Jeremaia 43 - Ai Vola Tabu (Vakadewa Makawa Vakavoutaki 2021)（FRV21）

Sa Kau ki Ijipita ko Jeremaia

1Ia ni sa tukuna vei ira kece na tamata ko Jeremaia na vosa kecega i Jiova na nodra Kalou, oqori sa talai koya kina vei ira ko Jiova na nodra Kalou, io na vosa kecega oqo,

2sa qai vosa ko Asaraia na luve i Osaia, kei Joenani na luve i Karea, kei ira na tamata viavialevu kecega, ka kaya vei Jeremaia, “E lasu na ka ko sa vosataka. Sa sega ni talai iko ko Jiova na noda Kalou me kaya, ‘Dou kakua ni lako yani ki Ijipita me tiko vulagi ki kea’,

3ia ko Baruki na luve i Neraia sa vakauqeti iko vakaca ga vei keimami, me soli keimami ki na ligadra na kai Kalitia, me ra vakamatei keimami, ka kauti keimami ki Papiloni.”

4A ra sa sega ni vakarorogo ko Joenani na luve i Karea, kei ira kece na kavetani ni valu, kei na tamata kecega, ki na vosa i Jiova, me tiko ga e na vanua ko Juta.

5 2Tui 25.26 Ia ko Joenani na luve i Karea, kei ira na kavetani ni valu kecega, era sa kauti ira kecega sa vo e Juta, ko ira era sa qai lesu mai na veivanua kece, era dui vakasevi kina, me mai tiko e na vanua ko Juta—

6ko ira na tagane, kei na yalewa, kei na gone, kei na luvena yalewa na tui, kei na tamata kecega sa biuta ko Nipusaretani na kavetani ni valu i vakatawa me tiko vei Kitalaia na luve i Eaikami na luve i Savani, kei Jeremaia na parofita, kei Baruki na luve i Neraia.

7A ra sa yaco ki na vanua ko Ijipita, ni ra sa sega ni vakarorogo ki na vosa i Jiova. A ra sa yaco ki Tapanesi.

8Sa qai yaco na vosa i Jiova vei Jeremaia mai Tapanesi, ka vaka,

9“Mo taura e ligamu eso na vatu lelevu, ka la'ki, vunia e na tete e na lovo ni vatu-buli, mai nai curucuru ki na vale i Fero mai Tapanesi, e na matadra na kai Juta,

10ka kaya vei ira, ‘Sa kaya vakaoqo ko Jiova-ni-lewevuqa, na nodra Kalou na Isireli: Raica, au na talaki ka kauti Nepukanesa na tui Papiloni, na noqu tamata, ka viritura na nona i tikotiko vakaturaga e na dela ni vatu oqo ka'u sa vunia; ia ena birika na nona i vakaruru vakaturaga e cake.

11Ia ni sa lako mai ko koya, ena yavita na vanua ko Ijipita,

ka soli ira sa lesi me mate, me ra mate,

kei ira sa lesi me ra vakabobulataki, me ra vakabobulataki,

kei ira era sa lesi me ra mate e nai seleiwau, me ra mate ga kina.

12Ia ka'u na vakawaqa na buka e na nodra bure na kalou ni Ijipita, ena vakamai ira ko koya, ka kauti ira vakabobula. Ia ena tutuvitaki koya e na vanua ko Ijipita, me vaka sa tutuvitaki koya nai vakatawa ni sipi e na nona i tutuvi; ena lako tani talega mai kina e na vakacegu.

13Ena musuka talega na duru vatu i Peci-semesi, mai na vanua ko Ijipita; ia ena vakama ko koya na nodra burekalou na kai Ijipita.’ ”