,

ni ra sa tawase dina vata kei ira na dautagane,

ka ra vakacaboisoro vata kei ira talega na dauveidauci;

ia ko ira sa sega ni yalomatua era na bale sobu.

15Kevaka dou sa ia na veibutakoci, na Isireli,

me kakua ga ni caka cala ko ira na Juta.

Ia kakua ni dou cabe cake ki Kilikali,

se lako cake ki Peci-aveni,

se bubului, ka kaya, “Me vaka sa bula ko Jiova.”

16Me vaka sa daubese na bulumakau,

sa ra daubese vakakina na Isireli;

Ia oqo, ena vakani ira beka ko Jiova

me vaka na lami e na yasana rabailevu?

17Sa sema vei ira na matakau ko Ifereimi,

laivi koya ga.

18Ni sa otivi na medra, era sa qai dauia na veidauci;

na nodra turaga sa vinakata ga na ka e veivakamadualaki.

19Sa vauci ira na cagi e na tabana,

ka ra na madua e na vuku ni nodra vakacaboisoro.