Isikeli 5 - Ai Vola Tabu (Vakadewa Makawa Vakavoutaki 2021)（FRV21）

Ai Seleiwau me Ravuti Jerusalemi

1“Ia ko iko, na luve ni tamata, mo taura e dua nai seleiwau gata. Mo vakayagataka me vaka na nona bati-ni-toro na dauveikoti ka tasia kina na ulumu kei na kumimu. Mo qai taura e dua nai vakarau ni bibi, ka wasea na drau ni ulumu.

2E dua na kena wase mo qai vakama e na bukawaqa e na loma ni koro, ni sa oti na veibogi sa buku kina na druadrua. Ia mo taura e dua na kena wase, ka taya vakavolivolita e nai sele. Ia na kenai katolu ni kena wase mo veibiuyaka ki na mata ni cagi; ia ka'u na ucuna nai seleiwau me muri ira.

3Ia mo taura mai kina e vica walega, ka vauca ki na tutu ni nomu i sulu.

4Ia mo qai taura eso tale, ka biuta ki na loma ni bukawaqa, ka vakama e na bukawaqa; ni na lako mai kina na bukawaqa kivei ira na lewe-ni-vuvale kecega ni Isireli.

5“Sa kaya vakaoqo na Turaga ko Jiova: Oqo ko Jerusalemi; ka'u sa vakatura ena maliwa ni veimatanitu, ka sa tu vakavolivoliti koya na veivanua.

6Ia sa vorata vakalevu ko koya na noqu lewa ka ni uasivi cake e na ca ka sa uasivi sobu na veimatanitu, sa vorata vakalevu talega na noqu i lesilesi ko koya, ka vakalailai na veivanua sa vakavolivoliti koya; ni ra sa biuta na noqu lewa, ka ra sa sega ni muria na noqu i lesilesi.

7O koya sa kaya kina vakaoqo na Turaga ko Jiova: Ni dou sa yalovakatani vakalevu ka vakalailai na veimatanitu sa vakavolivoliti kemudou, dou a sega talega ni muria na noqu i lesilesi, se vakabauta na noqu lewa, se cakava me vaka na nodra lewa dodonu na veimatanitu sa vakavolivoliti kemudou;

8o koya oqo sa kaya kina vakaoqo na Turaga ko Jiova: Raica, koi au, ka'u sa nomu meca, io ka'u na ia e na kemudou maliwa na veicudruvi e matadra na veimatanitu.

9Ia ka'u na cakava vei iko na ka ka'u a sega ni cakava, io na ka ka'u na sega tale ni cakava vakakina, e na vuku ni nomu i valavala vakasisila kecega.

10Lele 4.10Io ko ira na tama ni gone era na kania na luvedra e na kemudou maliwa, o ira talega na gone era na kania na tamadra; ia ka'u na cudruvi iko, ka dui cagina kece tani na kemudou vo ki na mata ni cagi kecega.

11Ia, me vaka ni'u sa bula, sa kaya na Turaga ko Jiova; Ni ko sa vakadukadukalitaka na noqu vale tabu e na nomu ka velavela kecega, kei na nomu ka vakasisila kecega, oi au talega ka'u na vakalailaitaki iko; ia ka'u na sega ni vosoti iko ka'u na sega talega ni yalololoma vei iko.

12E dua na kemudou wase ena mate e na dauveiveitauvi, ia era na vakaoti ga e na dausiga e na kemudou maliwa; e dua tale na kemudou wase ena bale e nai seleiwau sa na vakavolivoliti iko; ia na kenai katolu ni kemudou wase ka'u na vakaseva ki na mata ni cagi kecega, ia ka'u na ucuna nai seleiwau me muri ira.

13“Ena vakayacori vakaoqo na noqu cudru, ia ka'u na vakatauca na noqu cudru katakata vei ira, ka'u na qai vakacegu. Era na qai kila ni sai au ko Jiova ka'u sa vosa e na noqu lomavuvu, ni'u sa vakayacora na noqu cudru levu vei ira.

14Ia ka'u na soli iko mo vakalalataki, ka vakalialiai e na kedra maliwa na veimatanitu era tiko voliti iko, e na matadra kece era lako tu yani.

15Ia ko na yaco mo ka e vakalialiai ka vosavakacacataki, me ra vakavulici kina ka vakidacalataki ko ira na veimatanitu sa tiko voliti iko, ni'u sa ia na veicudruvi e na kemudou maliwa e na cudru, kei na lesa, kei na veivunauci vakacudrucudru. Oi au ko Jiova ka'u sa tukuna.

16Ni'u sa tala na gasau ca ni dausiga vei ira, na ka era na rusa kina, na ka ka'u na tala me vakarusai kemudou; ia ka'u na vakaikuritaka na dausiga vei kemudou, ka muduka na kemudou kakana, io na madrai.

17Vtaki 6.8Ia ka'u na vakayacora vei kemudou na dausiga kei na manumanu ca, ka ra na vakamatei ira na nomudou; ia na mate dauveiveitauvi kei na veilabati ena ia voli e na kemudou maliwa; kei nai seleiwau ka'u na vakayacora vei iko. Koi au ko Jiova ka'u sa tukuna.”