Vakatekivu 50 - Ai Vola Tabu (Vakadewa Makawa Vakavoutaki 2021)（FRV21）

1A sa mokota na tamana ko Josefa, ka tagicaka, ka reguca.

2A sa vakaroti ira na nona tamata era vuniwai ko Josefa me ra vakarautaka na kena maroroi vakabalavu na yagoi tamana e na ka boi vinaka. A ra sa vakarautaki Isireli vakaoqo ko ira na vuniwai;

3ka ra kitaka tiko oqo me bogi vasagavulu, ni sai koya oqori na gauna e gadrevi me vakarautaki kina na kena maroroi vakabalavu na yagodra era sa mate. A ra sa tagicaki koya na kai Ijipita ka bogi vitusagavulu.

4Ia ni sa oti na bogi era a tagicaki koya kina, sa qai vosa ko Josefa vei ira na lewe-ni-vuvale i Fero, ka kaya, “Kevaka dou sa yalololoma vei au, dou yalo vinaka ka vosa mada vei Fero, ka vaka:

5Vteki 47.29-31Sa vakabubuluitaki au na tamaqu, ka vaka, ‘Raica, ka'u na mate. Mo buluti au e na noqu i bulubulu ka'u a kelia me noqu e na vanua mai Kenani.’ O koya oqo, me'u lako cake mada kina, ka me'u la'ki buluti tamaqu, ka'u na lesu tale mai.”

6A sa kaya ko Fero, “Mo lako cake, ka buluti tamamu, me vaka ko sa vosa bubului oti kina.”

7A sa lako cake ko Josefa me buluti tamana. A ra sa lako vata kaya na tamata kecega i Fero, na qase e nona vale, kei ira kecega na qase e na vanua ko Ijipita,

8kei ira kece na lewe-ni-vuvale i Josefa, kei ira na veitacini, kei na lewe-ni-vuvale i tamana. A luvedra lalai ga, kei na nodra qele ni sipi, kei na nodra qele ni bulumakau era sa tiko ga mai e na vanua ko Koseni.

9A ra sa lako cake kaya na qiqi-ni-tamata, kei ira sa vodo ose. A sa dua nai vavakoso levu sara.

10A ra sa yacova na rara ni samu sila nei Atati, mai tai kadua ni Joritani, a ra sa tagi mai kina e na tagi levu ka rarawa sara; a sa lewa ko koya me bogi vitu na nodra tagicaka na tamana.

11Ia ni ra sa raica ko ira na lewe-ni-vanua mai Kenani na vakaloloku mai na rara ni samu sila nei Atati, era sa kaya, “Oqo sa dua na nodra vakaloloku levu na kai Ijipita.” O koya oqo sa vakatokai kina na vanua ko ya me yacana ko Epeli-Misireimi, ko ya mai tai kadua mai Joritani.

12A ra sa kitaka vua ko ira na luvena na veika ka vakarota vei ira ko koya.

13Caka 7.16Era sa kauti koya ki na vanua ko Kenani ka buluta e na qara-vatu e na tiki ni vanua ko Makipila, ka sa donui Mamire, ka tiki ni vanua sa volia ko Eparaama mai vei Efironi na Itaiti, me nona i bulubulu.

14Ia ni sa buluti tamana oti, sa lesu ki Ijipita ko Josefa kei iratou na tuakana, kei ira kecega era lako cake kaya ki na veibulu.

Sa Vosoti Iratou na Tacina kei na Tuakana ko Josefa

15Ia ni ra sa raica na tuakai Josefa sa mate na tamadra, era sa qai kaya, “Ena cati keda beka ko Josefa, ka sauma sara na ka ca kecega eda a kitaka vua?”

16A ra sa tala e dua vei Josefa, me kaya, “Ko koya na tamamu, ni sa bula tiko, sa vakarota, ka kaya,

17‘Dou vosa vakaoqo vei Josefa: Au sa vakamasuti iko, mo vosota mada na nodra caka cala na tuakamu kei na nodra i valavala ca, ni ra a caka ca vei iko.’ Ia oqo, keitou sa qai masuti iko mo vosota na neitou caka cala na tamata ni Kalou i tamamu.” A sa tagi ko Josefa ni ra sa vosa vua.

18A ra sa lako talega mai na tuakana, ka cuva vua, ka ra sa kaya, “Raica, koi keitou sa nomuni tamata.”

19A sa kaya vei ira ko Josefa, “Dou kakua ni rere! Koi au li na Kalou?

20E dina ga ni a lomamudou mo dou vakaleqai au, ia sa nakita na Kalou me yaco kina na vinaka, ka me yaco kina na veivakabulai ni tamata e lewe vuqa me vaka edaidai.

21Ka mo dou kakua ni rere; koi au ka'u na vakani kemudou kei ira na nomudou lalai.” A sa vakataudeitaki iratou kina, ka sa vosa vakayalololoma vei iratou.

Nai Cavacava ni Bula i Josefa kei na Nona Mate

22A sa tiko ga mai Ijipita ko Josefa, kei na lewe-ni-vuvale i tamana; a sa bula ko Josefa ka dua na drau ka tini na yabaki.

23A sa raica na kawa i Ifereimi ko Josefa, ka yacova nai katolu ni tabatamata; a luve i Mekiri talega, na luve i Manasa, sa susuga ko Josefa.

24A sa kaya vei ira na veitacini ko Josefa, “Koi au, ka'u sa vakarau mate; ia na Kalou ena talevi kemudou vakaidina, ka kauti kemudou cake tani e na vanua oqo ki na vanua sa bubului kina ko koya kivei Eparaama, kei Aisake, kei Jekope.”

25Lako 13.19; Josua 24.32; Ipe 11.22A sa qai cakava ko Josefa me ra vosa bubului na luve i Isireli, ka kaya, “Ni sa talevi kemudou mai vakaidina na Kalou, mo dou qai kauta tiko yani na suiqu mai na vanua oqo.”

26A sa ciba ko Josefa, ni sa dua na drau ka tini na nona yabaki; a ra sa vakarautaka na yagona e na ka boi vinaka me maroroi kina vakabalavu, ka kotora e loma ni dua na kato mai Ijipita.