1A ra sa kacivi vata na kai Ifereimi, ka lako yani vaka ki na tokalau, ka ra sa kaya vei Jefica, “A cava ko a lako yani kina me veivala kei ira na luve i Amoni, ka sega ni kacivi keimami me lako vata kei iko? Keimami na vakama e na bukawaqa na nomu vale, kei iko talega.”
2A sa kaya vei ira ko Jefica, “Koi au kei ira na noqu tamata, keimami a veileti kaukauwa sara kei ira na luve i Amoni. Ia e na gauna ka'u a kacivi kemudou kina, dou a sega ni vakabulai au mai na ligadra.
3Ia ni'u sa raica ni dou sa sega ni ia na veivakabulai, ka'u a bolea sara na mate ka lako yani vei ira na luve i Amoni, ka sa soli ira ko Jiova ki na ligaqu. Ia ka cava dou sa lako mai kina vei au edaidai mo dou vala kei au?”
4A sa qai vakasoqoni ira vata kecega na kai Kiliati ko Jefica, ka vala kei ira na Ifereimi. A ra sa mokuti ira na Ifereimi ko ira na kai Kiliati, baleta ni ra a kaya, “Koi kemudou na kai Kiliati dou a se ga mai Ifereimi—e na kedra maliwa na Ifereimi kei na Manasa.”
5A ra sa taura vakaukauwa na veivutovuto ni Joritani ko ira na kai Kiliati mai vei ira na Ifereimi. Ia ni sa kaya e dua vei ira na Ifereimi sa via dro, “Me'u lako mada yani ki tai kadua”, era sa qai taroga vua ko ira na kai Kiliati, “Na kai Ifereimi ko iko, se segai?” Ia kevaka sa kaya, “E segai”,
6era sa qai kaya vua, “Mo cavuti Shiboleta,” ka sa cavuti “Siboleta” ko koya, ni sa sega ni cavuta rawa vakadodonu ko koya. Era sa qai tauri koya, ka vakamatea mai na veivutovuto ni Joritani. A sa bale vei ira na Ifereimi e na gauna ko ya e le vasagavulu ka rua na udolu.
7A sa lewai ira na Isireli ko Jefica ka yabaki ono. Sa qai mate ko Jefica na kai Kiliati, a sa bulu e na dua na koro mai Kiliati.
Ko Ipisani, kei Eloni, kei Apitoni8A sa taravi koya ko Ipisani na kai Peceliema, a sa lewai ira na Isireli.
9A sa le tolusagavulu na luvena tagane, ka sa le tolusagavulu na luvena yalewa, o ira sa tala tani ko koya; a sa kauta mai e le tolusagavulu na goneyalewa me watidra na luvena tagane. A sa lewai ira na Isireli ko koya ka yabaki vitu.
10Sa qai mate ko Ipisani, a sa bulu mai Peceliema.
11A sa taravi koya ko Eloni, e dua vei ira na Sevuloni, me lewai ira na Isireli; a sa lewai ira na Isireli ko koya ka yabaki tini.
12A sa mate ko Eloni, e dua vei ira na Sevuloni, a sa bulu mai Eijaloni e na vanua ko Sevuloni.
13A sa taravi koya me lewai ira na Isireli ko Apitoni na luve i Ileli, na kai Piraconi.
14A sa le vasagavulu na luvena tagane ka sa le tolusagavulu na makubuna tagane, ka ra sa dauvodoka na asa tagane e vitusagavulu; a sa lewai ira na Isireli ko koya ka yabaki walu.
15A sa mate ko Apitoni na luve i Ileli, na kai Piraconi, ka sa bulu mai Piraconi e na vanua nei Ifereimi, mai na nodra vanua veiulunivanua na Amalekaiti.
Who We AreWhat We EelieveWhat We Do
2025 by iamachristian.org,Inc All rights reserved.
