1
e na vukudra na kai Kiri-erese.
32Ka'u na tagicaki iko e na tagi vaka-Jaseri,
ko iko na vaini ni Sipima!
A tabamu sa salava na wasawasa,
ka yacova sara na wasawasa vaka-Jaseri;
a nomu vuata matua kei na vua ni nomu vaini
sa tokitaka ko koya na dauvakacaca.
33A sa kau tani na marau kei na reki
mai na were sa vakalewe, kei na vanua vaka-Moapi;
ia ka'u sa vakaotia na waini mai na veikeli-waini;
ena sega e kaikaila ni sa butuqaqia;
ena sega ni kaila ni reki na nodra kaila.
34“Sa ia na tagi mai Esiponi, a sa yacovi Elale kei Jeasa na nodra tabalaka na domodra, a sa ia mai Soa, a sa yacovi Oroneimi, me vaka na luve ni bulumakau sa yabaki tolu; ni na biu wale tu na wai talega mai Nimirimi.
35Ia sa kaya ko Jiova ka'u na muduka tani talega mai Moapi, na tamata sa dau vakacaboisoro e na veiyasana cecere, ka vakama nai madrali boi vinaka vei ira na nona kalou.
36Ia na lomaqu ena rorogo me vaka na bitu-ni-vakatagi e na vuku i Moapi ena rorogo talega na lomaqu me vaka na bitu-ni-vakatagi e na vukudra na kai Kiri-erese; ka ni sa yali na ka levu sa rawata ko koya.
37“Ia ena tasi kece na uludra; kei na kumidra kece, ena koti; na ligadra kece, ena tava tu; ka ra na vakaisulu e nai sulu taga.
38Ena ia na tagi yaso e dela ni veivale kece ni Moapi, e na saqata ni koro talega; ni'u sa vorolaki Moapi me vaka na bilo sa sega ni vinakati, sa kaya ko Jiova.
39Na kena ramusu era na qolouvaka! Na kena vuki vakanadaku ko Moapi, ni sa madua! Ia ena yaco ko Moapi me ka e dredrevaki ka taqayataki vei ira kece era tiko vakavolivoliti koya.”
Ena Sega na Dro Tani mai Moapi40Ni sa kaya vakaoqo ko Jiova:
“Raica, ena vuka mai ko koya me vaka na ikeli,
ka vakatetaba mai me ca ko Moapi.
41Sa kabai na veikoro, ia na bai ni valu kaukauwa sa rawa sara,
ia na yalodra na qaqa ni Moapi e na siga ko ya
ena vaka na yalo ni yalewa sa taratara.
42Ia ena rusa ko Moapi me kakua ni matanitu tiko,
ni sa vakalevulevui koya vei Jiova.
43Na rere, kei nai keli qara, kei na tudai,
sa tu e matamuni na kai Moapi,
sa kaya ko Jiova.
44Ko koya sa drotaka na ka rerevaki,
ena lutu ki nai keli qara;
ko koya sa cabe mai nai keli qara,
ena coriti e nai cori.
Ni'u na vakayacora oqo vei Moapi,
e na yabaki era na cudruvi kina,
sa kaya ko Jiova.
45“Ko ira era dro era sa mai tu ga
e ruku ni yaloyalo i Esiponi ni ra sa malumalumu;
ia na bukawaqa ena lako mai Esiponi,
kei na yameyame ni bukawaqa mai na loma ni koro ko Sioni,
ka kania nai yalayala kei Moapi,
kei na buradeladra na gone dau ue.
46Ena ca vei iko, Moapi!
Sa ra rusa na tamata i Kimosi,
ni ra sa tauri vakabobula ko ira na luvemu tagane,
kei ira talega na luvemu yalewa.
47Ia e na gauna mai muri ka'u na kauti ira tale mai
na Moapi era vakabobulataki, sa kaya ko Jiova.”
Sa qai tini e ke na lewa vei Moapi.
Who We AreWhat We EelieveWhat We Do
2025 by iamachristian.org,Inc All rights reserved.
