1A vosa i Jiova sa yaco vei Joeli na luve i Pecueli:
Era sa Tagicaka na Tamata na Vakacacani ni Vanua2Dou rogoca mada na ka oqo, na qase,
ka vakatudaliga, oi kemudou kece na lewe-ni-vanua!
Sa yaco beka na ka vakaoqo e na nomudou gauna,
se na nodra gauna na nomudou qase?
3Dou tukuna matua vei ira na luvemudou,
ka me ra tukuna ko ira na luvemudou vei ira na luvedra,
kei na luvedra me ra tukuna ki nai tabatamata e tarava.
4A ka sa vakavoca na vodre dauquru,
sa kania na vodre dina;
kei na ka sa vakavoca na vodre dina,
sa kania na vodre dramidrami,
kei na ka sa vakavoca na vodre dramidrami,
sa kania na vodre dauvakacaca.
5Dou yadra mai, koi kemudou na daumateni, ka tagi;
ia dou qoqolou kece, koi kemudou na daugunu waini,
e na vuku ni waini vou,
ni sa kau tani mai na gusumudou.
6 Vtaki 9.8 Ni sa dua na matanitu sa lako cake mai ki na noqu vanua,
e kaukauwa ka sa sega ni wili rawa;
a batidra sa vaka na bati ni laione,
ka ra sa vakagalegalena me vaka na laione yalewa.
7Sa vakamalaitaka na noqu vaini,
ka sa musumusulaka na noqu vuni lolo;
sa luvata laivi na kulina, ka sa biuta;
sa vakavulavulataki na tabana.
8Mo tagi me vaka na goneyalewa sa sulumaki e nai sulu taga
me i loloku ni watina ni sa goneyalewa.
9Sa muduki sara mai na vale i Jiova
nai madrali laukana kei nai madrali gunuvi.
Era sa tagi na bete,
nai talatala i Jiova.
10Sa vakacacani na were,
sa tagi na qele;
ni sa vakacacani na sila,
sa di na waini vou,
sa via oti mai na waiwai.
11Dou madua, nai vakatau-ni-were,
dou qoqolou, na dausamaki vaini,
e na vuku ni witi kei na barile;
ni sa rusa na vuata ni were.
12Sa mamaca na vaini,
ka sa malai na vuni lolo.
Na pomekaraneti, na niu-sawa talega, kei na apolo—
na kau kecega oqo ni vanua sa malai;
sa malai dina vakakina na reki
e na kedra maliwa na tamata.
Na Kaci ni Veivutuni kei na Masu13Dou sulumaki kemudou mada e nai sulu taga na bete, ka tagi;
dou qoqolou, koi kemudou sa qarava nai cabocabo-ni-soro.
Dou mai curu, ka vakabogi e nai sulu taga,
oi kemudou nai talatala ni noqu Kalou!
Ni sa bureitaki ki na vale ni nomudou Kalou
nai madrali laukana kei nai madrali gunuvi.
14Dou vakatabuya e dua na siga me ia kina na lolo,
kacivaka e dua nai soqosoqo tabu.
Vakasoqoni ira na qase
kei ira kece na lewe-ni-vanua
ki na vale i Jiova na nomudou Kalou,
ka tagi vei Jiova.
15 Aisea 13.6 Ulei na siga ko ya!
Ni sa voleka na siga i Jiova,
ia ena yaco mai me vaka na veivakarusai
mai vei Koya sa Kaukauwa.
16Sa sega li ni muduki tani mai vei keda na kakana,
io na marau kei na reki mai na vale ni noda Kalou?
17Sa vuca na sore ni sila e na loma ni kena qele,
sa lala na vale-ni-yau;
sa rusa na lololo
ni sa malai na sila.
18Ulei na nodra vutugu na manumanu!
Sa kidroa na qele ni bulumakau
ni sa sega na kedra vanua veico;
io, na qele ni sipi sa vakaloloma.
19I Jiova, ka'u na tagi vei kemuni,
ni sa kama e na bukawaqa na vanua veico mai na vanua lala,
ia na yameyame ni bukawaqa
sa kama kina na kau kecega ni vanua.
20A manumanu ni vanua talega sa tagi vei kemuni
ni sa di mai na dreke ni wai,
ia na bukawaqa sa kania
na vanua veico mai veikau.
Who We AreWhat We EelieveWhat We Do
2025 by iamachristian.org,Inc All rights reserved.
